Yehezkiel 20

Iatonna taun ma’pempitu bulan ma’pellima, allo ma’pessangpulo bulan iato, saemi tu ba’tu pira-pira pekaamberanna to Israel la umpalaku pa’timbanganNa PUANG, anna unno’ko’ dio tingayoku.

Attu iato rampomi kadanNa PUANG lako kaleku Nakua:

E ma’rupa tau, sipa’kadako pekaamberanna to Israel sia ma’kadako lako mukua: Inde sia tu kadanNa Puangta PUANG Nakua: Saerokomika la umpalaku pa’timbangangKu? La lelukraka tuoKu, tae’ Kuelorangkomi umpalaku pa’timbangangKu, kadanNa Puangta PUANG.

Morairokoka umpaolai salu tu tau iato, morairokoka ma’paolai salu, e ma’rupa tau? Paissanni tau iato mai tu mintu’ apa megallianna nene’ to dolona,

ammu ma’kada lako kumua: Inde sia tu kadanNa Puangta PUANG Nakua: Iatongku pilei langsa’i tu to Israel, umposumpaNa’ misa’ sumpa lako bati’na rapunna Yakub, sia Kupapayan tu Kaleku lako tau iato mai dio tondok Mesir; tonganna umposumpaNa’ misa’ sumpa, Kukua: Akumo tu PUANG, Kapenombammu.

Allo iato umpalaoNa’ sumpa lako tau iato mai, kumua la Kusolan lan mai tondok Mesir, lako misa’ tondok, tu mangka Kutonnoranni, tu sebo pangandu’ sia tani’ enoan; iamo misa’ belo dio lu mintu’ tondok.

Ma’kadaNa’ lako tau iato mai Kukua: Pantan tibei tu apa megallian nata’pai matammi; da mipa’ruttakki rapang-rapang dipodeatanna to Mesir tu kalemi. Akumo tu PUANG, Kapenombammu.

Apa nabali-baliNa’ sia noka umperangiiNa’; moi misa’ tae’ untibei tu apa megallian sia tae’ natampei tu rapang-rapang dipodeatanna to Mesir, Kuurungan untangnga’i la umbarrakan kare’dekan ara’Ku lako tau iato mai, sia umpaupu’ kasengkeangKu tu Kuparampoanni dio tondok Mesir.

Apa Kupalalomo tu penggaurangKu belanna sangangKu, kumua da nadipamatuna dio pentirona mintu’ bangsa, tu nanii torro tau iato mai; dio pentirona tau iato mai Kunii umpapaan Kaleku, belanna Kusolan lan mai tondok Mesir.

Kusolammi tu tau iato mai sun lan mai tondok Mesir sia Kubaa tama padang pangallaran.

Kubenni tu apa Kupondok sia Kupa’peissanan lako tau iato mai tu atorangKu, tu napotuo tau, ke naturu’i.

Sia Kuben duka tu mintu’ allo katorroangKu, dadi misa’ tanda lan alla’Ku na tau iato mai, anna issanni tau iato mai, kumua Akumo, PUANG, tu umpamaseroi.

Apa pabali-bali tu to Israel lako Kaleku lan padang pangallaran; tae’ naturu’i tu apa Kupondok sia natibe tu atorangKu, tu napotuo tau, ke naturu’i. Napamatuna liu tu allo katorroangKu, Kuurungan untangnga’i la umbarrakanni tu kare’dekan ara’Ku lako tau iato mai lan lu padang pangallaran la ussabu’i.

Apa Kupalalomo tu penggaurangKu belanna sangangKu, kumua da nadipamatuna dio pentirona mintu’ bangsa, tu dio pentirona Kunii umpatassu’i tu tau iato mai.

Apa moi susito umpalao dukaNa’ sumpa lako tau iato mai lan lu padang pangallaran, kumua tae’ Kula ussolanni tu tau iato lako tondok, tu mangka Kukamaseanni, tu nanii sebo pangandu’ sia tani’ enoan – iamo belo dio lu mintu’ tondos-

belanna natibe tu atorangKu sia tae’ naturu’i tu apa Kupondok sia umpamatuna allo katorroangKu, belanna iatu penaanna ma’misa lako rapang-rapang dipodeatanna.

Apa mamase siaNa’ untiroi, anna tae’ Kusabu’i sia tae’ Kumangsanni lan lu padang pangallaran.

Ma’kadaMo’ lako mintu’ anakna tau iato mai lan padang pangallaran, Kukua: Da mituru’i tu apa napondok nene’ to dolomi, da mikaritutui tu atoranna sia da miparuttakki rapang-rapang dipodeatanna tu kalemi.

Akumote tu PUANG, Kapenombammu, turu’i tu apa Kupondok sia karitutui tu atorangKu, ammi pogau’i.

Pamadatui tu allo katorroangKu, nadadi misa’ tanda lan alla’Ku na kamu, ammi tandai, kumua Akumo, tu PUANG, Kapenombammu.

Apa iatu mai anakna pabali-bali lako Kaleku, tae naturu’i tu apa Kupondok sia tae’ nakaritutui tu atorangKu, tu napotuo tau, ke naturu’i. Napamatuna tu mintu’ allo katorroangKu, Kuurungan untangnga’i la umbarrakanni tu kare’dekan ara’Ku lako tau iato mai sia umpaupu’ kasengkeangKu tu Kuparampoanni lan lu padang pangallaran.

Sia Kuriu’ sule tu limangKu sia Kupogau’ susito belanna sangangKu, kumua da nadipamatuna dio pentirona mintu’ bangsa, tu dio pentirona Kunii umpatassu’i tu tau iato mai.

Apa umpalaoMo’ sumpa lako kalena lan lu padang pangallaran, kumua la Kupatisambo’ tu tau iato mai dio lu mintu’ bangsa sia la Kupatitale’ dio lu mintu’ tondok,

belanna tae’ naturu’i tu atorangKu sia natibe tu apa Kupondok, napamatuna tu mintu’ allo katorroangKu sia tae’ napasalai mata tu rapang-rapang dipodeatanna ambe’na.

Iamoto Kubenni tau iato mai tu apa dipondok tang melo sia atoran, tae’ nala umpotuoi.

Sia Kuparuttakki pemala’na tu tau iato mai – belanna mintu’ anak pa’bunga’na napamaindanni api – la umpapussak penaanna tau iato mai, anna tandai’ kumua Akumo tu PUANG.

Iamoto, e ma’rupa tau, ma’kadako lako to Israel sia kuanni mukua: Inde sia tu kadanNa Puangta PUANG, Nakua: Tete dio duka penggauran iato, nanii nene’ to dolomi ullo’boNa’, sia tang maruru’ lako Kaleku.

Iatongku solanni tama tondok tu mangkaMo’ umpalao sumpa la Kukamaseanni, natiromi tu mintu’ tanete malangka’ sia mintu’ kayu maloboran, na inde to dio nanii umpemalaranni tu pemala’na, sia nanii umpennoloanni tu pamenganna, tu umpabu’tu pa’di’ penaa, sia untunu dupa busarungngu’ sia umboloanni tu pemala’ pantedok.

Ma’kadaNa’ lako tau iato mai Kukua: Apa toda ia tu inan madao minii kendek langngan? Iamoto nasangai tau Inan madao sae lako allo iate.

Iamoto ma’kadako lako to Israel kumua: Inde sia tu kadanNa Puangta PUANG: La miruttakkiraka tu kalemi susi napogau’ neme’ to dolomi sia la ma’gau’ salarokomika unturu’i tu apa megallianna tau iato mai?

Ondongpi belanna mibaa tu pemala’mi, iamotu anakmi mipamaindanni api, miruttakki tu kalemi napobua’ mintu’ rapang-rapang dipodeatammi sae lako allo iate; la Kueloranrokomika umpalaku pa’timbangangKu, e to Israel? La lelukraka tuoKu, kadanNa Puangta PUANG, tae’ Kuelorangkomi umpalaku pa’timbangangKu.

Sia apa tu bu’tu lan penaammi, inang tae’ anna la lolo’, tu mikua: la susikanni tu bangsa iato, la susikanni tu suku lan tondok iato la menomba lako kayu sia batu.

La lelukraka tuoKu, kadanNa Puangta PUANG, manassa la Kuparentakomi lima matoto’ sia takia’ tie’te sia la Kupabarrakkikomi kare’dekan ara’Ku.

La Kutassu’ikomi dio mai tangngana mintu’ bangsa sia Kupulungkomi lan mai mintu’ tondok tu minii tisambo’ male, tete dio lima matoto’ sia takia’ tie’te’ sia kare’dekan ara’ dibarrakan.

Angku baakomi lako padang pangallaranna mintu’ bangsa sia umpaolaikomi salu inde to dio anta sitiro lindo.

Susitu nene’mi mangka Kupaolai salunna dio padang pangallaranna tondok Mesir, ten dukamoto tu kamu la Kupaolai salunna, kadanNa Puangta PUANG.

Sia la Kupaunnola diongnakomi lu tekken to mangkambi’ sia Kupaalaikomi pepori basse.

Sia la Kusarakki dio mai kalemi tu to pabali-bali sia iatu to unneaNa’; la Kutassu’i duka lan mai tondok nanii mentiruran, apa tae’ nala tama tondok Israel. Ammi issanni, kumua Akumo tu PUANG.

Na kamu, e to Israel, kadanNa Puangta PUANG, da’ito ammi pantan lao umpenombai rapang-rapang dipodeatanna. Apa undinna la miperangiiNa’ sia tae’mo mila umpamatuna sanga madatungKu tete dio pamengan pemala’mi sia rapang-rapang dipodeatammi.

Belanna dao buntu maindanKu, dao buntu malangka’na Israel, kadanNa Puangta PUANG, inde to la nanii mintu’ to Israel umpenombaiNa’, iamotu mintu tau lan tondok iato. Indeto dio la nanii unnalai penaangKu sia inde to dio la Kunii umpalaku pa’duruk sia iatu melona pamengammi, dio mai mintu’ apa mipamarimbangan.

Sia la naalakomi penaangKu butung misa’ bau busarungngu’, ke Kutassu’imokomi lan mai bangsa iato. Sia la Kupasipulungkomi lan mai tondok dinii umpatisambo’komi male sia la Kupapayan To maindan tu Kaleku lako kalemi dio pentirona mintu’ bangsa.

Ammi tandai, kumua Akumo tu PUANG, ke la Kusolammokomi tama tondok Israel, tama tondok tu mangkaMo’ umpalao sumpa ungkamaseanni nene’ to dolomi.

Sia inde to la minii ungkilalai tu mintu’ gau’mi sia penggaurammi, tu mipobannang urruttakki kalemi belanna mintu’ penggauran kadake tu mangka mipogau’.

Sia mitandai Akumo tu PUANG, ke Kugau’komi tete dio sangangKu sia penggauran bulitukmi, e to Israel, kadanNa Puangta PUANG.

Rampomi tu kadanNa PUANG lako kaleku Nakua:

E ma’rupa tau, mentingo lu sau’ko, palolongko kadammu sau’ lili’ Lo’na lu sia ma’nubua’ko unnea mempangala’na, iamotu padang Lo’na lu.

Sia ma’kadako lako pangala’ dio padang Lo’na lu kumua: Perangii te kadanNa PUANG: Inde sia tu kadanNa Puangta PUANG: Manassa la Kupadukku tu api lan tangngamu, anna kandei tu mintu’ kayu mamata sia mintu’ kayu marangke lan lili’mu. Na iatu api ma’lana-lana iato tang pa’de len, apa randuk lo’ mai rampe lo’na lu sae rekke rampe daanna lu iatu mintu’ lindona tau nalepa’i api iato.

Anna mintu’ tolino untiroi, kumua Akumo, tu PUANG, mangka umpadukkui na tang pa’de len.

Attu iato ma’kadana’ kukua: O Puangta PUANG, napokada tau tu diona a’gangku, kumua: Tang napokadaraka tu rapang-rapang kada?