Yehezkiel 32
Iatonna taun ma’pessangpulo dua, bulan ma’pessangpulo dua, allo bunga’na bulan iato, rampomi tu kadanNa PUANG lako kaleku, Nakua:
E ma’rupa tau, sa’buranni misa’ bating tu Firaun, datu Mesir, sia ma’kadako lako mukua: E singa mangura dio lu mintu’ bangsa, dipakappamoko! Ikomo sangtinti misa’ naga: lan salummu munii pamburo’tok-ro’tok, iatu uai tisenggong napobua’ lette’mu sia umpamaluttuk uainna.
Inde sia tu kadanNa Puangta PUANG, Nakua: Kuballarangko dalla’Ku tete dio kasita’panna buda bangsa, anna angka’ko tau iato mai lan dalla’Ku!
Kupembuangangko rokko padang, Kupembassanangko rokko kuli’na padang, angKu pasaei tu mintu’ manuk-manuk dao mai langi’ unta’paiko, sia Kupediarangko olo’-olo’ lan mintu’ lino.
Iatu duku’mu Kutale’ dao lu buntu sia iatu batang rabukmu Kuponnoan lombok.
Iatu padang Kupairu’ borromu, sia iatu raramu sae langngan buntu; sia iatu salu’-salu’ marangke la muponnoi duka tu apa iato.
Iake Kupamurru’iko, Kusamboi tu langi’ sia Kupamalillin tu mintu’ bintoen. Iatu mataallo Kuparerungi gaun, sia iatu bulan tae’ naparrang.
Mintu’ apa tu parrang dao langi’ Kupamalillin belanna pa’katumangmu; Kuparampoi kamalillinan tu padangmu, kadanNa Puangta PUANG.
La Kupamagiang tu penaanna buda bangsa, ke Kupa’peissanammi tu kasanggangammu lako ba’tu pira-pira bangsa, lan lu tondok tang mutandai.
Ondongpi buda bangsa Kupatiramban diona iko, sia iatu mai datunna la ma’pagege belanna pa’katumangmu, ke Kuaakki tu pa’dangKu dio tingayona tau iato mai; tae’ upu’na tu tau iato mai la ma’parondo, pantan umpomataku’ katuoanna, lan to allo munii songka.
Belanna inde sia tu kadanNa Puangta PUANG, Nakua: La narampoiko tu pa’dangna datu Babel.
Iatu to budammu la Kupakandei pa’dangna to lalong, iamotu mintu’ to tarru’ masa’ga’ dio lu mintu’ bangsa; iatu tau iato mai ussanggang kamaballoanna Mesir, sia iatu to budanna disabu’i.
Iatu mintu’ patuoanna, Kuputtai dio mai biring uai kapua; tae’mo natisenggong len napobua’ lette’ tau, sia tae’mo namaluttuk len napobua’ lette’ patuoan.
Attu iato la Kupamalino sule tu uainna, sia iatu salunna la Kupalolong anna ma’tan susi minna’, kadanNa Puangta PUANG.
Iake Kupopempadang lo’bangmi tu Mesir, ke disarrinnimi tu mintu’ apa lan, ke Kubambanganni tu mintu’ pa’tondokanna – attu iato la natandai tau iato mai, kumua Akumo tu PUANG.
Iamote tu bating: la napobating tau; la napobating pia baine dio lu mintu’ bangsa; la nabatingan Mesir sia mintu’ to budanna, kadanNa Puangta PUANG.
Iatonna taun ma’pessangpulo dua, allo ma’pessangpulo limanna bulan iato, rampomi tu kadanNa PUANG lako kaleku, Nakua:
E ma’rupa tau, toloranni misa’ bating tu to budanna Mesir; la mupopengkalao tu tau iato mai – iko sola mintu’ pia baine dio lu bangsa tarompo’ – rokko lino to mate, iamotu lako to mangka mengkalao rokko panglamunan.
Mindapara tu musau’ kamaballoan? Mengkalaomoko rokko ammu dipamatindo sola to tang disunna’i!
Tau iato mai tibambang dio lu to nakande pa’dang. Disorongammo pa’dang: riu’i male tu Mesir sola mintu’ to budanna!
Lan mai lino to mate la metamba tu to lalong tarompo’ lako kalena sia lako mintu’ to patunduanna kumua: Mengkalaomo tu tau iato mai anna matindo diong, iamotu to tang disunna’i, tu mangka nakande pa’dang.
Indeto dio nanii tu Asyur sola mintu’ taunna, natikui panglamunanna tau iato mai; mintu’ tau iato mai dipatei sia tibambang nakande pa’dang.
Iatu panglamunanna tau iato mai dio boko’ lan garuang mandalan, iatu taunna untikui panglamunanna; mintu’ tau iato tibambang nakande pa’dang, iamotu tau umpatale’ katirambanan lan lu lino to tuo.
Inde dukato tu nanii Elam sola mintu’ taunna untikui panglamunanna: mintu’nato dipatei, tibambang nakande pa’dang, iamotu to mengkalaomo rokko lino to mate, apa tae’, nadisunna’i, iamotu to umpatale’ katirambanan lan lu lino to tuo; totemo iatu tau iato situang siri’na sola tu to mangkamo mengkalao rokko panglamunan.
Dio lu tau dipatei diparandanammo patindoan sisola mintu’ to budanna untikui panglamunanna, iamotu to tang disunna’i sola nasang sia dipatei pa’dang. Tonganna iatu katirambanan diona tau iato mai titale’mo lan lu lino to tuo; totemo iatu tau iato situang siri’na sola tu to mangkamo mengkalao rokko panglamunan: dipasirau ta’nakmo sola tau dipatei.
Inde to dio den duka Mesekh-Tubal sola to budanna, natikui panglamunanna tau iato mai; mintu’nato tang disunna’i sia dipatei pa’dang. Tonganna tau iato mai umpatale’ katirambanan lan lu lino to tuo.
Iatu to tibambang dio lu to tang disunna’i, tae’ namatindo sisola to lalong, tu mengkalao rokko lino to mate situang pa’bunona, sia napadiong tau to’ ulunna tu pa’dangna sia iatu kakadakeanna diong sola bukunna. Tonganna iatu katirambanan diona to lalong iato lan lu lino to tuo.
Apa iko, dio lu to tang disunna’i la munii matindo tita’tak-ta’tak sola tu mintu’ to napatei pa’dang.
Inde to dio den duka tu Edom, sia iatu mai datunna sia mintu’ arungna, tu dipamatindo sola to mangka dipatei pa’dang, moi anna to paa. Matindo duka tu tau iato mai sola to tang disunna’i, iamotu to mangkamo mengkalao rokko panglamunan.
Inde to dio den duka tu mai arung rampe daanna lu sola nasang sia mintu’ to Sidon; tau iato mai mengkalaomo rokko sola tu tau dipatei, anna maila’, moi anna patirambanni tau tu diona kuasanna. Tau iato mai tu tang disunna’i matindo sola to dipatei pa’dang sia situang siri’na sola tu to mengkalaomo rokko panglamunan.
La natiro Firaun tu tau iato mai, anna umpakatana kalena diona to budanna. Iatu Firaun sola mintu’ surodadunna dipateimo pa’dang, kadanNa Puangta PUANG.
Belanna iatu diona Aku napotiramban tau, la Kupatitale’ lan lino to tuo; iamoto nadipamatindo dio lu to tang disunna’i sia to dipatei pa’dang, iamotu Firaun sola mintu’ to budanna, kadanNa Puangta PUANG.