Yeremia 28

Iatonna taun iato, iamo tonna tipamulanna kadatuanna Zedekia, datu Yehuda, tonna taun ma’penna’pa’na, bulan ma’pellimanna, ma’kadami tu nabi Hananya, anakna Azur, tu lu dio mai Gibeon lako kaleku, lan banuanNa PUANG dio tingayona mintu’ to minaa sia mintu’ to buda, nakua:

Inde sia tu kadanNa PUANGna mintu’ ma’dandan maritik, Kapenombanna to Israel, Nakua: Kusanggangmo tu ayokana datu Babel.

Tae’pa naganna’ duang taun angKu pasulei dio inan iate tu mintu’ pareananna banuanNa PUANG, tu naala Nebukadnezar, datu Babel, dio mai inan iate nabaai lako Babel.

Sia ia duka tu Yekhonya, anakna Yoyakim, datu Yehuda, sia mintu’ tu to dipali’mo lako Babel dio mai Yehuda, Aku la umpasulei dio inan iate, kadanNa PUANG; belanna la kusanggang tu ayokana datu Babel.

Ma’kadami nabi Yeremia lako nabi Hananya dio tingayona mintu’ to minaa sia mintu’ to buda, tu bendan lan banuanNa PUANG,

nakuami nabi Yeremia: Amin, lala sia manii Napogau’i PUANG susito! Lala sia manii Napalaloi PUANG tu apa mupa’nubuaran. Nabaai sule dio mai tondok Babel lako inan iate tu mintu’ pareanan banuanNa PUANG sia iatu mintu’ to dipali’.

Apa perangii te kada iate tu Kupokada dio pa’perangimmu sia dio pa’peranginna mintu’ to buda iate.

Iatu mintu’ nabi dolo-dolona, tu dolo na aku sia dolo na iko ma’nubua’ diona ba’tu pira-pira tondok matoto’ sia ba’tu pira-pira kadatuan kapua, kumua la narampoi kasirarian sia kamandasan sia ropu.

Iamoto, iake denni nabi ma’nubua’ diona kamarampasan, iake laloi tu pa’nubua’na, maneri payan kumua ia misa’ nabi, tu tonganna Nasua PUANG.

Attu iato naalami nabi Hananya tu ayoka dao mai sokkongna nabi Yeremia, anna sanggangi.

Ma’kadami tu Hananya dio tingayona mintu’ to buda iato, nakua: Inde sia tu kadanNa PUANG, Nakua: La Kusanggang susi dukato tu ayokana Nebukadnezar, datu Babel, dao mai sokkongna mintu’ bangsa, ke tae’pi naganna’ duang taun. Malemo tu nabi Yeremia.

Apa iatonna mangka nabi Hananya ussanggangi tu ayoka dao mai sokkongna nabi Yeremia, saemi kadanNa PUANG lako Yeremia, Nakua:

Maleko sia pokadanni Hananya kumua: Inde sia tu kadanNa PUANG Nakua: Iatu ayoka kayu musanggang, apa la mugaragan kalemu ayoka bassi sondana.

Belanna inde sia tu kadanNa PUANGna mintu’ ma’dandan maritik, Kapenombanna to Israel, Nakua: Kupapassanni ayoka bassi tu sokkongna mintu’ bangsa iate, la umpengkanorongi Nebukadnezar, datu Babel, na bangsa iato mai mengkanorong lako kalena; moi anna iatu mintu’ olo’-olo’ dio lu padang Kukamasean dukai.

Sia nakua duka nabi Yeremia lako nabi Hananya: Perangii, e Hananya, manassa tae’ nasuako PUANG, sangadinna iko napobannang te bangsa iate urrannuan apa tang tongan.

Iamoto, nakua kadanNa PUANG: Manassa la Kuputtaiko dao mai kuli’na padang, lan taun iate ammu la mate, belanna muada’i tu tau pabali-bali lako PUANG.

Ta’kala matemi tu nabi Hananya taun ia dukato, bulan ma’pempitunna.