Yeremia 31

Attu iato, kadanNa PUANG; la dadiNa’ Kapenombanna mintu’ pa’rapuanna Israel, anna tau iato mai la dadi taungKu.

Nakua kadanNa PUANG: Iatu to tilendok dio mai pa’dang unnappa’ kamaturu-turuan lan padang pangallaran, iamotu to Israel tonna male lako inan kapelayoanna.

Iatu PUANG payanmo lako kaleku dio mai inan mambela: Tonganna Kukamaseiko situang pa’kamase matontongan, iamoto Kunaranko kamasokanan.

La Kubangunangko sule, ammu bendan sule, e anak dara Israel! La ma’beloko sule sia ma’dedek ganda’-ganda’ ammu tassu’ sola to ma’marua’-rua’ ma’gellu’.

La untanan pole’ko garonto’ anggoro’ dao lu mintu’ buntu Samaria, na iatu to untananni la ungkandei tu buanna.

Belanna bu’tumo tu allona, ke metambai tu to ma’kampa dao buntu Efraim, nakua: Maikomi, takendek langngan Sion mennolo lako PUANG, Kapenombanta.

Belanna nakua kadanNa PUANG: Unnarrak-arrakkomi diona Yakub, sia kumalasi-lasikomi diona pangulunna mintu’ bangsa; pa’petaleranni sia pudii sia ma’kadakomi kumua: Narampanammo PUANG tu taunNa, iamotu to Israel torronapa.

Manassa la Kusolan tu tau iato mai lan mai tondok daa ulunna salu sia Kurampun dio mai mintu’ biring langi’; dio lu tau iato mai den to buta sia to kupi’, to ma’tambuk sia to kianak; iamo misa’ kasirampunan kapua tu sangke’deran la sule dio mai.

Anna sae tu tau iato mai situang tangi’na, AngKu solanni natontong mengkamoya-moya; la Kusolan lako to’ salu’-salu’ dio lalan marante, tu tae’ nanii titodo lette’na. Belanna Aku napoambe’ Israel na Efraim iamo anak pa’bunga’Ku.

Perangii tu kadanNa PUANG, e mintu’ bangsa, patale’i lako mintu’ tondok dio biring tasik sia pokadai kumua: Iatu Puang, tu umpatisambo’ to Israel male, Ia dukamo la umpulungi sule sia urrinding pala’i susito misa’ to mangkambi’ ungkaritutui dombana ma’baanan.

Belanna Nalendokammo PUANG tu Yakub sia Narampanan lan mai limanna to mandu matoto’ anna ia.

Iamoto anna sae tu tau iato mai unnarrak-arrak dao tanete Sion sia sangsaean sirampun lako pamengan melona PUANG, iamotu gandung sia uai anggoro’ ba’ru sia minna’ sia anak domba sia anak sapi; iatu penaanna tau iato mai susito pa’lak disakka’i, tae’mo nala kapu’duran len.

Attu iato iatu mintu’ anak dara parannu-rannu ma’gellu’, susi dukato tu muane mangura sia to matua parannu-rannu, belanna la Kupopembali kasendean tu passanda bolongna tau iato mai, sia la Kupakatana sia Kupakarannu, ke upu’mi tu kamasussanna.

La Kupakande tinanak tu mintu’ to minaa, anna parannu penaanna sia la Kupedia’i kameloangKu tu mintu’ taungKu, kadanNa PUANG.

Nakua kadanNa PUANG: Perangii, dio Rama den bating sia tangi’ tu mandu merio-rio, iamotu Rahel untangi’i mintu’ anakna, natang pakaranga-ranganna, belanna tae’mo tu anakna.

Inde sia tu kadanNa PUANG, Nakua: Parapa’mi tu tangi’mu sia da mupasidali-dalii tu uai matammu, belanna la den poleanna tu kamara’tasammu, kadanNa PUANG, iamoto la sule tu tau iato mai dio mai tondok uali.

Tonganna den dirannuan dio tu apa urrampoiko undinna, kadanNa PUANG: belanna mintu’ anakmu la sule tama lili’ tondokna.

Tonganna Kurangi tu Efraim sumarro, nakua: Mangkamo’ Mipa’dikki, sia dipa’dikkina’ susi sapi mangura tu tae’pa nadipamanaran; patoba’na’, angku mengkatoba’, belanna Kamumo, o PUANG, Kapenombangku.

Iatongku kilalai tu a’gangku, menassanmo’, iatongku inaa-naai tu pasiruangku, ussa’pamo’ ara’ku; kasirisammo’, sia maila’, belanna untanggungna’ kaditattan tongku mangura.

Tang anak pa’kaboro’Kuraka tu Efraim, tang anak Kukamasei tonganraka, Kuurunganni pempiran-piran umpokadai tu a’ganna, tontong bang Kuparinaa? Iamoto tiakka’ tu penaangKu diona a’ganna; manassa la Kukaturu-turui, kadanNa PUANG.

Pabendanangko kalemu ba’tu pira-pira tanda, osokangko kalemu ba’tu pira-pira lentong pedullu lalan kamantangi tu batatta, tu lalan muola; sulemoko, e anak dara Israel, sulemoko indete lan lu mintu’ kotamu!

Sangapapako la ma’marempa-rempa, e anak dara, magasa penaanna? Belanna Napadenmo PUANG tu misa’ apa ba’ru lan lino, iamotu baine umpakatuan pangngan muane.

Nakua kadanNa PUANGna mintu’ ma’dandan maritik, Kapenombanna to Israel: Iatu kada iate la napake pole’ tau dio tana Yehuda, sia lan mintu’ kotana, ke mangkami Kupopembali tu toto’na, nakua: Napamasakkemoroko PUANG e inan kamaloloan sia buntu masero!

Indeto dio la nanii torro to Yehuda sola tau iato mai lan mintu’ kotana, la ma’pa’lak la to salamba salao ungkambi’ dombana ma’baanan,

belanna Kupamatana tu penaa bonnong sia Kupamalapu’ tongan tu mintu’ penaa puru’.

Mangkato pana’dingmo’, angku bangunan matangku; na iatu mamma’ku lendu’ ia kupomanamanna.

Tonganna la sae tu allona, kadanNa PUANG, ke Kuambo’imi bati’ torro tolino sia bati’ patuoan tu tondok to Israel sia iatu tondok to Yehuda.

La dadi undinna, kumua susitu Aku tumayaMo’ la undu’dukki sia urrondonni sia ussanggangi sia urrabunni sia la umparampoi kamandasan tu tau iato mai, la susi dukamoto tumayaNa’ la umbangunni sia untananni, kadanNa PUANG.

Attu iato tae’mo nala den tu kadanna tau kumua: Mintu’ ambe’ ungkande bua anggoro’ makkan, anna isinna anakna mangilu.

Sangadinna pantan la mate tu tau belanna kasalanna kalena sia minda-minda tu ungkande bua anggoro’ makkan, isinna duka tu la mangilu.

Tonganna la sae tu allona, kadanNa PUANG, ke untananNa’ basse ba’ru sola to Israel sia to Yehuda.

Tae’ nasusi tu basse, tu Kutanan sola nene’ to dolona, tongKu toei tu limanna la ussolanni tu tau iato mai lan mai tondok Mesir, iamotu basseKu tu napoka, moi na Aku umpuangi tu tau iato mai, kadanNa PUANG.

Iamote tu basse tu la Kutanan sola to Israel undinna na allo iate, kadanNa PUANG Nakua: Aku la umpalanni ba’tengna tu Sukaran alukKu sia la ussura’i to lan penaanna, anna Aku la dadi Kapenombanna na tau iato mai la dadi taungKu.

Attu iato iatu tau iato mai sia iatu mai to massiulu’ pada tae’mo nala siadaran, nakua: La mitandai tu PUANG!, belanna mintu’ tu tau iato mai la untandaiNa’ randuk dio mai tarru’ bitti’na sae lako tarru’ kapuana, kadanNa PUANG, belanna la Kupa’dei tu mintu’ kakadakeanna sia iatu mintu’ kasalan tae’mo Kula ungkilalai.

Inde sia tu kadanNa PUANG, tu umpaden mata allo la unnarrangi masiang sia umpana’ta’ bulan sia mintu’ bintoen la unnarrangi malillin sia usse’go’ tasik, naurunganni mongngo’ tu bombangna; PUANGna mintu’ ma’dandan maritik iamoto tu sanganNa;

Iake moronganna anna tang manda’ tu mintu’ atoran iato dio oloKu, kadanNa PUANG, maneri tu bati’na to Israel tae’ nadadi misa’ bangsa dio oloKu lan mintu’ allo.

Inde sia tu kadanNa PUANG, Nakua: Iake la ma’dinni disuka’ tu langi’ dao sia mintu’ parandangan lino diong ma’din disandak, maneri Kutibe tu mintu’ bati’na Israel, belanna mintu’ penggauranna, kadanNa PUANG.

Tonganna la sae tu allona, kadanNa PUANG, kumua iate kota iate la dipabendanan PUANG randuk dio mai menara Hananeel sae lako Babangan tetuk.

Indeto dio mai la dipalulako tarru’ langngan tanete Gareb tu ulang pesuka’ iato, anna sembang lako Goa.

Sia mintu’ lombok batang rabuk sola au, sia mintu’ padang sae lako salu Kidron sia rampo lako babangan Darang, tu ma’palulako matallo, la dipamaindanan PUANG; moi misa’ tae’mo nala disanggang ba’tu disabu’i tontong sae lakona.