Yeremia 39

Iatonna taun ma’pengkasera kadatuanna Zedekia, datu Yehuda, bulan ma’pessangpulo, saemi tu Nebukadnezar, datu Babel sola mintu’ surodadunna lako Yerusalem, anna patama limbui.

Iatonna taun ma’pessangpulo misa kadatuanna Zedekia, bulan ma’penna’pa’ sia allo ma’pengkaseranna bulan iato, ditossomi tu tambakuku kota.

Tamami tu mintu’ surodadunna datu Babel, anna bendan dio to’ babangan Tangnga, iamotu Nebusyazban pangulu sandan uai, Nergal-Sarezer, to maraa sia iatu mai arung senga’na datu Babel.

Iatonna tiromi Zedekia, datu Yehuda, sia mintu’ surodadunna tu tau iato mai, mallaimi untampei tu kota tonna bongi ma’palulako pa’lak datu, anna sun unnola babangan naparitangnga da’dua benteng tembok, namale ma’palulako Araba-Yordan.

Apa naula’ to Kasdim tu tau iato mai, anna lambi’i tu Zedekia dio padang marantena Yerikho; anna solanni lako Nebukadnezar, datu Babel dio Ribla, lili’na Hamat: nara’ta’i Nebukadnezar tu ukunganna.

Napateimi datu Babel tu mintu’ anakna muane Zedekia dio Ribla dio tingayona sia napatei datu Babel tu mintu’ to Yehuda mala’bi’.

Sia nasu’be’i patomali tu matanna Zedekia, anna pungoi rante tambaga da’dua, la nabaa lako Babel.

Iatu tongkonan layukna datu nasumpun to Kasdim, sia iatu mai banuanna to buda, sia mintu’ tembo’ Yerusalem natuan.

Iatu to torronapa, tu lan siapa kota sia mintu’ to menta’pa, tu malemo umpenta’pai, narampa Nebuzaradan, pangulu to ma’kampa nasolanni lako Babel.

Apa iatu mintu’ to makario-rio dio mai to Yehuda tu tae’ apa naampui, napatorro Nebuzaradan, pangulu to ma’kampa dio tana Yehuda, sia naben ba’tu pira-pira pa’lak anggoro’ sia pa’pa’lakan tu tau iato mai.

Apa iatu diona Yeremia, mangkamo napa’parentan Nebukadnezar, datu Babel, lako Nebuzaradan, pangulu to ma’kampa, nakua:

Alai mukampai meloi, da musussai lenni lako, sangadinna apa tu napokada, paturu’i bangi.

Iamoto napesuammi Nebuzaradan, pangulu to ma’kampa sia Nebusyazban, tu pangulu sandan uai sia Nergal-Sarezer, to maraa, sia mintu’ pangulu pa’baraninna datu Babel,

nasuami tu tau male unnala Yeremia dio mai tarampak pa’kampan, anna sorongi lako Gedalya, anakna Ahikam, anakna Safan, naeloranni umba-umba tu naporai. Susimoto natorro tu Yeremia dio lu to’ to buda.

Denpa tu kadanNa PUANG sae lako Yeremia, tonna dipattangpa dio tarampak pa’kampan, Nakua:

Malemoko, pokadai te lako Ebed-Melekh, to Etiopia: Inde sia tu kadanNa PUANGna mintu’ ma’dandan maritik, Kapenombanna to Israel: Manassa la Kupopembuamo tu mintu’ kadangKu lako kota iate tu la napokadakena, tangia la napomelona sia allo iate la mutiro.

Apa allo ia dukato la Kurampanangko, kadanNa PUANG, sia tae’ mula disorong tama limanna mintu’ to mukataku’.

Manassa la Kurampanangko, da ammu mate nakande pa’dang, sangadinna iatu pangrampamu iamo deatammu, belanna muposande’Na’, kadanNa PUANG.