Yeremia 46

Inde sia tu kada sae lako nabi Yeremia, iamotu kadanNa PUANG, diona bangsa kapere’.

Diona tondok Mesir. Diona kataloanna surodadunna Firaun Nekho, datu Mesir, tu dio lu randan salu Efrat, sikandappi’ Karkemis, tu mangka natalo Nebukadnezar, datu Babel, tonna taun ma’penna’pa’ kadatuanna Yoyakim, anakna Yosia, datu to Yehuda.

Parandanni tu balulang sia balulang kalando, ammi tama tananan ra’!

Pariu’imi tu darang, messakemokomi, e mintu’ pakkanarang, ma’pampangangkomi, ma’songko’ bassi, pematadi’imi tu mata dokemi, ammi ma’bayu kararran!

Ma’apai angku tiroi tu tau iato tiramban sia sorong boko’? Iatu mai pa’baraninna ditalomo anna tarru’ liu mallai tang messaile len: dadimi tu katirambanan tiku lao! kadanNa PUANG.

Iatu to matippa’ tang pakala umpallaian kalena sia to lalong tae’ duka natilendok: daanna lu dio randan salu Efrat titodo tu tau iato mai anna tibambang.

Mindara ia tu saba’ susi salu Nil sia mongngo’ susi salu darra’?

Iatu to Mesir saba’mo susi salu Nil sia mongngo’ susi salu darra’, nakua: la ke’de’mo ussitutu’i te lino sia la kusanggang tu mintu’ tondok sia to umpa’tondokki.

Palakomi, e darang: patikaranni, e kareta; la tassu’mokomi e mintu’ to lalong: To Etiopia sia to Put ma’balulang sia mintu’ to Lidia ma’binting pana.

Iamote tu alloNa PUANGna mintu’ ma’dandan maritik, iamo allo pa’pakkan la umpabala’i kakadakeanna mintu’ ualinNa. Iamoto nasamosona tu kandean pa’dang sia malango napobua’ rarana tu tau iato mai, belanna Napogau’mo Puang, iamo PUANGna mintu’ ma’dandan maritik, tu misa’ pemala’ pangrere’ daana lu padang dio randan salu Efrat.

Maleko lako Gilead, alanni gommo’ pedampi tu kalemu, e anak dara, anakna datu baine Mesir; tae’ gai’mu umpebudai pedampi, belanna tae’ mula mondo.

Iatu kamatunammu narangimo mintu’ bangsa, sia naponnoimo sarromu te lino, belanna sititodo-todoammo tu mai to lalong, napada tibambang.

Inde sia tu kada Napokada PUANG lako nabi Yeremia tu diona kasaeanna Nebukadnezar, datu Babel, la untalo tondok Mesir.

Pa’peissananni lan lu mintu’ Mesir, patale’i dio Migdol, sia patale’ dukai dio Memfis sia Tahpanhes, kumua: ma’pampangangko ammu tumanan, belanna kumandemo tu pa’dang tiku lao.

Ma’apari anna dibambanganra tu lalongmu, sia anna tang tumananra? Belanna PUANG unnula’i natibambang.

Buda tu mai tau titodo anna tibambang sii’pin-i’pinan, naurungan ma’kada nakua: Maikomi tasule lako bangsata sia lako tondok kadadianta, naruaki’ manii kandean pa’dang masang tongan.

Sangaimi tu Firaun, datu Mesir: To ma’pamaramba, tu umpopa’elo’na bangi lendu’ tu attu melo.

La lelukraka tuoKu, kadanNa Datu, tu diganti PUANGna mintu’ ma’dandan maritik, kumua: Susitu buntu Tabor dio lu mintu’ buntu sia buntu Karmel dio randan tasik, susimo kasaeanna to.

Ma’parandanko, belanna la dipali’ko, e to ma’tondok, e anakna baine Mesir, belanna la mempadang lo’bang tu Memfis sia la disanggang, naurungan moi misa’ tau tae’mo la torro lan.

Iatu Mesir butung to anak sapi me’lok, apa narampoi tambolik lu daa mai.

Sia mintu’ surodadu disaroi dio lu tau iato mai susitu anak sapi maloppok, apa tau iato mai memboko’, anna mallai sola nasang sia tang naatta tumanan, belanna narampoimo allo kamandasanna, iamotu allo kadiukunganna.

Iatu gamaranna susi garesena ula’ mendonglo’, tarru’ lako tete dio kamatotoranna sia tau iato mai sae umpellambi’i sitangke uase susito manglelleng kayu.

Iatu tau iato mai ullelleng pangala’na, kadanNa PUANG, belanna tang dikanassa melo bilanganna, sia mandu losong anna batik, tang dikemba’ diia’.

Iatu anak dara Mesir matunamo, mangkamo disorong tama limanna tau lu daa mai.

Iatu PUANGna mintu’ ma’dandan maritik, Kapenombanna to Israel, ma’kada Nakua: Manassa la Kuukung tu Amon dio Tebe sia Firaun sia tondok Mesir sia iatu mai deatanna sia iatu mai datunna, sia la Kuukung tu Firaun sia iatu mai to urrannuanni.

Sia la Kusorong tu tau iato mai tama limanna mintu’ to undaka’ lalan la umpatei, iamotu tama limanna Nebukadnezar, datu Babel, sia tama limanna taunna. Apa undinnato marampa’mi sule tu tondokna susito dolona, kadanNa PUANG.

Da mumataku’, e taungKu Yakub, sia da mutiramban, e Israel, belanna manassa la Kurampanangko dio mai tondok mambela, sia iatu bati’mu dio mai tondok dinii umpali’ko; la sulemo tu Yakub anna torro marampa’ sia manaman, na moi misa’ tau tae’ umpatirambanni.

Da mumataku’, e taungKu Yakub, kadanNa PUANG, belanna Kurondongko sia la Kusabu’i tarru’ tu mintu’ bangsa, Kunii untale’ko, apa iko tae’ Kula ussabu’i tarru’ko, sangadinna la Kupa’dikkiko sitinayanna, moi natae’ Kuelorangko tang diukung.