Yeremia 48

Diona Moab. Inde sia tu kadanNa PUANGna mintu’ ma’dandan maritik, Kapenombanna to Israel: A’a dikka’ tu Nebo, belanna disanggangmo; matunamo tu Kiryataim sia ditalomo’; iatu tambakuku malangka’ matunamo sia tiramban.

Tae’mo tu kadipudianna Moab; nasitangnga’imo tau dio Hesbon la nakadakei, nakua: Maimokomi tasabu’i, naurunganni rato tu bangsa iato! Na iko duka, Madmen, la disanggangmoko, na kandean pa’dang la ullolaiko.

Perangii tu pelallak dio mai Horonaim, den kasanggangan sia kamangsanan kapua.

Sanggang nasangmo tu Moab, anna iatu pelallakna to bongkona dirangimo.

Marassan tumangi’ tu tau unteka’i se’pon buntu Luhit sia diong lombok Horonaim dirangi dukamo pelallakna tu to kapussakan.

Mallaikomi, lendokanni tu katuoammi, anna dadi susi kayu anak tang mendaun lan padang pangallaran.

Belanna murannuan tu panggaragammu sia iananmu, iamoto narampako ualimmu, sia iatu Kamos la male pada dipali’, mintu’ to minaanna sia mintu’ arungna.

Sia la den misa’ pa’kasanggang sae tama mintu’ kota, naurunganni moi misa’ kota tae’ len tilendok na iatu lombok la sanggangmo, na iatu padang lappa’ la mangsanmo, susimo kadanNa PUANG.

Pani’i tu Moab, anna tassu’ male mentia’, sia iatu mai kotana la mempadang lo’bang, naurunganni moi misa’ tae’mo tau torro lan.

Tampakan ropu tu to langga’ umpogau’ pengkaranganNa PUANG; sia sapuan pala’ tu to umpadapa pa’dangna dio mai to’doan rara.

Tempon manguranna tu Moab torro manaman; mari’pi bang daona lu mentainna tae’ len naditua’ lan mai busso misa’ lako busso senga’, sia tae’ lenpa nadipali’; iamoto natontong bang tu mammi’na sia tae’ namembali tu busarungngu’na.

Iamoto manassa la sae tu allona, kadanNa PUANG, ke Kusuai tu ba’tu pira-pira to mantua’ lako kalena la untuaranni, iamo la umpalo’bangi tu mintu’ bussona sia la untessei tu mintu’ sere’na.

Attu iato iatu Moab la masiri’, buntu tumangna Kamos, susito Israel masiri’ buntu tumangna Betel pa’rannuananna.

Umba la mikua ma’kada kumua: Kami te to lalong, mintu’kanni to parari sa’ga’!

Sanggangmo tu Moab sia iatu mai tondokna sia mintu’ to mangura pa’tonno’na solo’mo la ditunu, kadanNa Datu, tu diganti PUANGna mintu’ ma’dandan maritik.

Iatu kasangganganna Moab mentireke’mo na iatu kamandasanna mandu madoi’mo.

La mibatingi, e kamu to untikui, sia kamu tu to untandaimi sanganna, la mikua: A’a umba nakua anna le’tomo tu tekken kakuasan, iamotu tekken kamala’biran.

Mengkalaomoko dao mai inan kamala’birammu, ammu unno’ko’ diong lu to’ rumpang, e pa’tondokan, e anak dara Dibon, belanna iatu pa’kasangganganna Moab ke’de’mo la ullaoiko na iamo la urro’pokki tu mintu’ tambakukummu.

Bendanko dio biring lalan sia tiro-tiroi, e baine torro lan Aroër; kutanai tu muane mallai sia iatu baine tilendok, kumua: Apamora tu mangka dadi?

Matunamo tu Moab, belanna talomo; unnurruk-urruk sia melallakkomi; pa’peissananni lako Arnon, kumua sanggangmo tu Moab.

Sia narampoimo ukungan tu padang marante, iamotu Holon, Yahas, Mefaat.

Dibon, Nebo, Bet-Diblataim.

Kiryataim, Bet-Gamul, Bet-Meon,

Keriot, Bozra, sia mintu’ kota dio tana Moab, tu mambelanna sia mandappi’na.

Iatu tandukna Moab dita’takkimo sia le’tomo tu takia’na, kadanNa PUANG.

Pamalangoi, belanna napatarompo’ tu kalena lako PUANG, anna tipessambak rokko luana tu Moab, sia ditelle-telle duka.

Tang mutelle-telleraka tu to Israel; dikabu’tuiraka sola to boko, muurunganni unniling-iling, ke mulambi’ kadaoi tu diona a’ganna?

Tampei tu mintu’ kota, ammi torro lan buntu batu, e to Moab, sia la susikomi bu’ku’ ala’ tu unggaragai serangna dio tondon aa’.

Tarangimo tu kamadongngaranna Moab – kumua matampo maro’ ia –, sia diona kamatampoanna sia kamadongngaranna sia karombosanna sia kamadaoanna penaanna.

Kuissanmo, kadanNa PUANG, tu kamatampoanna sia kada tang ke battuanna; napogau’ bang tu tang sipato’na.

Iamoto angku unnangle-angle diona Moab, ondongpi melallak-lallak diona mintu’ lili’na Moab sia sumarro diona mintu’ to Kir-Heres.

La kutangi’iko, e garonto’ anggoro’ Sibma ondong na iatu tangi’na Yaezer; iatu tangkemu membalaba’ tama tasik sia rampo lako Yaezer; iatu pa’rampunanna mintu’ buammu sia peanggoro’mu nalaoi pa’kasanggang.

Na iatu kasendean sia la’tek pa’demo lan mai to’ pa’lak sia dio mai padang Moab, sia Kupatadang tu uai anggoro’ lan mai panglulluranna; Iatu to manglullu’ bua anggoro’ tae’mo unnarrak-arrak, iatu arrak tangiamo arrak.

Iatu tau dio mai Hesbon unnurruk-urruk, iamoto namelallak tau sae lako Eleale, ondong pissan rampo lako Yahas, sia dio mai Zoar sae lako Horonaim sia Eglat-Selisia; belanna moi na iatu to’ uai Nimrim mempadang lo’bangmo.

Nakua kadanNa PUANG, la Kuputtai lan Moab tu mintu’ to male langngan inan madao sia memala’ lako deatanna.

Iamoto natumangi’ tu penaangku diona Moab susi suling to umbating, ondongpi tumangi’ tu penaangku diona to Kir-Heres susi suling to umbating, belanna iatu pangnanna torronapa, pa’demo.

Belanna iatu mintu’ ulu digalettungi, sia mintu’ danggo’ diku’ku’i, sia mintu’ lima ditori’-tori’ sia mintu’ aak ma’karung.

Dao mintu’ bubungan banua Moab sia lan lu mintu’ pasa’na sisumarroan tu mai tau, belanna Kusanggangmo tu Moab susi pareanan litak, tu tang naporaimo tau, kadanNa PUANG.

A’a lendu’ ia masolangna tu Moab, a’a umba nakuan namemboko’! Matunamo tu Moab sia dadimo misa’ apa ditelle sia megiangan lako mintu’ to untikui.

Belanna nakua kadanNa PUANG: Tonganna la sae mettia’ susi langkan maega sia umballa’ pani’na daona lu Moab.

Mintu’ kota ditalo sia mintu’ tambakuku diala; allo iato iatu penaanna mintu’ to lalong lan Moab susi penaanna misa’ baine mangurria’.

Na iatu Moab disanggang, naurunganni tae’mo nadadi misa’ bangsa, belanna umpatarompo’ kalena lako PUANG.

Iatu ma’patirambanna sia patuang sia poya la urrampoiko, e to lan Moab, kadanNa PUANG.

Minda-minda lussu’ dio mai ma’patirambanna, iamo la tobang rokko patuang, sia minda-minda tu ma’din kendek diongmai patuang, iamo la naala poya, belanna Aku te la umparampoi lako kalena, iamotu lako Moab tu taun kadiukunganna, kadanNa PUANG.

Bendan tu to mallai umpopentilindungan Hesbon, apa tae’ tu kamatotoranna; belanna tassu’mo tu api lan mai Hesbon sia dukku api lan mai banuanna Sihon, iamotu umpurai pili’na Moab nakande sia kararo ulunna to rombo’.

A’a mandasako Moab! Sanggangmo tu taunna Kamos, belanna mintu’ anakmu muane malemo dipali’ sia iatu anakmu baine malemo dirampa.

Apa allo ma’katampakanna la Kupopembali tu toto’na Moab, kadanNa PUANG. Rampo indete dinii ussa’bu’i tu ukunganna Moab.