Yesaya 16

Melo ke napa’peai to ma’parenta tu anak domba dio mai to’ buntu batu unnola padang aak tarru’ lako buntu anak dara Sion.

La den attu anna iatu mai anak dara Moab la torro dio kalambanan Arnon, sangtinti to manuk-manuk kaguririk-ririk, susito serang manuk-manuk tisea’-sea’.

Pabu’tui tu tangnga’ maelo, pa’benni tu kada mata’tak; pemakambanni tu onganmu ketangngai allo, susi ke mabongii; bunii tu to diula’, da mupa’peturoanni tu to mallai.

Melo ke mupakendekki banuammu tu mintu’ to Moab mallai, la napopentirerungangko dio mai mintu’ to pasanggangan. Iake purami tu to ma’pakario-rio, upu’mo tu kasanggangan, pa’demi lan mai tondok tu to pasanggangan,

la dipabendan tana’ misa’ isungan kapayungan diparandanganni kamasokanan, anna dao to lan tendana Daud la nanii unnisung situang kamarurusan misa’ to la mangra’ta’ sia untuntun katonganan, tu matira’ umpogau’ sanda salunna.

Kirangimo tu kamadaoan penaanna to Moab, kumua matampo maro’ ia, sia kamatampoanna sia kamadoanna penaanna sia kamasa’garanna sia kada tang kebattuanna.

Iamoto anna tangi’i to Moab tu diona Moab, la sitangiran sola nasang; siangleankomi belanna sisayurammo deppa bua anggoro’na Kir-Hareset, tu kamunna to disabu’imo.

Belanna mintu’ tananan dio Hesbon marangkemo: iamotu mintu’ kayu anggoro’na Sibma tu napasiapanammo mintu’ to ma’parentana bangsa iato mai tu bua melona, iatu mai tangkena sae lako Yaezer, kumpang lako padang aak, iatu mai takke’-takke’na mendolok tama tasik.

Iamoto angku tumangi’ untangi’i Yaezer sola garonto’ anggoro’ Sibma; kupato’doiko uai matangku, e Hesbon sola Eleale, belanna nalambi’mo arrak rari tu to mangliu bua kayummu sia to mebua anggoro’mu.

Mintu’ kasendean sia arrak pa’demo lan mai to’ pa’lak sia tae’mo tau mela’tek ba’tu unnarrak lan pa’lak anggoro’; tae’mo anna parrai tu anggoro’ lan to’ pa’parranna; Kupapu’du’mo tu la’tek silelean.

Iamoto anna ma’rundede tu penaangku susi oni katapi diona Moab sia ba’tengku lan diona Kir-Heres.

Belanna iake saei tu Moab, sia tang mengkata’ka’ dao inan madao, anna sae tama inan maindanna la mangimbo, tae’ duka naappa’i tu lalan penaanna.

Iamote tu kada masaimo Napokada PUANG tu diona Moab.

Apa totemo nakua tu kadanNa PUANG: Tallung taunpi, susitu taun to sumaro, anna mintu’ kamala’biranna Moab membali kamatunan sola mintu’ kamapuluranna; iatu torronapa la sidi’ sia la bitti’ sia tang keangga’.