Yesaya 36
Iatonna taun ma’pessangpulo a’pa’na kadatuanna Hizkia, saemi tu Sanherib, datu Asyur, urrarii mintu’ tambakukunna Yehuda anna taloi.
Nasuami datu Asyur tu kolonel dio mai Lakhis lako Yerusalem umpangului buda surodadu la ullaoi datu Hizkia, anna torro tu tau iato mai sikandappi’ saruran limbong tu iringna dao, dio lalan ma’palulakona padang pamusoran sampin bulu domba.
Tassu’mi tu Elyakim, anakna Hilkia, pangulu sandan uainna datu sia Sebna pangulu to massura’, sia Yoab, anakna Asaf, pa’paelean.
Ma’kadami tu kolonel lako tau iato mai nakua: Pokadanni Hizkia, kumua: Nakua kadanna datu kapua, iamotu datu Asyur: Apa toda iatu kapa’rannuanammi?
Misangaraka, kumua puduk bangri la dipokamanarangan sia la dipomatoto’ parari! Mindara miporannuan, ammi balira’?
Manassa mirannuan tu tekken bulo le’to, iamotu Mesir, anna minda-minda undemme’i, la natossok tu limanna, anna tarru’i; susimoto tu Firaun, datu Mesir, lako mintu’ tu to urrannuanni.
Apa iake mikua lako kaleku, kumua: Urrannuangkan PUANG, Kapenombangki – tangiaraka Iatu mangka napa’dei Hizkia mintu’ buttu-buttunNa sia inan pemalaranNa, anna ma’kada lako to Yehuda sia mintu’ issinna Yerusalem, nakua: La tukkukomi menomba dio tingayo inan pemalaran iate?
Totemo melo ke sitangga’komi puangku, datu Asyur, angku benkomi darang duangsa’bu, ke mibela dukai umpadenni tu tau la ussakei.
Umba mikua la umbelai sitingoan sala umbanna misa’i tu to maraya, moi iatu tau madionganna puangku? Apa ma’rannuan lakokomi Mesir belanna mintu’ kareta parari sia mintu’ pakkanarang.
Iamoto tang pangelorannaraka PUANG angku sae ullaoi te tondok sia ussanggangi? PUANGmo tu mangka ma’kada lako kaleku Nakua: Malemoko ullaoi tu tondok iato sia ussanggangi.
Nakuami tu Elyakim sia Sebna sia Yoah lako kolonel: Melo ke ma’basa Aramkomi umpa’kadaikanni, belanna kitandai sia; ke ma’dinni da nama’basa Yehuda tu puang ma’kada lako kaleki dio pa’peranginna mintu’ to buda, tu dao tembo’ benteng.
Nakuami kolonel: Nasuara’ka puangku umparampoi te mintu’ kada iate lako puangmi sia lako kalemi? Tang lakoraka tu mintu’ to dao tembo’ benteng la dinii umparampoi, tu la misisolan ungkande tainna sia unniru’ tenena?
Tassu’mi tu kolonel nabendan dio tingayona to buda anna metamba-tamba umpekapuai gamaranna ma’basa Yehuda, nakua: Perangiimi tu kadanna datu kapua, iamotu datu Asyur.
Inde sia tu kadanna datu iato: Da napakenakomi Hizkia, belanna tae’ nabelai ullendokangkomi.
Sia da nanarankomi Hizkia la urrannuan PUANG, kumua: Manassa PUANG la ullendokangki’ sia iate kota tang la disorongan datu Asyur.
Da miperangii tu kadanna Hizkia, belanna nakua kadanna datu Asyur: Menombakomi sia ussorongkomi kalemi lako kaleku, ammi pantan ungkandei tu bua anggoro’mi sia bua arami sia pantan unniru’ uai lan mai bubunmi.
Sae lako kasaeangku umpalelekomi lako misa’ padang tu susi padangmi, iamotu misa’ padang sebo gandungna sia uai anggoro’ ba’ru, misa’ padang sebo rotinna sia pa’lak anggoro’na.
Da napapusakomi Hizkia, tu nakua: PUANG la ullendokangki’! Denraka tu deatanna mintu’ bangsa ungkullei ullendokan padangna dio mai kuasanna datu Asyur?
Umbamira tu deatanna Hamat sia Arpad, umbamira tu deatanna Sefarwaim? Nakulleraka ullendokan Samaria dio mai kuasangku?
Mindara tu deatanna mintu’ tondok iato tu ungkullei ullendokan tondokna lan mai kuasangku, anNa la PUANG ungkullei ullendokan Yerusalem lan mai kuasangku?
Apa tau iato mai kappa bang, moi sangbuku kada tae’ napebalii, belanna nakua kadanna datu lako tau iato mai: Da mibali lenni.
Saemi tu Elyakim anakna Hilkia pangulu sandan uainna datu, sia Sebna pangulu to massura’, sia Yoah, anakna Asaf, pa’paelean, usserek-serek tamangkalena umpennoloi Hizkia, anna parampoi lako datu tu mintu’ kadanna kolonel iato.