Yesaya 41
Kappakomi miperangiiNa’, e mintu’ biring tasik, sia la umba’rui kamatotoranna tu mintu’ bangsa; melo ke saei tu tau iato mai anna ma’kada; melo ke pada-padaki’ tama pa’paolaian salu.
Mindara umpabu’tui dio mai matallo tu to sitammu kapataloan lan mintu’ kalingkanna? Mindara ussorongi lako kalena tu mai bangsa sia umbenni kuasa umpatundukki tu mai datu, pa’dangna umpopembarra’-barra’i tu tau iato mai, sia panana umpopennongkanni nasarombonan angin?
Naula’mi tu tau iato mai, natarru’ marampa’ sia lako lalan, tu tae’ lenpa nalesei.
Mindara umpadenni sia umpogau’i tu iannate? Iamotu Puang tu untambai mintu’ osso’ tempon dio mai. Akumote tu PUANG, tu tipamulanna, na iatu ma’katampakanna. Aku duka bangsia.
Iatu mintu’ biring tasik mataku’ untiroi tu iannato; mintu’ randan langi’ ma’parondo, anna pada sae mengkareke’.
Pada situnduanni anna ma’kada lako solana, nakua: Pabatta’i tu penaammu.
Iatu pande bassi umpabatta’ pande bulaan; iatu to ma’pa’tong ma’pamanipi’ umpabatta’ to ma’tampa dao landasan, anna ma’kada diona tu pa’pi’da’, nakua: melomo te! Anna pakui lako inanna da natibendon.
Apa iko, e Israel, taungKu, e Yakub, tu mangka Kupilei langsa’, bati’na Abraham, sangmaneKu.
Tu Kuala dio mai randan langi’ sia Kutambai dio mai lelean uran, angKu kuai lako: Ikomo taungKu, ikomo tu Kupilei langsa’ sia tae’ Kusa’biangangko.
Da mumataku’, belanna Kurondongko; da mumagiang mentiro tiku lao, belanna Akumo tu Kapenombammu, Kupamatoto’ko sia Kutundui dukako, sia Kusande’ dukako lima kananKu tu umpaden kasalamaran.
Tiroi, la kasirisan sia matuna tu mintu’ to re’dek ara’na lako kalemu; la sangtinti to apa tae’ sia la sanggang tu mai tau musirarian.
La mudaka’, apa tae’ ammu kabu’tui tu mai to ullaoiko; la sangtinti to apa tae’ sia la pisan tu to musirarian.
Belanna Akumo tu PUANG, Kapenombammu untoe lima kananmu; tu ma’kada mati’ kumua: da mumataku’, Aku untunduiko.
Da mumataku’, e Yakub pada ulli’, e Israel bangsa bitti’! Akumote tu untunduiko, kadanNa PUANG, na iatu Pela’bakmu iamo To maserona Israel.
Tiroi, Kupadadiko panglulluran mataran sia ba’ru, sia mataran patomali; la mulullu’ tu buntu anna manisak sia la mupopendadi ta’pian tu tanete.
La muta’pii, anna baai angin sia napentiaran bara’; apa iatu iko la kumalasi belanna PUANG sia massattuan belanna To maserona Israel.
Iatu to mandasa sia to mase-mase, undaka’ uai, apa tae’, marakkekmo tu lilana ma’rang; Akumo tu PUANG, la untananni talinga tu tau iato mai; Akumo Kapenombanna Israel, tae’ angKu la untampe lenni tu tau iato mai.
La Kupabu’tu tu salu dao tanete karing, sia la Kupaden tu mata uai diong lu lombok; la Kupopellimbong tu padang aak sia la Kupopengkalimbuang tu padang rangke.
La Kupaden dio lu padang aak tu kayu arasi’ sia kayu simmin sia kayu murdu’ sia kayu saitun; la Kupasitanan kayu sapuko tu darda’ sia kayu buangin dio lu padang talo.
Dikua anna tiroi sia nakatappa’i anna kilalai situang kapaissananna tau iato mai, kumua limanNa PUANG umpogau’i sia To maserona Israel umpadadii.
Parampoi tu kara-karami, kadanNa PUANG; baai tu tanda katonganammi, susimo kadanNa Datunna Yakub.
Melo ke saei umparampoi sia umpokadangkan tu apa la dadi. Pa’peissananni, umba nakua tu apa dolo, angki palan ara’i sia angki issanni tu ma’katampakanna. Ba’tu parangiikanni tu apa la dadi;
pokadai apa tu la sae undinna, angki issanni, kumua kamumo deata. Pogau’mi tu apa melo, ba’tu kadake, angki pada mangnga sitiro situang kamatakuran.
Tiromi, iatu kamu samammi tae’, sia tang kebattuan tu pengkarangammi; dikagalli minda-minda tu umpengkaolaikomi.
Umpake’de’Na’ misa’ tau daa mai ulunna salu, anna saemo, lu dio mai kadellekan allo tu misa’ tau ussa’bu’ sangangKu; nalullu’ tu arung susi losso’, ten to tumampa kurin ullullu’ pitti’.
Mindara umpa’peissananni tipamulanna, angki issanni? Sia mindara umpa’peissananni dolona, kiurunganni la ma’kada kumua: Tongannamo tu napokada? Tae’, moi misa’ tau tae’ umpokadai, moi misa’ tau tae’ umpa’perangianni, moi misa’ tau tae’ urrangii tu kadammi.
Akumo bunga’na (umpokadanni) Sion kumua: Tiromi, iamora te! – sia Kusuamo lako Yerusalem tu misa’ to umbaa kareba kaparannuan.
Mentiro tikuNa’ lao, apa tae’ misa’ Kutiro; iangKu tiroi lako, tae’ misa’ tu Kunii unnappa’ pa’timbangan, tu la Kukutanai, kumua anna pebaliiNa’.
Tau iato mai susi bang to apa tae’, sia mintu’ penggauranna tang kebattuan; mintu’ rapang-rapang dipodeata dipati’no’ angin bangri sia tae’ gai’na.