Yesaya 45
Inde sia tu kadanNa PUANG lako Koresh tu mangkamo Natokko; Kutoe tu lima kananna, angKu pemparrakanni tu mai bangsa dio olona sia Kuko’ka’i tu se’ ayakna datu-datu; la Kubungkaran ba’ba naurungan tae’ tu mai babangan la tisalli’.
Aku Kalena tu la undoloangko sia la urrantei tu mai lalan ma’buntu-buntu; mintu’ ba’ba’ tambaga la kutesse-tesse sia mintu’ salli’ bassi la Kurebong-rebong.
La Kukamaseiko ianan dio lu to’ malillinna sia barang apa dio to’ kabunianna, ammu issanni, kumua Akumote tu PUANG, tu mangka untambaiko sangammu, iamotu Kapenombanna to Israel.
Tu tete dio Yakub taungKu sia Israel, to Kupilei langsa’, angKu tambai tu sangammu sia angKu benko pa’gantianammu, moi ammu tang untandaiPa’.
Akumo tu PUANG, tae’ senga’na, nasaliananna Aku, tae’ tu Kapenomban senga’. Mangkamo Kutambeke’i tu ayakmu, moi ammu tang untandaiPa’.
Anna issanni tau randuk dio mai kabu’tuan allo landa’ lako kabotoan kulla’, kumua saliananna Aku tae’ tu pekapuangan senga’; Akumo tu PUANG, tae’ senga’na,
tu umpadadi masiang sia ungkombong malillin, tu untannun kamakarimmanan sia umpabu’tu kamandasan, Akumo tu PUANG, tu umpaden nasangi te mintu’na te.
Tumarantankomi, e langi’, sia e mintu’ salebu’, patibolloi tu uran kamaloloan; la tikillang tu lipu daenan, anna tuo tu kasalamaran, sia pada napopellolo kamaloloan; Akumo, tu PUANG, tu umpaden nasangi te.
Upu’ allona tu to sisarangnga’ To tumampana, susi bangri to misa’ bibang dio lu to’ bibang. Ma’apari nala ma’kada tu pitti’ lako to ma’tampa, kumua: Apara mutampa? ba’tu nakua tu panggaragammu: Tae’ nakelima?
Upu’ allona tu to nakua lako misa’ ambe’ kumua: Apara mipadadi? Ba’tu lako misa’ indo’: Apara mipangurriasan?
Nakua kadanNa PUANG, To maserona Israel sia To tumampana kumua: Pekutananni lako Kaleku tu apa la bu’tu undinna; sorongi lako Kaleku diona tu mai a’ganna anakKu sia diona penggaurangKu.
Akumo tu umpadadi lino sia ungkombong tolino tu untongkonni dao; limangKumo umpalumbang mintu’ langi’ sia Aku dukamo umparentai tu mintu’ ma’dandan maritik dao.
Akumo tu unnangka’i tete dio kamaloloan sia la Kurantean tu mintu’ lalanna; anna iamo la umbangunni sule tu kotaKu sia urrampananni tu mintu’ taungKu tu dirampa, moi anna tae’ napalaoi doi’ ba’tu pamengan tu tau iato mai, kadanNa PUANGna mintu’ ma’dandan maritik.
Nakua kadanNa PUANG: Iatu bunga rangka’na to Mesir, sia balukanna to Etiopia – to Syeba, to kalando kapua, la sae lako kalemu ammu potaui; la undiko narundu’ tau iato mai; tau iato mai la sae situang pungo anna tukku menomba dio tingayomu sia mengkamoya nakua: Kamu mannari tu Narondong Puang Matua tae’ senga’na, tae’ tu Kapenomban senga’.
Manassa Kamumo tu Kapenomban mentilindung; Kamumo tu Kapenombanna to Israel sia Pela’bak.
La kasirisan sia la matuna sia male mala’ba-la’ba tu mintu’ to unggaraga rapang-rapang dipodeata.
Apa iatu to Israel la Nala’bak PUANG pela’bak matontongan; tae’ ammi la kasirisan sia matuna tontong sae lakona.
Belanna nakua kadanNa PUANG, tu mangka umpadadi mintu’ langi’ iamotu Puang Matua – tu ungkombong lino sia umpadadii, Naparandanganni; tangia kumua la Napatangtibori’i, sangadinna Nakombong la ditorroi: Akumo PUANG, tae’ senga’na.
Tae’ lenpa Kuma’kada lan kabunianna ba’tu lan inan dio lu padang mapittuk; sia tae’ lenpa Kuma’kada lako bati’na Yakub, kumua: Daka’-daka’ bangNa’; Akumo tu PUANG, umpokada apa tongan, umpa’peissanan apa malambu’.
Sipulungkomi ammi pada sae mengkareke’, e kamu tu tilendokmo dio mai ma’rupa-rupa bangsa. Tae’ tangnga’na tu tau iato mai tu umbaa rapang-rapang dipodeata kayu anna penombai tu deata tang nakulle patunduan.
Pa’peissananni sia pokadai tu tanda sa’bimmi, sitimbangi sola nasang. Mindara tu umpa’perangianni dolona sia umpa’peissananni te masaimo? Tae’raka na Aku te, tu PUANG, sia tae’ tu Puang Matua senga’, sangadinna Aku manna, tae’ tu Kapenomban malambu’ sia mangla’bak, sangadinna Aku.
Lu maikomi Kaleku, ammi makarimman, e mintu’ randan langi’, belanna Akumo tu Puang Matua tae’ senga’na.
Belanna mangkaMo’ umposumpa Kaleku, na iatu sunnamo dio randan pudukKu, tonganna, moi sangbuku kada tae’ Kuriu’ sule, kumua: mintu’ guntu’ la malinguntu’ lako Kaleku sia mintu’ lila la umposumpaNa’.
Iatu diona Aku la nakua tau umpokadaNa’: Dio manna PUANG tu kamaloloan sia kamatotoran; saemo tu mai tau lako, apa la kasirisan tu mintu’ to mare’dek ara’na lako Kalena.
Lan PUANG dinii ussanda-tonganni sia la nanii massattuan tu mintu’ bati’na Israel.