Yesaya 47

Mengkalaoko ammu unno’ko’ diong to’ barra’-barra’, e lolosu kandaurena anak dara Babel. Diongko padang unno’ko’ tang ma’isungan, e anak dara Kasdim, belanna tae’mo anna la ussangako tau baine dipamo’le’ sia dipasolle’.

Alai tu pangrissoan, ammu ma’ta’pung, lendokanni tu lullungmu ammu ma’kamandi’, ma’kalili’ko sae langngan pupummu, ammu lamban salu.

La dikambelangi tu kalemu sia la kakitanan tu kasirisammu. La ma’papakkanniNa’ na moi misa’ tau tae’ Kukatirinnai.

Iatu sanganna Pela’bakta, iamo PUANGna mintu’ ma’dandan maritik. To maserona to Israel.

Kappako ma’dokko, tamako inan mapattang, e anak dara Kasdim, belanna tae’mo nala unggente’ko tau datu baine undatui mintu’ kadatuan.

Re’dek tu ara’Ku lako taungKu sia Kuruttakki tu to Kupomana’, angKu sorongi tama limammu, apa tae’ ammu katirinnai tu tau iato mai; moi na iatu mai to matua mupabokkokki duka pamaan magasa.

Mukua: La ma’parentana’ tontong sae lakona, apa tae’ ammu palanni penaammu te iannate sia tae’ mukapangi kumua la susi ma’katampakanna to.

Na totemo perangii te, e iko to passolle’, tu tuo manaman, ammu ma’kada lan penaammu susite, kumua: Aku mannari, tae’ to senga’ umpadanna’; inang tae’ angku la balu, ba’tu untandai tu kasisayuran anak.

Na iate apa iate da’dua tae’ mukapangi anna dadi lako kalemu, lan sangallori; iamotu kasisayuran anak sia kabaluan; mintu’na la ganna’ tongan urruako, moi anna buda pa’balik matammu sia pa’basa-basamu.

Apa urrannuangko kakadakeammu, mukua: Tae’ misa’ tau untirona’. Kamatarrusammu sia kapaissanammu umpapusako, muurunganni ma’kada lan penaammu susite, kumua: Aku mannari, tae’ to senga’ umpadanna’.

Iamoto annala urrampoiko kamaparrisan tu tang mubela untumpui pa’basa-basa; sia la naruako kasanggangan, tu tang mukulle untulakki pesuru’; sia ta’pa la narampoiko kamangsanan tu tang mukapang kasaeanna.

Tontongko umpogau’i tu pa’basa-basamu sia kabudanna pa’balik matammu tu mupa’boyo’-boyo’i tempon dio mai bitti’mu, den sia manii gai’na lako kalemu, la umpatiramban deata masusu’.

Iake boyo’moko ma’timbang-timbang, melo ke ke’de’i totemo anna rampanangko tu mintu’ to umpelalan bintoen sia tu to umparessa a’ganna bintoen, sia umpokadai tu apa la urrampoiko ke bulanoi.

Manassa iatu tau iato mai la susito dalame nakande api naurunganni tae’ nakullei urrampanan kalena dio mai api ma’laka-laka, belanna iatu api iato tangia ruaya la dipendarang sia tangia api la direke’ unno’ko’.

Susimo gai’na lako kalemu to tu mintu’ to mupa’boyo’-boyo’i sia musipa’balilian tempon dio mai bitti’mu; pada tang ma’rundunanmo tu lalan naolai male; moi misa’ tae’ tu pakulle untunduiko.