Yesaya 53
Mindamora umpatonganni tu mangkannamo kirangi, sia mindamora dinii umpaombo’i tu takia’Na PUANG?
Belanna tuomo dio oloNa Puang susi taruk mangura, sia susito uaka’ mentaruk dio to’ padang rangke, tae’ namelo sia mala’bi’ rupanna, anta la untiroi, ba’tu pa’kaleanna anta la ungkamali’i.
Dipamatunamo sia nasa’biangan tau, misa’ to tang natampe kamaparrisan sia napembanuai saki, ondongpi susi misa’ to natampunan lindo tau; susimoto tu kadipamatunanna natae’ anta pokariangananni.
Tonganna nasondokan tu mintu’ sakinta sia napassan tu pa’di’ta, apa tasanga kumua Napandasa sia Nabamba sia Napakario-rio Puang Matua.
Apa belanna salata anna bangke sia kakelokanta anna disanggang; iatu ukungan umpabu’tuangki’ kasalamaran urrampoi kalena, sia bannang dio sisulla’pang-la’pangna, anta pomondoi.
Pusamiki’ sola nasang susi domba, pantan unnula’moki’ lalanta, apa mintu’ kakadakeanta Napalulako PUANG TaunNa.
Dipakario-rio, apa napopa’elo’na bang sia tae’ nabungka’i tu pudukna; susi anak domba diramba la direre’, sia susi domba tang pandiu dio tingayona to unggontingi bulunna, tenmoto tae’ bang napatiku’bi’ pudukna.
Diendekan lan mai kadipakario-rioan sia lan mai pa’paolaian salu, na iatu mintu’ tau tonna linona, mindara tu umpalanni penaanna, kumua disu’pii lan mai tondok to tuo? Belanna salana mintu’ taungKu, anna lu lako kalena tu kamaparrisan.
Iatu lamunanna dipalan lu to’ panglamunanna mintu’ to palutu tombang, apa iatonna mate lan lu tangnga to sugi’, belanna tae’ napogau’ kakadakean sia tae’ pa’pakena tassu’ dio pudukna.
Apa nakalo’ penaanNa PUANG la ussanggangi sia umpa’dikki. Iake mangkami ussorong sunga’na diposuru’ pangakuan sala, la untiromo bati’ sia malambe’ sunga’na, anna lalo mana’pa tu pa’poraianNa PUANG tete dio limanna.
Belanna kakapuanna pa’di’na anna tiroi tu iannato sanamosona; sia tete dio kapaissananna tu tau malambu’Ku anna buda tau nabilang malolo, sia iamo la urrengnge’i tu kakelokanna tau iato mai.
Iamoto angKu la umba’gii apa dio lu to’ buda tau, sia la sola to lalong untaa pangrampa belanna umbuang sunga’na tama kamatean, sia dipasangbilangan to kadake, moi anna urrengnge’ kasalanna buda tau sia umpassambayangan to kadake.