Yesaya 57
Iatu to malambu’ sanggang, natae’ bang misa’ tau ussailei, sia iatu to masallo’ diurakkimo, natae’ bang tau umpoinaai; belanna diona kakadakean, anna diurakki tu to malambu’;
la male situang kamarampasan; iatu to lolang malambu’ la melayo diong dali’ patindoanna.
Apa kamu, mengkareke’komi mai, e anakna baine ma’balik mata, bati’ muane umpoka rampanan kapa’ sia baine ma’pangan buni.
Mindara tu mipetaa-taai, mindara tu minii umpatado pudukmi sia unnollon-ollon lilami? Tang anak dosarokomika sia bati’ kamo’rangan?
E kamu, to umpasau kamoraiammi dio to’ garonto’ kayu tarpin sia diong lu mintu’ garonto’ kayu maluna; sia kamu tu urrere’ anakmi diong lu mintu’ lombok sia lan lu mintu’ sapak buntu batu.
Dio lu to’ batu malangngo’ diong lombok nanii tu taa ma’parongko’mu; iamotu ussukaranni dalle’mu, lako batu iato munii untongkai tu pemala’ pantedok sia munii umbaa kande dipemalaran. La Kupomatanaraka tu apa iato?
Umparandanko patindoammu dao kalandona buntu; ia dukato inan iato munii kendek umbaa pemala’ pangrere’.
Dio boko’ sia ampang ba’ba munii umpale’ke’i tu tanda kapengkilalammu, belanna mupasaliananNa’ umparandan patindoammu, ammu kendek langngan, mupeloka’i tu patindoammu; siallu’mokomi la naben doi’ tu to musangamparan tu mutiromo kasirisanna.
Saeko mennolo lako Molokh umbaa minna’ busarungngu’ sia mupasakka’ buda liu tu salap; sia musua tu mintu’ pesuammu male mambela, sia musua rokko lino to mate.
Moi bo’yo’ko ma’lingka mambela, tae’ duka sia muma’kada kumua: Ka’tumo rannungku. Unnappa’ko kamatotoran ba’ru; iamoto anna tae’ mukopa.
Namindara tu mukagiang sia mukataku’, ammu tang maruru’mo sia tae’mo muingaranNa’ sia umpalan penaai tu iannato? Iaraka tu masaiNa’ kappa, ammu tang ungkataku’moRa’?
La Kupa’peissanan tu kamaloloammu sia mintu’ penggaurammu, kumua iatu iannato tang kebattuan lako kalemu.
Iake metambako, melo ke kabudanna deatammu urrampanangko. Apa mintu’nato napettiaran angin, pa’de dipenaai. Apa minda-minda tu umpentionganniNa’, iamo la umpomana’i tu padang iato sia la umpoapai tu buntu maindanKu.
Attu iato den kada Nakua: Bumbunni, bumbunni, rantei tu lalan. Lolinni nasangi tu batu katitodoan dio mai lalanna taungKu.
Belanna nakua kadanNa To patodoranna sia To sumpu mala’bi’, tu unnisung matontongan sia To masero sanganNa: Moi angKu untongkonni inan matande sia maindan, apa torro dukaNa’ urrondong to rantang buana sia to umpamadiongan penaanna, angKu papayai tu penaanna tu umpamadiongan penaanna sia penaanna to rantang buana.
Belanna tae’ angKu la tontong sae lakona ullo’bo to lino sia tae’ nala tae’ upu’na tu kasengkeangKu; iake susito la ka’tu sunga’na tu to lino dio oloKu, anna Aku kalena umbenni penaa.
Belanna kakadakean kabarakanna tau iato mai, anna pare’dekki tu ara’Ku, angKu pata’pai lima sia belanna kare’dekangKu angKu pentilindunganni. Apa moi nasusito, memboko’ duka dio mai Kaleku sia unturu’ lalan penaanna.
Kutiromo tu lalanna tau iato mai, angKu pamatanai sia la Kurenden mana’pa, sia la Kupakatana pole’ sule tu mai masussana.
Aku umpadenni tu pa’pudi-pudian nagente’ lila: Marampa’, marampa’ tu to mambela sia to mandappi’, kadanNa PUANG; sia la Kupamatana tu tau iato mai.
Apa iatu to tang mekaaluk susi tasik mariak, tu tae’ nakullei rapa’ na iatu uainna umpabu’tu pullan sia buka.
Iatu to tang mekaaluk tae’ karapasanna, kadanNa Kapenombangku.