Yosua 13

Iatonna matuamo tu Yosua sia matessekmo, ma’kadami PUANG lako kalena Nakua: Matuamoko sia matessekmoko, anna budapa tu padang torro tu ma’din diala dipomana’.

Inde sia tu padang torropa, iamotu mintu’ lili’na to Filistin sia mintu’ padang to Gesur,

randuk dio mai Sikhor dio rampe matallona Mesir sae lako lili’na Ekron ma’palurekkena – padang iate dipasangbilangan padang to Kanaan –; iatu lima arung to Filistin, iamotu arungna Gaza, Asdod, Askelon, Gat sia Ekron, sia to Awi,

rampe lo’na lu; mintu’ padangna to Kanaan sia Meara, lili’na to Sidon, sae lako Afek, sae lako lili’na to Amori;

sia padang to Gebal sia mintu’ Libanon rampe matallo, randuk dio mai Baal-Gad, tu diong garonto’ buntu Hermon, sae lako batatta lu tama Hamat;

mintu’ tu to untorroi buntu Libanon sae lako Misrefot-Maim sia mintu’ to Sidon. Aku la urambai dio mai tingayona to Israel; la musua ma’loterei tu to Israel untaa-taai tu padang la napomana’, susitu mangka Kupasan lako kalemu.

Totemo taami te padang iate la napomana’ kasera suku sia sangsese rapu Manasye.

Iatu to Ruben sola to Gad mangkamo unnappa’ taa mana’na sola (sangsesena rapu Manasye), tu mangkamo napa’bengan Musa lako tau iato mai samballinna lu Yordan, dio rampe matallo susitu mangka napa’bengan Musa, taunNa PUANG, lako tau iato mai,

randuk dio mai Aroër, tu dio biring salu’-salu’ Arnon, iamotu kota dio to’ sisamanna salu’-salu’ iato sia mintu’ padang rante membuntunna, randuk dio mai Medeba sae lako Dibon;

sia mintu’ kotana Sihon, datu to Amori, tu ma’parenta dio Hesbon, sae lako lili’na to Amon;

sia Gilead sia lili’na to Gesur sia to Maakha sia mintu’ buntu Hermon sia mintu’ Basan sae lako Salkha,

mintu’ parentana Og sia Basan, tu ma’parenta dio Astarot sia dio Edrei; ia mannamo te tu torrona tu mintu’ to Refaim, tu mangka natalo sia naula’i Musa.

Apa tae’ naula’i to Israel tu to Gesur sia iatu to Maakha naurungan iatu to Gesur sia to Maakha torromo ma’tondok dio lu to Israel sae lako allo iate.

Ia mannamo tu suku to Lewi tae’ Nabenni Puang taa mana’, sangadinna iatu pemala’ pantunu lako PUANG, Kapenombanna to Israel, iamoto tu napotaa mana’, susitu mangka Napokadanni Puang.

Inde sia tu apa napa’bengan Musa lako suku Ruben unturu’ pa’rapuanna.

Napotaamo tu padang randuk dio mai Aroër, tu dio biring salu’-salu’ Arnon, iamotu kota dio to’ sisamanna salu’-salu’ iato sia mintu’ padang rante membuntunna sikandappi’ Medeba.

Sia Hesbon sia mintu’ kotana, tu dio padang rante membuntunna, iamotu Dibon, Bamot-Baal, Bet-Baal-Meon,

Yahas, Kedemot, Mefaat,

Kiryataim, Sibma, Zeret-Hasahar, tu dao buntu dio lombok iato,

sia Bet-Peor, sia mennaa’na Pisga sia Bet-Yesimot,

sia iatu mintu’ kota dao lu padang rante membuntunna sia mintu’ parentana Sihon, datu to Amori, tu ma’parenta dio Hesbon, natalomo Musa sola tu mai arung Midian, iamotu to Ewi, Rekem, Zur, Hur na Reba, tu naparenta Sihon, tu umpa’tondokki tondok iato.

Iatonna attu iato napatei pa’dang to Israel tu Bileam, anakna Beor, to pakita-kita, sola tu mintu’ to napatei.

Iatu angge lili’na to Ruben iamotu Yordan sola randananna. Mintu’nate mana’na to Ruben unturu’ pa’rapuanna, iamotu mai kotana sia kampongna.

Inde sia tu napa’bengan Musa lako suku Gad, iamotu to Gad, unturu’ pa’rapuanna:

Napotaamo tu lili’na Yaezer sia mintu’ kota Gilead sia sesena padang to Amon sae lako Aroër, tu sitingoan Raba,

iamotu padang randuk dio mai Hesbon sae lako Ramat-Mizpa sia Betonim, sia randuk dio mai Mahanaim sae lako lili’na Debir;

sia diong lombok: Bet-Haram, Bet-Nimra, Sukot sia Zafon, tu torronapa parentana Sihon, datu Hesbon; sia Yordan sola randananna sae lako tampakna tasik Kineret, dio sambalinna lu Yordan, rampe matallo.

Mintu’nate mana’na to Gad unturu’ pa’rapuanna, iamotu mai kotana sia kampongna.

Inde sia tu apa napa’bengan Musa lako sesena suku Manasye, tu dipamanassan sesena suku to Manasye unturu’ pa’rapuanna.

Iatu angge lili’na dio mai Mahanaim, mintu’ Basan sia mintu’ parentana Og, datu Basan, sia mintu’ tondokna Hawot-Yair, tu dio Basan, annan pulona bua’na.

Sia sesena Gilead sia Astarot sia Edrei, iamotu kota kadatuanna Og dio Basan napotaa bati’na Mahir, anakna Manasye, iamotu sesena napotaa bati’na Mahir unturu’ mintu’ sukunna.

Iamoto tu padang mana’ tu mangka nataa-taa Musa dio padang Moab, rampe matallona Yordan, sikandappi’ Yerikho.

Apa iatu suku Lewi tae’ napaketaai Musa padang mana’, belanna PUANG, Kapenombanna to Israel, iamoto tu taa mana’na, susitu mangka Naalluranni.