Yosua 24

Mangkato narampunmi Yosua tu mintu’ sukunna to Israel dio Sikhem. Natambaimi tu mintu’ pekaamberanna to Israel, sia pangulunna, sia to ma’paolaianna salu, sia to ma’parentana, anna sae mennolo dio oloNa Puang Matua.

Ma’kadami tu Yosua lako mintu’ tau, nakua: Inde sia tu kadanNa PUANG, Kapenombanna to Israel, Nakua: Sambalinna lu Salu nanii ma’tondok tu nene’ to dolomi tonnanu’, iamotu Terah, ambe’na Abraham sia ambe’na Nahor, umpengkaolai kapenomban senga’.

Apa iatu Abraham nene’mi Kuala sambali’ mai nabala Salu sia Kusolan ussalongi mintu’ tondok Kanaan; angKu popemba’ka’i tu bati’na sia Kukamaseimo Ishak.

Na iatu Ishak Kukamasei Yakub sola Esau. Na iatu Esau Kuben buntu Seir la napomana’, apa iatu Yakub sola mintu’ anakna male lako Mesir.

Mangkato Kusuami tu Musa sola Harun lako sia Kuparampoi kamandasan tu Mesir, susitu mangka Kupogau’ dio lu tau iato mai, Kumane ussolangkomi tassu’.

Iatongku tassu’imi tu nene’ to dolomi lan mai Mesir, ammi rampo lako biring tasik, naundi tu to Mesir umpaula’i kareta sia pakkanarang tu nene’ to dolomi sae lako tasik Teberau.

Iamoto metambami tu tau iato mai lako PUANG, anNa padenni Puang tu kamalillinan lan alla’mi na to Mesir, Napatu’ba’i uai tasik, anna kabu’i tu tau iato. Matammi kalenamo untiroi tu apa Kupogau’ lako Mesir. Mangkato torromokomi masai dio padang pangallaran.

Kumane ussolangkomi tama tondok to Amori tu torro sambalinna lu Yordan; iatonna rariimokomi tu tau iato mai, Kusorongmi tama limammi, miurungan unnalai tu padangna mipomana’, angKu sabu’i tu tau iato dio tingayomi.

Ke’de’mi tu Balak, anakna muane Zipor, datu Moab, la lao urrarii to Israel. Mesuami untambai Bileam, anakna Beor, anna ia ullambeangkomi tampak ropu.

Apa tae’ Kumorai unturu’i tu Bileam, naurungan umpassakkeorakomi. Susimoto Kunii urrampanangkomi lan mai kuasanna.

Mangkato ullambanmokomi Yordan; iatommi rampomo lako Yerikho, sirarimokomi to Yerikho, iamotu to Amori, to Feris, to Kanaan, to Het, to Girgasi, to Hewi na to Yebus, apa Kusorong nasang tu tau iato tama limammi.

Attu iato Kuparampoikomi tabuan balo dio tingayomi, naula’i tu tau iato mai dio mai kalemi, susitu da’dua datu to Amori; tonganna tangiara kandean pa’dangmu ba’tu panamu.

Susimoto Kunii umbenkomi misa’ padang tu tang mikasara’i sia ba’tu pira-pira kota tu tang mibangun sia minii ma’tondok lan, sia mipeburai tu pa’lak anggoro’ sia garanto’ saitun, tu tang pantanammi.

Iamoto la mikasiri’ tu PUANG sia la mipenombai situang penaa lantuk sia maruru’, ammi boko’i tu mintu’ deata tu napenombai nene’ to dolomi sambalinna lu Salu sia dio Mesir, ammi pengkaolai PUANG.

Apa iake misangai tang melo tu umpengkaolai PUANG, melo ke mipilei totemo minda tu minii mengkaola: lakoraka mintu’ deata tu napenombai nene’ to dolomi sambalinna lu Salu, lakoraka deata to Amori tu minii ma’tondok. Apa iatu aku sia to lan banuangku la mengkaolakanni lako PUANG.

Mebalimi tu bangsa iato nakua: La toyang ia dio mai kaleki tu la umboko’i PUANG sia umpenombai kapenomban senga’.

Belanna PUANG iamo Kapenombanta. Iamotu ussolangki’ sia ussolan nene’ to dolota lan mai tondok Mesir, lan mai inan tanii dipokaunan, sia iamo umpadenni te mintu’ tanda kalle-kallean dio pentirota, sia Iamo ungkaduttu’ki’ dio lu mintu’ lalan taolai sia dio lu mintu’ bangsa tu taolai lendu’.

Narambaimo PUANG tu mintu’ bangsa iato sia to Amori, iamotu to untorroi te tondok iate dio mai tingayota. Ia duka tu kaminna la umpengkaolaikan PUANG, belanna Iamo Kapenombanta.

Apa ma’kada tu Yosua lako bangsa iato nakua: Tang miatta umpengkaolai PUANG, belanna Iamo Kapenomban sumpu masero. Iamo Kapenomban noka ditimba oloNa. Tae’ nala umpagarri’i tu kapatodo-tintingammi sia kasalammi.

Iake mitampeI tu PUANG, ammi pengkaolai deatanna to salian bangsa, manassa la memboko’, Naparampoikomi kakadakean sia Nasabu’ikomi, tonNa mangkamo umparampoikomi kameloan.

Apa ma’kada tu bangsa iato lako Yosua, nakua: Tae’, sangadinna PUANG ri la tapengkaolai.

Ma’kadami tu Yosua lako bangsa iato, nakua: Susitu kamu kalena ussa’bii kalemi, kumua PUANGmo tu mipilei la mipengkaolai. Mebalimi tu tau iato mai, nakua: Kamimo tu ussa’bii.

Totemo boko’imi tu mintu’ deatanna to salian bangsa tu misisolan, sia popa’mirringi tu penaammi lako PUANG, Kapenombanna to Israel.

Ma’kadami tu bangsa iato lako Yosua, nakua: PUANGri, Kapenombanta, la kipengkaolai sia la kiperangii tu kadanNa.

Allo iato untananmi basse tu Yosua sola bangsa iato napamanassanni tau iato mai tu apa dipondok sia atoran, dio Sikhem.

Nasura’mi Yosua tu mintu’na kada iato lan sura’ Sukaran alukNa Puang Matua, sia naala tu misa’ batu kapua, napabendanni inde to dio diong garonto’ kayu tarpin, dio to’ inan maindanNa PUANG.

Ma’kadami tu Yosua lako bangsa iato, nakua: Manassa batu iate la mendadi tanda sa’bi la untiroki’, belanna narangimo batu tu mintu’ kadanNa PUANG, tu Napokadamo lako kaleta. Iamoto la dadimo tanda sa’bi, la untirokomi, kumua da mipeonganni tu Kapenombammi.

Mangkato nasuami Yosua sule tu mai bangsa iato, pantan lu lako to’ mana’na.

Iatonna mangkamo to mintu’na apa iate, matemi tu Yosua, anakna muane Nun, taunNa PUANG, tonna saratu’ sangpulomo taunna.

Nalamunmi tau lan lili’na padang mana’na dio Timnat-Serah dao buntu Efraim, daanna lu buntu Gaas.

Iatu to Israel umpengkaolai PUANG lan mintu’ allo katuoanna Yosua sia lan mintu’ allo katuoanna pekaamberan, tu tuopa tonna matemo tu Yosua, tu unnissanni tu mintu’ penggauran, tu Napogau’ PUANG lako to Israel.

Sia iatu mai bukunna Yusuf, tu nabaa to Israel dio mai Mesir nalamunmo tau dio Sikhem dio sangtempe’ padang tu mangka naalli Yakub saratu’ batu salaka dio mai bati’na Hemor, ambe’na Sikhem. Napotaa mana’mi bati’na Yusuf tu padang iato.

Sia ia duka tu Eleazar, anakna muane Harun, matemo, nalamunni tau dao tanete, tu diben anakna muane Pinehas, dao buntunna Efraim.