Yosua 9

Iatonna rangimi mintu’ datu, tu torro dio rampe matampu’na Yordan, la daona lu Buntu, la diongna lu Padang Merrantena sia iatu dio biring tasik Kapua sae lako tu sitingoanna Libanon, iamotu to Het, to Amori, to Kanaan, to Feris, to Hewi na to Yebus,

siallu’mi la sanginaa urrarii Yosua sola to Israel.

Apa iatonna rangimi to Gibeon tu apa mangka napogau’ Yosua lako Yerikho sia Ai,

ma’tangnga’ dukami tu tau iato; ke’de’mi male umbaa kinallo, naban karung masere tu keledainna sia kiriba’ masere tu nanii anggoro’, tu kake sia ditampi’,

sia sepatu masere tu ditampi’mo dio lentekna sia ma’pakean malusa, sia mintu’ roti napokinallo marangkemo sia manisak.

Malemi tu tau iato lako Yosua, lako to’ tenda dio Gilgal, anna ma’kada lako kalena sia lako mintu’ muane to Israel, nakua: Kami te lu diokanni mai tondok mambela: totemo la sibasseki’.

Ma’kadami tu to Israel lako to Hewi, nakua: umbai torroki’ sikandappi’, naumba la takua sibasse?

Ma’kadami tu tau iato lako Yosua, nakua: Iate kami sola nasang taunna puang. Mekutanami tu Yosua lako, nakua: Mindarokomi sia umbara minii sae?

Mebalimi tu tau iato nakua: Iate taummi sae dio mai tondok tarru’ mambela belanna sanganNa PUANG, Kapenombammi, belanna kirangimo tu karebanNa, iamotu mintu’ Napogau’na dio Mesir,

sia iatu mintu’ apa mangka Napogau’ lako da’dua datu Amori rampe lianna Yordan, iamotu Sihon, datu Hesbon sia Og, datu Basan, tu dio Astarot.

Iamoto nama’kada tu mintu’ pekaamberangki sia mintu’ to lan tondokki lako kaleki, nakua: Baakomi kinallo dio lu lalan ammi male sitammu tu tau iato mai, sia ma’kadakomi lako, kumua: kami te taummi, melo ke sibasseki’.

Inde sia tu rotingki; malassupa tongki mane unnalai lan mai banuangki la kipokinallo, to allo kinii ke’de’ sae lako kalemi, na totemo tiromi: marangkemo sia manisak nasangmo.

Iate kiriba’ tongki patamai uai anggoro’ ba’ru bangpa, apa tiromi kakemo, na iate pakeangki sia sepatungki burukmo, belanna kalingkan lendu’ mambelanna.

Ta’kala naalami to Israel tu kinallona tau iato mai, apa tae’ namekutana tu diona kadanNa PUANG.

Sikadamakmi Yosua tu tau iato mai sia naallu’ la umpatuoi, sia iatu mintu’ pangulu kasirampunan umpalao sumpa la maruru’ lako kalena.

Apa iatonna lendu’mo tallung allo mangkanna sibasse, narangimi kumua iatu tau iato sikandappi’ bangsia, ondongpi lan tangnga lili’na.

Belanna iatu to Israel ke’de’, anna rampo lako kotana tonna allo ma’pentallun; iatu kotana tau iato mai iamotu Gibeon Kefira, Beerot na Kiryat-Yearim.

Apa tae’ napatei to Israel, belanna mintu’ pangulu kasirampunan mangkamo umpalao sumpa sibasse tete dio PUANG, Kapenombanna to Israel. Attu iato iatu mintu’ kasirampunan iato ma’paropo’ lako mintu’ pangulu.

Ma’kadami tu mintu’ pangulu lako mintu’ kasirampunan iato, nakua: Mangkamoki’ umpalao sumpa sibasse tete dio PUANG, Kapenombanna to Israel, iamoto anna tae’ tama’din umpata’pai lima.

Inde sia tu la tapogau’ lako tau iato mai, iamotu la tapatuo, da narampoiki’ kasengkean diona tu sumpa tapake sibasse.

Ma’kadami tu mintu’ pangulu lako tau iato mai nakua: La tapatuo ia tu tau iato mai, anna dadi to mekayunna sia to meuainna mintu’ kasirampunan, susitu mangka napamanassa mintu’ pangulu tu diona tau iato mai.

Mangkato natambaimi Yosua tu tau iato mai, anna ma’kada lako, nakua: Ma’apai ammi pakenakan, mikua: kami te to mambela tongankan, anna torrokomi lan lu alla’ki.

Totemo la narampoikomi tampak ropu, la misiosso’i tu la dipokaunan, iamotu to mekayunna sia to meuainna banuanNa Kapenombangku.

Mebalimi lako Yosua, nakua: Belanna dipamanassa tonganmo lako kaleki tu apa Napasan PUANG, Kapenombammi, lako Musa, taunNa, kumua Nakamaseimokomi mintu’ tondok sia Nasabu’i tu mintu’ to umpa’tondokki dio tingayomi, iamoto angki mataku’ tongan lako kalemi tu diona katuoangki; iamo napobannang to angki pogau’i te iannate.

Manassa totemo lanmokan kuasammi; pogau’ bangmi lako kaleki tu misanganna melo sia malolo.

Napogau’mi lako susito, narampanan dio mai limanna to Israel, naurungan tae’ nadipatei.

Allo iato napadadimi Yosua to mekayunna sia to meuainna mintu’ kasirampunan sia inan pemalaranNa PUANG dio to’ inan la Napilei Puang, sae lako allo totemo.