Zakharia 11
Bungka’i tu mintu’ ba’bamu, e Libanon, anna purai api tu mintu’ garonto’ arasi’mu.
Sumarroko, e sanoba’, belanna songkamo tu arasi’, sia diratoimo tu mintu’ kayu umbalumbun; sumarrokomi, e mintu’ jati dio Basan, belanna tibambangmo tu pangala’ tamman.
Perangii tu sarrona to mangkambi’, belanna sanggangmo tu kamala’biranna; perangii tu burrungna singa mangura, belanna iatu kamaballoanna Yordan sanggangmo.
Inde sia tu kadanNa PUANG, Kapenombangku, Nakua: Kambi’i tu mintu’ domba la ditunu.
Iatu tau unnallii untunui, apa nasanga tae’ nasala’; iatu tau umbalukanni ma’kada nakua: Mintu’ kadipudian lu lako PUANG, belanna sugi’mo’; iatu mintu’ to mangkambi’na tae’ ungkasayangi.
Belanna tae’mo Kula ungkasayangi tu to untorroi kuli’na padang, kadanNa PUANG; manassa la Kusorong tu mintu’ tolino tama limanna padanna tolino sia tama limanna datunna; na tau iato mai la umpopempadang lo’bangi te lino sia tae’mo Kula urrampananni lan mai limanna tau iato mai.
Iamoto kukambi’i tu mintu’ domba la ditunu – iamo napobannang to namakario-rio dio lu mintu’ domba angku alai tu tekken da’dua, misa’ kusangai Pa’kaboro’na iatu misa’ Pa’pori, susimoto kunii ungkambi’i tu tuntunan iato.
Iatu to mangkambi’ tallu kuratoimo lan sangbulan, belanna tappumo tu kasa’barasangku lako sia nakanoka dukamo’ tu tau iato mai.
Mangkato ma’kadamo’ kukua. Tae’mo kula ungkambi’komi, iatu to la mate, nake matei, iatu la diratoinna, nake diratoi, na iatu torronapa nake pada ungkande duku’ solana.
Kualami tu tekkenku, tu disanga Pa’kaboro’, angku le’toi, kuurunganni umpokai tu basseku, tu mangka kutanan sola mintu’ bangsa.
Susimoto tu apa iato dipoka tonna allo iato; susi dukamoto iatu makario-riona dio lu mintu’ domba, tu umpalanna’ penaa, unnissanni, kumua iamote tu kadanNa PUANG.
Ma’kadamo’ lako tau iato mai kukua: Iake misangai melo, benmo’ tu saroku, apa iake tae’i, elo’namo! Natimbangmi tu saroku tallungpulo batu salaka.
Apa ma’kada tu PUANG lako kaleku Nakua: Pembuanganni lako to tumampa kurin; iatu allinna masuli’ naanggaranNa’ tau iato mai! Kualami tu tallungpulo batu salaka, angku pembuanganni lako to tumampa kurin, tu lan banuanNa PUANG.
Mangkato kule’toomi tu tekken ma’penduangku, tu disanga Pa’pori, kuurunganni umpoka kasiuluranna Yehuda na Israel.
Mangkato ma’kadaMi tu PUANG lako kaleku Nakua: Alanomoko kalemu pareanan to mangkambi’ baga.
Belanna manassa la Kupadenan misa’ tu to mangkambi’ lan tondok, iamotu tang umparinaa apa la sanggang, tang undaka’ apa tisambo’, tang umpoinaa umpamondo apa bangke, tang ungkaritutui apa tang pakulle, sangadinna la ungkande duku’ olo’-olo’ malompo sia la nase’bu kanukunna.
Upu’ allona tu to mangkambi’ tae’ gai’na, tu umpopa’elo’na mintu’ dombana. Narampoimira pa’dang tu takia’na sia iatu mata kananna! La kope tu takia’na, anna maraun tu mata kananna.