Zakharia 4

Sulemi tu malaeka’ kusipa’kadan, anna tundanna’ susito untundan to mamma’.

Ma’kadami lako kaleku nakua: Apara mutiro? Mebalimo’ kukua: Untirona’ misa’ tongkonan palita bulaan nasang, anna toppo’ daona lu tu inan minna’, pitu tu palitanna, susi duka tu sulingna pitu lako tu palita daona lu,

sia da’dua garonto’ saitun untongloi daona lu, misa’ dio sa’de kananna na misa’ dio sa’de kairinna tu inan minna’.

Mebalimo’ lako tu malaeka’ kusipa’kadan kukua: O puang, apara battuananna te?

Mebalimi tu malaeka’ kusipa’kadan nakua: Tae’raka mutandai apara battuananna te? Ma’kadamo’ kukua: Tae’ kutandai, puang.

Ma’kadami lako kaleku nakua: Inde sia tu kadanNa PUANG lako Zerubabel Nakua: Tangia tete dio kamatotoran sia tangia tete dio kamasa’garan, sangadinna tete dio PenaangKu, kadanNa PUANGna mintu’ ma’dandan maritik.

Mindarako, e buntu malangka’? Dio tingayona Zerubabel la dadiko padang marante, la natassu’i tu batu daona lu naunnarrak-arrak tu tau, nakua: Salama’, salama’ lako kalena.

Saemi tu kadanNa PUANG lako kaleku, Nakua:

Mangkamo naoton Zerubabel te parandanganna te Banua iate, naia duka la ussundunni, ammi issanni kumua Nasuana’ PUANGna mintu’ ma’dandan maritik lako kalemi.

Belanna mindara tu untapa’ allo nanii bitti’pa tu mintu’ apa? Manassa la parannu penaanna tu tau iato mai, ke natiroi tu batu petimbang lan lu limanna Zerubabel. – Iate pitu apa iate iamotu matanNa PUANG tu umpenunu mintu’ lino tiku lao.

Mebalina’ lako kukua: Apara battuananna tu da’dua garonto’ saitun tu dio kananna sia kairinna tongkonan palita iato?

Ma’penduannamo’ ma’kada lako kukua: Apara battuananna tu da’dua tangke saitun, tu nalolongi mintu’ saitun susi bulaan unnola da’dua suling bulaan?

Ma’kadami lako kaleku nakua: Tae’raka mutandai apara battuananna tu apa iato? Mebalimo’ kukua: Tae’, puang.

Ma’kadami nakua: Iamote tu da’dua to diminnakki, tu bendan dio oloNa Puangna mintu’ lino.