Zakharia 8
Undinnato saemi kadanNa PUANGna mintu’ ma’dandan maritik susite:
Inde sia tu kadanNa PUANGna mintu’ ma’dandan maritik, Nakua: Lendu’ Kukamali’na tu Sion, angKu posara’i. Kukamali’ tongan, angKu posara’i.
Inde sia tu kadanNa PUANG Nakua: La suleNa’ lako Sion, angKu torro lan Yerusalem; iatu Yerusalem la disangai kota kamarurusan, na iatu buntunNa PUANGna mintu’ ma’dandan maritik, la diganti buntu kamaindanan.
Inde sia tu kadanNa PUANGna mintu’ ma’dandan maritik, Nakua: La den pole’ tu to matua muane sia baine unno’ko’ dio lu tana lapang Yerusalem, pantan untoe tekken, belanna tarru’ matuamo.
Sia dio duka lu tana lapang kota iato la ponno tu pia muane sia pia baine maningo.
Inde sia tu kadanNa PUANGna mintu’ ma’dandan maritik, Nakua: Moi nakalle-kallean tu mintu’ apa iate dio pentirona te bangsa torronapa, umbaniapa nala kalle-kallean dio pentiroKu? KadanNa PUANGna mintu’ ma’dandan maritik.
Inde sia tu kadanNa PUANGna mintu’ ma’dandan maritik, Nakua: Tonganna la Kurampanan tu taungKu dio mai tondok kabu’tuan allo sia dio mai tondok kalambunan allo.
La Kupasule tu tau iato mai anna torro lan Yerusalem. Tau iato mai la dadi taungKu na Aku la dadi Kapenombanna situang kamarurusan sia kamaloloan.
Inde sia tu kadanNa PUANGna mintu’ ma’dandan maritik, Nakua: Pamatoto’i tu limammi, e kamu, tu urrangii te kada iate sun dipudukna nabi allo iate, tu tuo tonna dioton tu parandangan banuanNa PUANGna mintu’ ma’dandan maritik, iamotu Banua kabusungan, la dibangun.
Belanna dolo dio mai attu iato tae’ naappa’ saro ra’ta’na tu tau, tang me’duk tu patuoanna; tae’ kamanamananna to male sia to sae napobua’ uali; ondong pissan Kuroso tu mintu’ tolino nasipakka.
Apa totemo tae’mo Kususi dolona lako te bangsa torronapa, kadanNa PUANGna mintu’ ma’dandan maritik.
Belanna iatu banne diambo’ la dadi, iatu garonto’na anggoro’ la membua, iatu padang la membura sia iatu langi’ la umpato’do ambunna; angKu pa’kamasean nasangi te lako te bangsa torronapa la napomana’.
Susitu mangkakomi dadi kada tampak ropu dio lu mintu’ bangsa, e to Yehuda sia to Israel, la susi dukakomito la dadi pa’passakke, belanna Kukamaseangkomi kasalamaran; da mimataku’, pamatoto’i tu limammi.
Belanna inde sia tu kadanNa PUANGna mintu’ ma’dandan maritik, nakua: Susimoto tu tanan penaangKu la umparampoikomi kamandasan, tonna pare’dekki nene’ to dolomi tu ara’Ku, kadanNa PUANGna mintu’ ma’dandan maritik, Kuurunganni tang menassanmo,
susi dukato te allo iate dennomo tanan penaangKu la umpogau’ melo lako Yerusalem sia lako to Yehuda; iamoto da mimataku’.
Inde sia tu mintu’ apa la mipogau’, iamotu la sipokadangkomi tu tonganna, ma’paolaikomi salu lan lu babanganmi situang kamalamburan, anna bu’tu karapasan,
sia da misitangnga’ kadake lan penaammi sia da miporai tu umpalao sumpa tang tongan, belanna Kukagi’gi’ te mintu’ apa iate, kadanNa PUANG.
Sia rampo duka tu kadanNa PUANGna mintu’ ma’dandan maritik lako kaleku, Nakua:
Inde sia tu kadanNa PUANGna mintu’ ma’dandan maritik, Nakua: Iatu pa’puasa lan bulan ma’penna’pa’na, ma’pellimanna, ma’pempitunna sia ma’pessangpulona la membali kasendean sia kaparannuan, ondongpi pa’maruasan ponno kapaimanan lako to Yehuda; iamoto sipatu la mikamali’ tu tonganna sia karapasan.
Inde sia tu kadanNa PUANGna mintu’ ma’dandan maritik, Nakua: La saeomo ba’tu pira-pira bangsa sia to umpa’tondokki buda kota,
sia iatu tau lan misa’ kota la male lako misa’nao, nama’kada nakua: Maikomi anta pada male umpengkamoyai pa’kamaseanNa PUANG sia undaka’ PUANGna mintu’ ma’dandan maritik; morai dukana’ male lako.
Ondongpi, buda to sangpetayanan sia bangsa tarompo’ la sae undaka’ PUANGna mintu’ ma’dandan maritik dio Yerusalem sia umpengkamoyai pa’kamaseanNa PUANG.
Inde sia tu kadanNa PUANGna mintu’ ma’dandan maritik Nakua: Allo ia dukato la sangpulo tu tau dio mai mintu’ bangsa ma’rupa-rupa basana la untoe, ondongpi la natoe tongan tu tampak bayu lamba’na to Yahudi, anna ma’kada nakua: La moraikanni undi unturu’komi, belanna kirangimo, kumua Narondongkomi Puang Matua.