Ruta 1
Akmena kena me tape Israele maka teu pakalaru esi pletae Israele le tape Israele kamale sae mosare, me tape Kanane susae manane kenasi. Kena mere mokwai sae eni nane Elimeleke, tamata bei suku Eprata, irue me kota Betleheme, me otoi Yehuda. Bei susae manane mere hoko iheti lopai otoi Moape kai eni bina Naomi, kai eni nanae mokwaia luaru, Mahlone kai Kilyone, eleki esi rue ete mpaije.
Kena erisi mpai Moape sare,tolong lihat ayat sebelumnya
Elimeleke imata, hoko Naomi irue kai eni nanae luaru.
Eni nanae mokwai lua meru esi kai bina bei Moape. Luasi binaru, saere eni nane Orpa kai saere eni nane Ruta. Esi rue ete mere kasuke musuna butu esa,
eleki Naomi eni nanae luaru, Mahlone kai Kilyone esi mata leneka, hoko Naomi eni mokwai kai eni nanae mokwai luaru esi mata pususi beini pene.
Eleki petua ilaru lomei esi lene be TUHANE Iriluke misete ete tamata Israelaru kai esi tnanelaru usupu hasile bokala peneka. Hoko Naomi kai eni nanae tamolia luaru esi aknekae kena esi leu bei Moape.
Hoko ileu bei otoi mere sakesa kai eni nanae tamolia luaru.
Kena esi lori Yehuda mere, esi me lalane sa,
Naomi ibeteke loko eni nanae tamolia luaru be, “Luami leu lopai loko inami mpai esi luma noma, sebeie TUHANE Imise ete luami saka luami mise ete au kai ete auku anae mokwaia lua rebe esi mata pende.
Sebeie TUHANE Iriluke misete elake ete luami leke luami supu mokwai kena luami kai suike noma.”
Eleki Naomi ibaiesi kai iata luasi, po luasi rani ktili titinai,
kai luasi beteke lokoi be, “Mo, ina. Luama keu kai inate ale lori loko amu bangsare sa.”
Po Naomi iombe, “Yanoma kuanae luami. Esi misete kuanae luami leu noma. Luami keu kai au yanoma. Le au biti kwetele kena luami kai kaise saisa moneka.
Kuanae luami leu noma le au mata bina kuate peneka hoko au kai suike saisa moneka. Kai masike au kai suike sosoli kena kpetu meije neka kai au ruele kwete mokwai,
po luami namake eti esi elare saisa mo. Bei mere hoko luami tahane lale kena kai suike mo yake. Kuanae luami, ele mere yake, le au lekwe blake susate saka saisa rebe luami blakele neka, le TUHANE Ihukume au.”
Ruta kai Orpa luasi rani ela lesi leneka. Eleki Orpa iata inai tamoli kai ibaieni eleki ileu ne. Po Ruta isuka keu bei inai tamoli moneka.
Eleki Naomi ibeteke loko Ruta be, “Kuanae, kwalimu ileu loko eni bangsare kai taneia rebe ihlaleke lokoule peneka, hoko kuanae, aleu lului noma.”
Po Ruta iralake be, “Inate, aulake au leu yake le au keu kai ale sa. Akeu loko etiare, au lekwe loko mere neka. Inate arue etiare, au lekwe au rue ete mere neka. Inate, amu bangsare mere auku bangsare neka. Alla rebe atatu lokoIje, au lekwe au tatu lokoIje neka.
Inate amata etiare, au lekwe mata kai hnouke au ete mere neka. TUHANE Ihukume au neka sepo au keu tebikeku bei ale. Batuke matale pine etebi luai.”
Naomi iselu Ruta iatula titinai kena keu lului hoko ilepa sasaisa mone.
Eleki luasi keu siba rame eti esi luake ndi kota Betleheme. Kena luasi luake kotare hleru, le pusue tamata laleisu ndina titinai le luasi. Pusue bina ete meru esi tneu lomai be, “Mere Naomi o?”
Po Naomi ibeteke lokosi be, “Kotie aure Naomi yanoma po kotie aure Mara, le Alla Maka Kbasare Isebei auku hidupe susa.
Kena au keu menai bei meije au keu le bala penute po TUHANE Iono au leure kena bala malenete. Imi koti aure Naomi yanoma le TUHANE Maka Kbasare Ihukume au kena susata bokala peneka.”
Hoko Naomi ileu bei mpai otoi Moape sakesa kai Ruta, eni nanae tamoli, tamata Moape eono ele mere. Esi luake me kota Betleheme kena ulu jelai talei menaije resa.