Ruta 2
Naomi saui sae bei eni mokwai Elimeleke eni luma mataije, eni taneia bokala, eni nane Boase.
Kena rebai sae Ruta ibeteke loko inai tamoli be, “Inate, au kotie leke au keu me ndinu jelaije tinake tamata laleisu noa au, hoko au keu tutu muliesi leke au ili jelai rebe utetu bei tamata maka repa jelai meru balaisu.”
Eleki Naomi iralake be, “Kuanae, akeu no.”Ikeu roma me ndinu eleki ikeu tutumulie maka repa jelaiaru leke iili rebe uteture. Mere ime panuhuke Boase eni ndinure. Boase mere bei Elimeleke eni luma matai.
Kena mere neka, Boase iluake bei kota Betleheme, kai ibeteke loko maka repa jelaiaru be, “Au kotie, TUHANE Ime kai imi.”
Kai esi ralakeni be, “TUHANE Iriluke misete ete ntuane ale lekwe.”Eleki Boase itneu tamata makerikaru esi elake be, “Bina mere sire?”
Tamata makerikaru esi elake mere, iralake be, “Mere bina bei Moape, iluake sakesa kai Naomi bei mpai otoi Moape.
Ikotie bei au leke ikeu tutumulie maka repa jelaiaru leke iili rebe uteture. Iluake eleki ikerike rame bei beleti eti roma meije neka, itatike nanai kwale moneka.”
Boase ilene mere hoko ikeu loko Ruta kai ibeteke lokoi be, “Kuanae lene. Akeu ili jelai me tamata maketaru esi ndinu yake kai keu bei meije yake. Po akerike rame ete meije neka sakesa kai auku tamata bina makerika meiju neka.
Aselu tamata makerikaru esi ulu jelai loko eteire, akeu lulu binaru rame. Sepo kmalakemu hoko keu kinu kwele bei hlau buinu neka le tamata makerika mokwaiaru esi kute kwele kenalu peneka. Au hnausi peneka leke esi kwale ale yake.”
Hoko Ruta itatu lope eti oalaleije kena tapele, kai ibeteke loko Boase be, “Amate, au kotie trima kasi le aono misete ete au ele meije yo au meije tamata bei nusa makete hoko suke au supu misete bei amate ale ele meije mo.”
Boase iralakeni be, “Pusue rebe aonolu ete inamu tamoli kena amu mokwai imata pende, tamata esi alenake ete au peneka. Au rekware be akeu bei inamu kai amamu kai nusa rebe teu useume kenare peneka, kai aluake rue ete meije kai tamata rebe arenasi kwale mosare.
Au kotie, sebeie TUHANE Itapa ale le amu misete mere, kai asupu saisa rebe TUHANE, Israelaru esi Allare Irilukele etemu le aluake kena supu hlamate beiNi.”
Eleki Ruta ralake be, “Amate, amise ete au titinai peneka, masike aure saka amu tamata makerikaru mo, po amate amu ntekwane ete aure eono lalekue ndina.”
Olase kena kanere, Boase ibeteke loko Ruta be, “Mai leke kane. Rotire meije, lutue kena meite maklinute meije.” Eleki irue me maka repa jelaiaru esi leisu, kai Boase iriluke gandume rebe asakele pende etei, hoko Ruta ikane eti ipila po ikane pusue eni manane mo.
Esi kane pela eleki Ruta ikeu ili jelai suike. Ruta ikeu mina pine Boase ibeteke loko eni makerikaru be, “Sepo irana bei rebe lolu pende, sebeini neka onoi yake kai ono asomieni yake. Mise lesire imi nabu bei rebe imi lo pende etei leke iranae.”
[tolong lihat ayat sebelumnya]
Hoko Ruta iili jelai rame eti kmau, kena keleke jelai rebe iililu mere bei esi bataije, isupu keranjane toini. Mere esi kiloa butu esa lesini lua.
Eleki ileu le eni jelai meru roma me kota, kai iaseluke meru ete inai tamoli kai iriluke manane lesini rebe ikane pusulu more.
Naomi ibeteke lokoi be, “Asupu pusue meije bei etia? Akerike petu meije me sire eni ndinure? Sebeie Alla Iriluke misete elake ete tamata rebe iono misete ete ale meije.”
Hoko Ruta ialenake pusue etei be, “Au ili jelai petu meije bei mokwai sae eni ndinu. Makwai mere eni nane Boase.”Eleki Naomi ibeteke lokoi be, “Sebei TUHANE Iriluke misete elake ete tamata mere. Saisa rebe TUHANE Italuke kena Ionoe ete tamata kwanale kai ete sie rebe esi mata pende, Ionoe.” Naomi lekwe ibeteke loko Ruta be, “Tamata mere kai itere tumute sa, hoko suke iseli le ite.
Eleki Ruta iombe, “Inate, tamata mere ibeteke lekwe be au ili jelai kai eni tamata makerikaru eti ulu pusue jelai me eni ndinure.”
Eleki Naomi ibeteke lokoi be, “Yele kuanae. Esi misete akeu kerike sakesa kai eni tamata bina makerika me eni ndinure, le akeu me tamata maketa esi ndinure namake sesi esi kwale ale.”
Bei mere hoko Ruta ikerike me Boase eni ndinure sakesa kai Boase eni tamata bina makerikaru rame, bei tale maka repa jelaije kai gandume menai eti epela. Kai kena ikerike mere irue kai inai tamoli.