Ruta 4
Boase ikeu me otoi kena tetue lomai me kotare esi meture. Kena irue ete mere, mokwai sae me, tumute kai Elimeleke ilia, eleki Boase ikoti lokoi be, “Kwali, mai rue ete meije mina!” Tamata mere iluake eleki irue.
Eleki Boase ikotie elaka sie butu esa bei kota mere leke esi rue kaini, hoko esi rue kaini ete mere.
Boase ibeteke loko ile rebe tumute kaini mere be, “Naomi ileu bei otoi Moape peneka, kai luaiki kwali Elimeleke eni tapele iabeliele reneka.
Hoko meije au betekele ete ale leke arekwae. Sepo asuka sabe tapele mere hoko beteke eteku mei iteki elaka rebe esi rue meije oaisu. Amu hake kena sabele le ale kai mokwai rebe imata pende tumute laleke. Po sepo asuka mo, hoko beteke ntontoli leke au sabele le au meije tumute lekwe. Sae makete eni hake kena mere mo, batuke ale rebe amu hake ndete baba, eleki lopere au.”
Eleki tamata mere iralake be, “Yele, namake au sabele.”
Eleki Boase iombe, “Kena asabe tapele mere bei Naomire, suke akai kai Ruta, bina Moape rebe eni mokwai imata beini pende, leke tapele mere eni anubuaru erisi kbasae rame.”
Tamata mere iombe, “Sepo ele mere hoko au pali mo. Hoko meije au tie auku hake rebe endete baba kena sabe tapele mere neka. Au sabe tapele mere esi guna sae ete au mo le namake ete auku anubuaru more pe. Hoko esi misete asabe noma.”
Kena mere me Israele sepo sae itukare pise iabelie sasaisa ete tamata makete, hoko esi akurue kena tanda elere: tamata maka tukare pise maka abelire ilesu eni sandale leini eleki irilukele ete tamata maka sabere. Hoko tamata me Israele esi cara akurue maka tukare pise abeli kai maka sabere ele mere.
Hoko kena tamata mere ibeteke loko Boase be, “Mise lesire asabe noma”, ilesu eni sandale leine eleki irilukele ete Boase.
Eleki Boase ibeteke loko tamata elaka meru kai pusue tamata rebe esi ete mere be, “Petu meije imi pusumi sasike au sabe pusue Elimeleke kai eni nanae luaru, Kilione kai Mahlone esi tapele kai saisa rebe esiere bei Naomi peneka.
Kai au rana Ruta bina Moape, Mahlone matale eni bina kena auku bina, hoko tapele mere ere leue esi upui rebe imata pende eti pela. Kai eni anubuaru erisi me esi luma mataije neka, kai erisi me esi kotare neka. Imi pusumi nete, petu meije imi sasikele.”
Elaka meru kai tamata bokala rebe esi me kotare esi meture esi ralake be, “Yele, ami sasikele. Ami kotie leke TUHANE Iono amu bina mere saka Rahela kai Lea luasi, rebe esi biti kwetela bokala ete Yakupe. Ami kotie leke amu taneia boka me Eprata kai amu nane ela me kota Betleheme.
Ami kotie leke amu anubua rebe TUHANE Irilukesi etemu baue bina beluke mere, eono amu luma takare molupe Perese, Yehuda kai Tamare luasi nanare.”
Hoko Boase irana Ruta eleki ikai kaini. TUHANE Iriluke misete ete Ruta hoko ikeu blublulu eleki iruele kwete mokwai.
Bei mere hoko pusue bina ete meru esi beteke loko Naomi be, “Ami isike TUHANE le kena petu meije Iriluke upumu mokwai sae ete ale peneka kena iraka ale kena amatabinare. Ami kotie leke namake kwetele mere eni nane ela me tamata Israelaru.
Amu nanae tamoli ioki ale titinai, iriluke ete ale lesi bei saisa rebe kwete mokwaia itu esi rilukele. Meije iruele upumu mokwai sae ete ale peneka, namake iraka ale kena amatabinare.”
Naomi irana kwetele mere, ipialaeni kai iokini titinai.
Tamata bina me esi luma leini keholire esi ono kwetele mere eni nane Obeta. Pela esi tetue tamatare, esi beteke be, “Naomi eni nanae mokwai peneka.”
Obetare Isai amai, yo Isaije kamale Dauta amai.
Perese eni anubuaru esi meije:
Perese eni nanae kena Hesrone,
Hesrone eni nanae kena Rame,
Rame eni nanae kena Aminadape,Aminadape eni nanae kena Nahasone,
Nahasone eni nanae kena Salmone,Salmone eni nanae kena Boase,
Boase eni nanae kena Obeta,Obeta eni nanae kena Isai,
Isai eni nanae kena kamale Dauta.