Ruta 3
Kena petu sae me Naomi ibeteke loko Ruta be, “Kuanae, au atula kena akai suike leke lalemu ndina kai asusa kuate yanoma.
Akerike sakesa kai Boase eni tamata bina makerikaru moyo? Boase kai ite kwali tau. Kena kpetu meije ikeu sirue jelai me eni otoi maka keleke jelai me eni ndinure.
Asuku nunu, pake leite boini ntelete kai alike amu lapune ntekite eleki akeu loko otoi rebe esi blauke jelaije. Anamake ete mere eti ikane pela, po atula leke irekwa ale yake.
Li lokoi be ikeu ntulu etiare. Kai sepo intulu peneka, akeu lokoi kai bara eni obite, eleki antulu tehaike eni lelale. Namake ibeteke saisa rebe suke aonore etemu.”
Ruta iralake be, “Yele inate, au ono lulu pusue rebe inate abetekele.”
Eleki Ruta ikeu me otoi maka keleke jelaije, ete mere iono lulu saisa rebe inai tamoli ibeteke eteije.
Kena Boase ikane kai ikinu pelare, iblake pila kai laleije ndina. Eleki ikeu ntulu tehaike jelaia rebe esi lupukeule. Eleki Ruta iluake lokoije ikulueni, kai ibaike Boase eni obite bei eni lelale eleki intulu tehaike eni lelale.
Roma kpetu tlaije, Boase iono kena ihali yo iselu bina sae intulu tehaike eni lelale hoko khutukeni.
Itneu be, “Ale sire mere?”
Ruta iralake be, “Amate, meije au, Ruta. Amate, alere kwali tau kai auku mokwai. Suke aseli beli hoko arana au kena amu bina.”Eleki Boase ibeteke lokoi be, “Kuanae, sebei TUHANE Iriluke misete etemu. Meije atiluke amu misete lesi bei akmenare leneka le mokwai beluka rebe esi taneia boka pise boka more, lalemu lokosi mo.
Bei mere hoko kaplalemu yake le pusue rebe akotiele au onoe, le pusue tamata mei kota meije esi rekwa ale bina rebe lale misete.
Tinai, suke au kai kaimu le au kai amu mokwaije kwali tau tumute. Po mokwai makete me sa rebe suke ikai kaimu, le ile mere kai amu mokwaije tumute lesi bei au.
Kpetu meije arue ete meije mina, bobanu beleti au tneui be isuka kai kaimu pibe mo. Sepo isuka kai, hoko mere mise, po sepo isuka mo hoko au la ete ale kena TUHANE rebe Ikwanare Eni nane be, au ono saisa rebe akotie meije. Meije antulu ete meije neka eti bobanu beleti.”
Hoko Ruta intulu ete mere tehaike Boase eni lelale. Bobanu memelene nuruije ibetu peneka leke tamata ete meru esi selui yake, le Boase isuka tamata sae irekwa mo be Ruta iluake lokoi me otoi mere.
Boase ibeteke loko Ruta be, “Obite nurui rebe aenue mere lesue lomei kai tataele ete meije.” Eleki ilesu obite nurui mere, kai inaikele. Boase isue jelai kena obite nurui mere kasuke kiloa butu telu, eleki ibitikele lolete Ruta malaije. Mere pela eleki Boase ikeu me kota.
Kena Ruta iluake me lumare, Naomi itneui be, “Kuanae, mula?”
Eleki Ruta ialenake pusue rebe Boase ionoe eteije.Kai iombe, “Boase iriluke jelai meije ete au, le iombe au leu le bala malenete loko inate ale yake.”
Eleki Naomi ibeteke lokoi be, “Kuanae, anamake neka, aselu eti yele meije epelare eono elia. Le Boase isupu rue ndene mo sepo yele meije pela pitoini meije mo.”