Yunuse 1
Kena petu sae me TUHANE Ibeteke loko Amitai eni nanae Yunuse be,
“Yunuse, akeu lolete kota Niniwe, kota elake ndetere kena meije neka, alepa ktili etesi be takwali moneka Au atia kotare kai pusue esi tamataru le Au selu esi neu titinai peneka.”
Po Yunuse ilene loko TUHANE Eni pletare mo hoko isuka naya lori kota Tarsise leke lau bei TUHANE. Ikeu lope Yapo eleki isupu kapale sae me rebe eono kena esabu lori kota Tarsise. Iseli kapale esi beline eleki isa lolete kapale leke ikeu kai tamata makerika me kapale lori kota Tarsise, leke ilau bei TUHANE.
Po TUHANE Iono makmale elake ekena meite eleki kohua ela titinai ekena kapale mere eti mahake atiae.
Tamata makerika me kapale rilasi, hoko sebeie sae eri ikotie loko saisa rebe ihlaleke lokole kai esi poie taneia rebe esi kerilu me kapale leke kapale emiri. Po Yunuse irulu lope kapale esi sokati mpe lebu solike peneka eleki intulu ete mere hoko iblake kwale moneka.
Maka keri kapale irulu lope eleki iselui eleki ibeteke lokoi be, “Kohu elake meije yo antulu blake kwale mone pe? Betu, kotie loko saisa rebe ahlaleke lokole, tinake etapa ite leke ite mata yake.”
Luasi sa lolete, eleki maka kerike me kapale esi beteke loko lomai be, “Mai ite poie undi leke ite rekwa be bei sire pine ite supu susate meije.” Esi poie undi eleki ekena Yunuse eni nane.
Esi beteke lokoi be, “Abeteke ete ami be amu makerike saisa kai aluake bei etia? Abei otoi andia kai bei bangsa saisa? Kai ite supu susate meije bei ale tinai o?”
Ibeteke lokosi be, “Aure tamata Ibrani, au hlaleke loko Tuhane, Alla rebe Indete surga, rebe Itolae meite kai kmalane.”
Eleki ialenake iatula kena inaya bei TUHANE etesi.
Kena maka kerika me kapale esi lene mere, rilasi lesi leneka kai esi beteke lokoi be, “Aono sala ela titinai peneka.”
Kena mere kohuaru tapa ela rame. Eleki esi tneui be, “Meije suke ami ono saisa ete ale leke meite ndenere?”
Iralakesi be, “Bitike au kai poie au lope meite hoko meite ndene kai kohuaru kena imi moneka, le au rekwa peneka be bei au pine kohua elaka meiju kena imi.”
Po esi atula titinai kena keri kapale lora lai ului, po esi ktili moneka le kohuaru tapa ela rame.
Eleki esi klolo loko TUHANE be, “TUHANE, ami poie tamata meije, rebe eni sala sasaisa ete ami mo po Ahukume ami bei yake, le TUHANE Aono saisare lulu Amu suka.”
Eleki esi poie Yunuse lope meite eleki meite endene sosoli.
Tamata meru rilasi le TUHANE titinai eleki kena esi tatire esi pala tanei ete TUHANE, kai esi janji ooani ete Tuhane.
Kena mere TUHANE Iono iane inai elake sae eluake kai elelu Yunus. Yunuse irue kena iane mere esi tibuine petua telu, pita kai kpetu.