Yunuse 2

1

Kena Yunuse ime iane mere esi tibuini laleije, ikotie loko TUHANE, Alla rebe itatu lokoIje be,

2

“TUHANE,

kena au supu susate, au kotie loko Ale,

Aralake au.

Kena mahake au matare au klolo lokoMue,

Alene loko au.

3

Aono tamata esi poie au kena meite esi nanuke titinai,

meite keholi au, kohu elake ekeri au.

4

Kai au noake be,

TUHANE, Asui au bei oaMue peneka.

Au selu suike

Amu luma misete titinaije moneka.

5

Kwele sa roma birukue peneka.

Meite ekeholi au peneka.

Meite esi tosale ekopa ulukue.

6

Au molo eti roma ulata kena meite esi ueije.

Au supu kwara. Lalane kena sirire sae mo, saka au kena tamata matale eni likele benaije.

Po au mata mo.

TUHANE, Alla rebe au tatu lokoIje Ihlamate au.

7

Kena mahake au mata nere,

au nete loko Ale,

eleki au kotie lokoMu,

Alene au bei Amu luma rebe mise titinaije.

8

Sie rebe esi tatu loko tuhane tinai mo rebe etapaisie saisa more,

esi trima Tuhane rebe Iokise mo.

9

Po au menani isike Ale

kai namake au pala tanei ete Ale.

Saisa rebe au talukele namake au onoe.

Ale TUHANE rebe Ahlamate au.”

10

Eleki TUHANE Iulake iane mere eloae Yunuse lora lai uluije. Hoko iane eloaeni lora lai uluije ne.