Job 20

Dung i ninna si Sopar na sian Naema ma mangalusi:

Sai masirapusan angka pingkiranku mangalusi hatahatam, pola gunsang rohangku di bagasan ala ni.

Ingkon pabegebegeonku hape pangajaran bahen haurahonku, alai tondi i manariashon paralusan tu ahu di bagasan rohangku.

Ndang diboto ho hapengani hata on sian na robi sahali dope, olat ni dung adong dipaojak jolma di atas tano on.

Satongkin sambing do suraksurak ni halak parjahat, jala las ni roha ni halak pangarupa sangkidop mata do lelengna.

Nang pe manaek sahat ro di langit hajungkatonna pola mandolos uluna tu ombun di rohana.

Ingkon buriapus ibana songon ginagatna sandiri ro di salelenglelengna, pola dohonon ni halak na marnida ibana na jolo: Didia ibana ulaning?

Songon doras ni nipi ibana habang, ndang be jumpang halak ibana, hiap do ibana songon alatan borngin.

Mata naung marnida ibana, ndang be idaonna ibana, jala ingananna hian pe, ndang umbolanna be.

Angka anakna pe ingkon manehenehe tu halak angka naung pinapogosna, jala tanganna sandiri paulakkon arta na nidobona.

Manggagat tu holiholina do dosa angka na niulana di sibunian, peak di bagasan orbuk do i rap dohot ibana.

Nang pe tonggi hajahaton i didai pamanganna, jala diongom ibana do i di toru ni dilana.

Lomo rohana paianianhon, ndang olo mambolongkon, tung dipaongomongom do i di bagasan pamanganna.

Hape muba do roti pinanganna gabe rasun dung ro di butuhana, gabe bisa ni ulok dari di bagasan ibana.

Sinamot naung binondutannai, ingkon utahononna muse, Debata sandiri tahe paruarhon i sian butuhana.

Nunga disopsop ibana bisa ni ulok dari, gabe dila ni ulok dari mambunu ibana.

Tung na so jadi be idaonna mabaor angka sunge sian situak ni loba dohot miak susu.

Ingkon paulahonna naung nilaumna, ndang jadi parsaulihononna; ndang tagamon las rohana mida hamoraon na nilahanganna i.

Ala naung dirupa ibana halak na pogos, jala dipupusi, jala nunga dilaum bagas, angka na so pinaulina.

Ai ndang olo sombu hisap ni butuhana, manang aha na pinangido ni hisapna i, ndang tagamon malua.

Nanggo sada ndang malua dibahen papanganna, dibahen i ndang tagamon ganda sinamotna.

Atik pe na mora jong hian ibana, gabe marpogospogos do, tung marsitampak do angka jea i mangonai tu ibana.

Jadi asa tung gok butuhana, tongoson ni Debata ma parpiarpiar ni rimasna tu ibana, jala diudanhon do i tu ibana bahen sipanganonna.

Ia sanga pe ibana malua moradophon sinjata bosi, garsang ma ibana bahenon ni sior haksa.

Ia dienet sumbia i, jadi ruar do nian sian dagingna, songon i nang podang sumillamsillam sian poguna, alai songgop do tu ibana songgotsonggot hamatean.

Nasa haholomon marsibuni di bagasan sinamotna, suda do i panganon ni api na so niombus ni jolma, ia adong pe teba di bagasan undungundungna, ingkon mago marambolongan do i.

Langit i huhut papatarhon hajahatonna, jala ia tano on hehe mangalo ibana.

Ingkon tarboan tu habuangan do sinamot na di bagasan jabuna, jala maup di ari pangarimasanna.

I ma jambar na pinatongon ni Debata tu jolma parjahat, jala teanteanan na pinatontu ni Debata tu ibana.