Job 21
Dung i ninna si Job ma mangalusi:
Sai tangihon hamu ma panariasonku, i ma nian singkat ni pangapulonmuna i.
Hasiati hamu ahu, asa hudok hatangkon, ia dung tolhas hudok, tole pe hamu manginsahi.
Tung tu jolma ma ahu marpangalualuan, leak ma marsak tondingku tung sura.
Dompakkon hamu ma ahu, asa tarhalomong hamu, jala mangampehon tangan tu pamangan.
Ai molo sapala marningot ahu disi, angka hitir do ahu jala manindang imbulu ni dagingku.
Boasa tung laos mangolu halak parjahat i, pola sanga sarimatua, jala lam tamba sinamotna?
Pinomparnasida marsonangsonang do di jolonasida, jala simbur magodang angka pahompuna dipaidaida matana.
Bagasnasida pe marhasonangan do ndang dung marhabiaran, jala ndang dung mangonai batahi ni Debata tu nasida.
Marbaringin lombuna jala ndang sala, rodot do lombuna maranak jala ndang dung habangan.
Disuru nasida anakkonna tu balian songon sada punguan birubiru, jala panihalnihalon angka anakna.
Marioho suaranasida mardongan gondang dohot hasapi, jala marlas ni roha nasida umbege suara ni tulila.
Dipasudasuda nasida ariarina marhariburon, hape tompu nasida lonong tu banua toru so pangkirimanna.
Lam didok muse dope tu Debata: Paholang ma sian hami, ai ndang lomo rohanami umboto angka dalanmu.
Pinabotoboto Ibana Nasunhinagogo i, umbahen tung oloannami Ibana? Jala tung aha ma gunana hami martangiang tu Ibana?
Ida ma, ndada guru di nasida hadoharonna i. Sai mandao ma sian ahu pingkiran ni halak parjahat!
Anggo piga hali do mintop palito ni halak parjahat jala songgop hamagoan tu nasida? Piga hali diturpukkon Ibana hinamago tu nasida di bagasan rimasna?
Jala piga hali nasida tudoshon durame moradophon alogo, jala tudoshon hurangkam pinurpurhon ni habahaba?
Tu pinomparna disimpan Debata torutoruna; tu ibana sandiri nian diluluhon Ibana, asa mananda nian rohana disi!
Matana sandiri nian sanga marnida hamagoanna; ibana sandiri nian minum sian rimas ni Nasunhinagogo.
Ai ndang disarihon rohana pinomparna, dung mate ibana, anggo dung gok bilangan ni bulan angka naung binuhul hian tu ibana.
Tung jolma ma mangajarhon parbinotoan tu Debata, Ibana balik manguhumi angka isi ni banua ginjang.
Sadaon mate apala di haroro ni gogona, uju di sun ni hadoharonna jala marhasonangan situtu dope ibana.
Uju gok horbo siporoan barana, jala gok utohutok dope holiholina.
Jala sadaan mate margondok ni roha situtu, jala ndang dung didai hasonangan.
Hape rap nasida modom di bagasan orbuk jala marsapu gulokgulok nasida duansa.
Ida hamu ma, tangkas do hutanda pingkiranmuna i dohot getegete ni rohamuna mangarupa ahu.
Ai didok hamu do: Didia do bagas ni halak sibahen gogo, jala didia do undungundung inganan ni halak parjahat?
Beha, ndang dung disungkun hamu halak pardalan pansar, jala ndang mananda hamu di partinandaannasida on?
Ai di ari hamagoan ndang marmara anggo halak parjahat, jala di ari gombunggombung ni tahi diiringiring halak do nasida.
Tung ise ma na hum patumpolhon tu ibana harohaonna adop bohi be, jala tung ise ma na hum mamaloshon tu ibana hombar tu na binahenna?
Lam dipataru halak dope ibana tu tanoman pasangaphonsa, jala marjaga dope di atas hinamborna.
Lambok marpeahan di atasna angka galogat ni rura i, jala luhut jolma naeng maniru pambahenna i, jala ndang habilangan toropna angka na mambahen songon i jumolo sian ibana.
Dibahen i boasa sai datdatanmuna mangapuli ahu so marguna; pangarimpunan ni sude alusmuna i, holan dosa do.