Acts 11

WANPORON o saulan kan, me mi Iudaa, ronadar, me men liki kan pil aleer masan en Kot.

Petrus lao pwara don Ierusalem, me kisan sirkomsais oko ap akamai on i indada:

Kom pwarala ren ol akai me so sirkomsais oko o mana re ’rail.

A Petrus pikikidi masani on irail karos me wiauier irerokedo masani:

Nai mi nan kanim lope wia kapakap. O ni ai wukilar, i kilaner kasansal eu: Ed eu kodido san nanlan likamata tein pwainok kalaimun eu, me imwi kan pukopuk pena o a kodido imp ai.

Ni ai kankakil, i ap diar o kilaner man aluki pa en sappa kai, o man laoalo, o man korop, o manpir en pan lan.

Nai ari ronadar nil eu, me masani on ia: Petrus, paurida, kamela o mana!

A nai potoan on: Kaidin Main, pwe sota me mal kot, de me saut kin ko on nan au ai.

A nil kariapak sapen san nanlan: Meakot me Kot kamakelekeledar, koe der mamaleki!

Mepukat wiauier pan silepak, ap apdar nanlan.

A kilan, madan ol silimen kasinenda mon im, me i mi lole, me pakadara don ia san Sasarea.

A Nen kotin masani on ia, i en ian irail wei so peikasal; a saulan wonemen pukat pil ian ia. Kit ari pedelon on nan im en ol o.

I ari kaire kin kit, duen a kilaner tounlan o kotikot nan im a, masani on i: Kadara won lope ol akai, me pan ukedo Simon me pil ad a Petrus,

Me pan padaki on uk, me koe o noumui kan karos pan maur kila.

Ni ai pikikidi padak, Nen saraui ap moredi on po ’rail, dueta a kotin moredi on po ’tail ni tapi o.

Nai ari tamanda masan en Kaun o, me a kotin masani: Melel, pil me Ioanes paptais kier, a komail pan paptais kila Nen saraui.

Ari, ma Kot kotin kisakisa irail dueta a kotin kisakisa kitail er, kitail me posonlar Kaun Iesus Kristus, is nai, pwe i en kak palian Kot?

Irail lao ronadar mepukat ap nenenla o kapina Kot indada: Nan Kot pil kotiki on men liki kan en kalula, pwen maurela.

A me muei pasan ni ansau en kamekam en Stepanus, kakan sili lel Ponisien, o Sipern, o Antiokien o sota padaki on meamen pwe Sus akan eta.

A nan pun arail ol akai mia, men Sipern o Kirene, me pwara don Antiokien, ap pil padaki on men Krik ronamau en Kaun Ieiuis.

A lim en Kaun o ieian irail o me toto posonlar wuki on Kaun o.

Ron en mepukat ap peidon momodisou en Ierusalem. Ir ari poronelar Parnapas, pwen kokola lel Antiokien.

I lao pwarador o kilaner mak en Kot, ap peren kidar o panaui irail karos, ren kelail ni monion arail o podidi on Kaun o.

Pwe i me ol kelail o mau amen, me dir en Nen saraui o poson. A aramas toto me wuki on Kaun o.

A ap kola Tarsus rapaki Paulus.

A lao diaradar i, ap ukedo i Antiokien. Ira ap mimi ren momodisou par eu o padapadaki on me toto. A nan Antiokien tounpadak kan tapidar adaneki sapwilim en Kristus akan.

A ni ran pukat saukop akai ko don Antiokien san Ierusalem.

A amen irail, me ad a Akapus me u kokopki Nen, me muei lek lapalap pan kipadi sappa; ari a pwaidar ni muein Klaudius.

A irail inauki pena, me re pan kisakia saulan kan, me mi Ierusalem duen ar kapwapwa amen amen.

Mepukat re wiadar; re kadar won saunkoa kan Parnapas o Paulus me wala.