Acts 12

I ANSAU nanmarki Erodes pikikidi kame akai nan momodi sou.

I ari kamata kila kodlas Iakopus ri en Ioanes.

A lao kilaner, me Sus oko peren kidar, ap pil saikidi Petrus. Nan i unsaun prot somut.

A saikidi i o kilan i nan imaten, o kasilaki i pwin en saunpei paieu. Pamen me wia eu pwin, pwe murin pasa a men kasale on pokon i.

Petrus ari sensal nan imaten amomodisou poden kapakapki I ren Kot.

Ponpon mon Erodes pan kasansaleda i, a saimokela nan pun en saunpei riamen, salikidi sal mata riapot. A silepa ko masamasan imaten mon wanim ko.

A kilan, amen tounlan en Kaun o pwarado o marain eu sarada nan imaten o. I ari pikir Petrus ni panepan o kapaurida i masani: Paurida pitipit! Sal mata ko ap pupedi san ni lim a kan.

A tounlan masani on i: Pirapirada o suteda! I ari wiadar met. A ap masani on i: Upupedi o idauen ia do!

I ari pedoido san o idauenla i, o a sota dedeki, me melel en tounlan a wiawia. Pwe a kiki on, me a auramandar.

Ira lao kotin daulier pwin en silepa kaieu, o kariau, ira ap lel on wanim mata, me salon kanim, i me pein ritida mo ’ra. Ira ari kotila pon al apot. A tounlan ap madan kotin rir san mo a.

A Petrus lao dedeki me wiauier, ap masaniada: I ap asa melel, me Kaun o kotin poronedo sapwilim a tounlan o kapit ia san ni pa en Erodes o san en Sus akan ar masamasan.

A ni a kotin madamadaua, ap lel on im en Maria in en Ioanes, me pil ad a Markus, wasa me toto pokon ia wia kapakap.

A ni en Petrus a letelet ni wanim o, lidu men, ad a Rode, ap pwara don ron.

A lao asa kapitie en Petrus, a sota ritinada wanim o pweki a peren. A a tanlon katitiki, me Petrus kot mon wanim o.

A irail indai on i: Koe iakala. A i kelail indada, me melel. Re ap inda: Kaidin i, a sapwilim a tounlan o.

A Petrus wiawia leteleteta. Irail lao ritinada o kilaner i, re ap puriamui kilar.

A i olole irail, en nenenla. A ap masani on irail duen Kaun o, me kotin kalua i san nan imaten o, o pil masanier: Kaireki Iakopus o saulan kan mepukat! I ap kotiei san kotilan ekis wasa.

A lao ran pasaner, saunpei kan ap puriamuiki kaualap en Petrus a pitilar.

A Erodes lao idok o so diaradar, ap itetokenkone silepa ko o masani, ren kamela. I ari kotilan Sasarea san Ierusalem kaukauson ia.

A Erodes onionidar pan men Tirus o Sidon, re ap wiaki eu poto don i kadekadeke Plastus saunkoa en nanmarki o poeki muei mau, pwe re kin memaureki sap en nanmarki.

A kadekadeo eu ran Erodes ap purion likau en nanmarki, kaipokedi pon mol o kapakaparok on irail.

A aramas akan nisinis indada: Nan i kapitie en kot amen, a kaidin en aramas.

A madan amen tounlan en Kaun o poki i, pweki a so wauneki Kot. A maas akan me kanala i; i ari mela.

A masan en Kot pwaida o lok sili.

Parnapas i Paulus puredo san Ierusalem, ira lao kanikielar ar dodok, o ira pil ukedo Ioanes, me ad a Markus.