Acts 22

RI ai ko, sam ai ko komail, ron mas ai sapen komail.

Irail lao roner, me a masani on irail ni lokaia en Ipru, re ap nenenla kaualap. I ari kotin masani.

Ol en Sus amen nai, me tikidar Tarsus en Silisia, a i kakairida nan kanim wet ni aluwilu en Kamaliel, padapadakki kapun en sam atail akan, o nantion poni poni Kot dueta komail kin wia ran wet.

O i kawelar al pot et lel on kamelar aramas, ni ai saliedi o panalan imaten ol o li akan.

Pwe iduen me samero lapalap o saumas akan kin kadede kin ia, pwe i aleer san irail kisin likau, on ri (atail) akan. I ap kolan Damaskus, pwen pil saliedi o wa don Ierusalem, me mi wasa o, pwe ren kamekame.

A ni ai koko wei korendor Damaskus, nin sauas, marain eu kodido san nanlan, sare ia da.

Nai ari pupedi nani pwel o ronada nil eu, me masani on ia: Saul, Saul, da me koe kame kin ia?

Nai ari potoan on: Is komui Main? A kotin masani on ia: Nai Iesus en Nasaret, me koe kin kame.

A me ian ia udialer marain o, ap masapwekadar, a re sota ron kapit en me masan don ia.

Nai potoan on: Da me i en wiada Main? Kaun o ap kotin masani on ia: Paurida u kowei on Damaskus, nan a pan kapare on uk wasa o, me kaonop on uk er, en wiada.

A i solar kak kilan wasa, aki linan en marain o, i ap daululan Damaskus; me ian ia kalua kin ia pa i.

Ananias, ol lelapok amen duen kapun o, me kalok mau sli ren Sus akan karos, me kauson wasa o,

Ap ko don ia kasikasinen imp ai indai on ia: Ri ai Saulus, kilanada wasa! Ari, ni auer ota i saradan i.

I ari katitiki: Kot en sam atail akan, me pil uk adar, pwe koe en lolekonki a kupur, o udial me Pun o, o ron kapit en sllan i.

Pwe koe pan sapwilim a saunkadede on aramas karos, duen me koe kilanadar o ronadar.

Ari, da me koe auiaui? Paurida o paptaisela, pwe dip om akan en widen san, o sakarkidan mar a.

A kadekadeo i lao pwara don Ierusalem o kapakap nan im en kaudok o, i ap wukilar.

O i kilan i, me kotin masani on ia: Kananata, madana wei san Ierusalem, pwe irail sota pan duki on om kadede kin ia.

Nai ari potoan on: Main, pein irail asa, me i panalan nan imaten o woki nan sinakoke kan me kin poson komui.

A ni sapwilim ar saunkadede Stepanus kamatalar, nai pil u impa o peren kidar a kamatalar, nekinekid likau en me kamatalar i ko.

A ap kotin masani on ia: U ko wei, pwe I pan kadar uk ala wasa doo ren men liki kan.

Irail roneron i lel on masan pot et, ap nil laudeda indada: Siken wei san sappa lap men et! Pwe a sota mau on, i en momaureta!

A ni arail weriwerada, o kaselar ar likau, o kasadar pwelpar,

Kaun lapalap o ap masani, i en wisikelan nan im en saunpei o masani, ren woki i, pwe i en lelapok kila, da me re weiwei lokeki i.

Irail lao saliedi i, Paulus ap idok ren kaun o, me u impa: Me pun, en woki aramas en Rom amen, me kaikenta pakadei kadar?

Kaun o lao ronada met, ap kola ren kaun lapalap o indada: Da me kom pan wiada, pwe aramas men et men Rom amen.

Kaun lapalap o ap kodo indai on i: Katitiki on ia, ol en Rom amen komui? A sapen: Ei.

Kaun lapalap o sapen: Pwai laud me i saladok kilar. A Paulus masani: A nai me tikidar saladok.

Me kodo kadeikada i, ap madan pure san i, o kaun lapalap lao asadar, me i ol en Rom amen, a pil masakadar, pweki a saliedi i.

A mandan ran o a inon ion melel asa karep en Sus oko ar panala i, ap lapwada i o kapokon pena samero lapalap o toun kapun o, ap wadila Paulus o kotikidi on i mo ’rail.