Ayub 1

Lan tondok Us den misa’ tau, disanga Ayub, tau iato mengkaola tongan sia bulo lollong sia mataku’ lako Puang Matua na umpatoyang kalena dio mai kadake.

Tau iato pitu tu anakna muane na tallu tu anakna baine.

Iatu apanna pitungsa’bu tu domba sola bembe’, tallungsa’bu tu unta, limaratu’ ayokana tu sapi, na limaratu’ keledai birang, sia buda tongan tu mai pa’dua’na, iamoto na iatu muane iato sugi’ lallang na iatu mai mintu’na pa’tondokan dio rampe matallo.

Biasa tu mai anakna muane umpogau’ pa’maruasan, sisonda-sonda lan banuanna, sia natambai tu mai anak daranna tallu kumande sia mangiru’ sola.

Ianna upu’omo tu allona pa’maruasan, natambaimi Ayub tu mai anakna, anna pamaseroi; attu iato mela’bik tongan millik, anna pennoloanni pemala’ ditunu pu’pu’ tu mai anakna simisa’-misa’i, belanna natangnga’ Ayub lan penaanna, kumua umbai umpogau’mo kasalan tu anakku sia tang umbilangmo Puang Matua lan penaanna. Susimoto tu tontong na pogau’ Ayub.

Den sangallo saemi tu mai anakNa muane Puang Matua umpennoloi PUANG sia sae duka tu deata bulituk nasisolan.

Ma’kadami tu PUANG lako deata bulituk, Nakua: Umbara tu munii sae? Mebalimi tu deata bulituk lako PUANG, nakua: Sulena’ salamba salao sia lu lako lu dio mai lan lino.

Ma’kadami tu PUANG lako deata bulituk, Nakua: Mupemarangamoraka tu taungKu Ayub? Belanna misa’ tau dao kuli’na padang tae’ susinna, lendu’ tongan mengkaolana, bulo lollongna sia mataku’na lako Puang Matua sia umpatoyang kalena dio mai kadake.

Mebalimi tu deata bulituk lako PUANG, nakua: Ungkataku’ punala bangraka Puang Matua tu Ayub?

Tang Kamu Kalenaraka tu urrinding pala’i sia banuanna sia mintu’ ianan napoapa tiku lao? Sia Mipamasakke tu bura rangka’na sia kerangngan tongan tu mai barang apanna lan tondok.

Apa iake Mie’te’i tu limamMi, amMi pata’pai tu mintu’ ianan napoapa, ma’apai nala tang mempayan sorong boko’ dio mai Kalemi?

Ma’kadami tu PUANG lako deata bulituk, Nakua: Manassa iatu mintu’ ianan napoapa lan nasang kuasammu; sangadinna da’ mue’te’ limammu umpata’pai kalena. Pakalan tassu’mi tu deata bulituk dio mai oloNa PUANG.

Den sangallo tonna marassan tu mai anakna muane sia anakna baine kumande sia unniru’ uai anggoro’ lan banuanna siulu’na, tu pa’bunga’,

saemi tu misa’ pesua lako Ayub, nama’kada nakua: Iatu mintu’ sapi marassan dipa’tengkoan sia iatu keledai birang marassan kumande dio lu la’pekna,

pakalan saemi tu to Syeba ullaoi anna rampai; iatu mai taummi napatei pa’dang; aku mannamo tu tilendok sae la umpokadangkomi tu iannato.

Marassan bangsiapa tu tau iato ma’kada, saemi tu to senga’ ma’kada nakua: Iatu apinNa Puang Matua songlo’ dao mai langi’ anna kandei tu mai domba sia mintu’ taummi napisanni; aku mannamo tu tilendok sae umpokadangkomi tu iannato.

Marassan bangsiapa tu tau iato ma’kada, saeomi tu to senga’ ma’kada nakua: Iatu to Kasdim umpasadia tallung tuntunan tau, ullaoi tu mai unta anna rampai; iatu mai taummi napatei pa’dang; aku mannamo tu tilendok sae umpokadangkomi tu iannato.

Marassan bangsiapa tu tau iato ma’kada, saeomi tu to senga’ ma’kada nakua: Iatu anakmi muane sia anakmi baine marassan kumande sia unniru’ anggoro’ lan banuanna siulu’na, tu pa’bunga’,

pakalan saemi tu talimpuru’ lu sambalin mai padang pangallaran, unnangka’i tu a’pa’ tetuk banua, anna songkai tu to mangura iato, anna mate nasang; aku mannamo tu tilendok sae umpokadangkomi tu iannato.

Attu iato ke’de’mi tu Ayub, na kake-kakei tu bayu lamba’na sia naku’ku’i tu ulunna, nalumbang rokko padang, tukku menomba, anna ma’kada nakua:

Ma’kale-kalena’ tassu’ lan mai pa’tambukanna indo’ku, la ma’kale-kale dukana’ sule lako. PUANG mangka umpa’benganni, PUANG mangka unnalai sule sanganNa PUANG la dipudi.

Lan te mintu’nate iatu Ayub tae’ nakasalan sia tae’ nasangai tang sipatu tu misa’ penggauranNa Puang Matua.