Ester 10

Napakannaimi sima datu Ahasweros tu tondok menggantananna sia iatu tondok ma’biring tasik.

Iatu mintu’ penggauranna tu tarompo’ sia mawatang sia kareba umpokada nasangi tu diona kataromposan, tu nanii datu umpakala’bi’ Mordekhai, tang tisura’moraka lan sura’ ossoranna mintu’ datu Media sia Persia?

Belanna iatu Mordekhai, to Yahudi, mendampi’ lako datu Ahasweros; sia mala’bi’ dio lu mintu’ to Yahudi sia budai tu mai siulu’na ungkamali’i, belanna undakaran kameloan bangsana sia umpokadai tu napomaupa’na mintu’ sangbangsana.