Ayub 12

Pebali bunga’na Ayub lako Zofar, kumua iatu pa’parentanna Puang Matua disanga tang malambu’ 1

Apa mebali tu Ayub nakua:

2

Manassa kamumo to paissan tongan: la sipulikomi tu kakinaan.

3

To paissan dukana’, susitu kamu, tae’ra ammi sau’na’; mindara tang untandai tu susinnato?

4

Napokatelleanna’ padangku ma’rupa tau, iatu aku Naperangiina’ Puang Matua, ke meongli’na’ lako Kalena; napokattellean to malambu’ sia to mengkaola lako Puang.

5

Taana to mandasa iamotu kadisayuan – susimoto tu pa’tangngaranna to maupa’; iamoto tu taana to tipa’re’ba.

6

Marampa’ tu tendana to ma’pakario-rio sia manaman tu to umpare’dek ara’Na Puang Matua, mintu’ tu to morai ungkuasai Puang Matua.

7

Apa mekutanako lako mintu’ olo’-olo’, anna ada’iko; sia lako manuk-manuk dao langi’, anna pamanassangko.

8

Ba’tu ma’kadako lako kuli’na padang, anna ada’iko, sia melo ke bale diong tasik unnuleleanni lako kalemu.

9

Mindara tu mintu’ apa iate tu tae’ natandai, kumua penggauran limanNa PUANG te?

10

Iatu deatanna mintu’ apa tuo, lan limanNa sia penaanna mintu’ ma’ rupa tau.

11

Tang nasudiraka talinga tu kada, sia tae’raka nale’i langi’-langi’ tu kande?

12

Denraka kakinaan dio to kaubanan, sia padaraka kamalamberan sunga’ tu kapaissanan?

13

Dio Puang nanii tu kakinaan sia kamawatangan, Puang unnampui pa’tangngaran sia patiro melo.

14

IanNa rondonni Puang, tae’mo nadibangun sule; iake Natarungkui tu tau, tae’ nadibungkaran.

15

Iake Nasapanni tu uai, marangke nasang; iake Napalolong pole’i, nabaliangan tu mai padang.

16

Dio Puang nanii tu kamatotoran sia patiro penaa, Ia umpoissan to dipapusa sia to ma’papusa.

17

Nasua tu to pebangun ada’ male susito makario-rio sia to ma’paolai salu Napadadimo to baga.

18

Nako’ka’i tu rante napa’pungoan datu, sia Napungo Puang tu aakna datu.

19

Iatu mai tominaa Nasua male susito makario-rio, sia minda-minda batta’ tumanan, Nasongkan.

20

Napopa’loko-lokomo tu to manarang umbuang kada, tu mai to naposande’ tau, sia untaeran tu tangnga’ melona to matua.

21

Napabuda tu kamatunanna to mala’bi’ sia Nako’karan tu pepori aakna to kuasa.

22

Napasombo tu mai apa mandalan lan mai to’ malillinna sia umpapayan lillinan parrak lako to’ kasianganna.

23

Napatarompo’ tu mai bangsa, anNa sanggangi tu tau iato, Napamalona’ lili’na tu mai bangsa sia Napali’ tu tau iato.

24

Naalai tu tangnga’ melona pangulunna tau lan tondok, sia Napapusa tu tau iato lan lu padang pangallaran tu tae’ lalan ditiro.

25

Sumalappa-lappa tu tau iato lan kamalillinan tu tae’ nakasiangan, Napapusa tu tau iato susito malango.

alkitab.me