Ayub 13
Manassa iatu mintu’nato natiromo matangku, sia narangimo talingangku sia kupalanmo penaangku.
Iatu apa mitandai, kutandai duka, tae’ra ammi sau’na’.
Apa moi susito, moraina’ ma’kada lako To umpoissan angge maritik lako Puang Matua la kunii umpokadai tu a’gangku.
Apa kamu to untannun kabuttokan, sia kamu sola nasang to ma’dampi tang tongan.
A’a kemmi ma’pakappa pissan bangmo! Iatu iannato la mipokinaa.
Perangii tu peta’tanku, sia palan penaai tu pa’pasala sun dio randan pudukku.
La mitongananraka tu Puang Matua, ke ma’kada tang tongankomi sia mitongananraka tu Puang, ke ma’kada buttokkomi?
La mipelindoraka tu Puang sia la bendanrokomika tu to untonganan Puang Matua?
La meloraka, ke Puang umparessakomi; ma’dinraka mipakena tu Puang, susitu ma’rupa tau dipakena?
La Naukung makarra’komi, ke ma’pelindo buni bangkomi.
Tae’raka nala umpatirambankomi tu kapasareongananNa sia tae’raka nala urrampoikomi kama’parondoan diona Kalena Puang?
Iatu kada misa’bu’ iamo peada’ dandanan sangka’ susito au, iatu mipobalulang balulang losso’ pitti’.
Perangiina’ ammi kappa, angku ma’kada, moi naapa-apa urrampoina’.
Kuala tu duku’ku kupatamai to’ alla’ isingku sia kupalan limangku tu sunga’ku.
Moi Namorai tu Puang umpateina’, tontong duka kurannuan; ondongpi iatu gau’ku moraina’ untongananni dio oloNa.
Belanna Puang tu la kupogaronto’ kasalamarangku, apa iatu to bulituk tae’ nabarani mennolo lako Puang.
Perangii melomi tu kadangku sia tanannimi talingammi tu apa kupamanassa.
Manassa iatu kara-karaku kupasirundunammo, kutandai, kumua tonganna’.
Mindara ma’din umbalina’ lan kara-karaku? Iake tonganni den, la kappana’ anna ka’tu sunga’ku.
Ia manna tu da’dua penggauran da Mipogau’i lako kaleku, manassa tae’ kula umpembunian kaleku dio oloMi.
Alai tu limamMi dio mai kaleku sia da napamataku’na’ tu apa mepatirambamMi.
La metambaKomi, angku mebali; ba’tu aku la ma’kada, amMi pebaliina’.
Sangapara tu kakelokangku sia kasalangku? Paissannina’ tu kapatodotintingangku sia kasalangku.
Ma’apai amMi buni lindoMi sia Misangana’ ualimMi?
MorairoKomika umpatirambanna’ susitu daun nairi’ angin, sia unnula’ dalame marangke,
miurungan ullampakanna’ toto’ mapalla, sia Mipakkan tu kakelokangku tongku mangura,
sia Mipatama sangkala tu lentekku sia Mipenniroi tu mintu’ tengkaku sia Misakkalanganni tu pala’ lentekku?
Iatu iannato la rampo lako tau, tu sanggang susito kayu manapo sia susito sampin nakande busung!