Ayub 14
Iatu tolino tu nadadian baine, tang masae lako tu allo katuoanna sia nabossa kamagiangan.
Susito bunga tiballa’ anna malayu, sia lendu’ susito bayo-bayo sia tae’ natontong.
Na iatu tau susito, Mipata’pai dukapa matamMi; Mitambaina’ angku mennolo dio oloMi dipaolai salu.
Denraka misa’ to masero tassu’ dio mai to tang masero – moi misa tae’.
Iake dipamanassami tu allona, sia iatu bilanganna bulanna dipatantumo dio oloMi sia Milampakmo tu anggenna, tu tae’ nama’din nalendu’i,
la Mipatampei matamMi, anna appa’ karapasan, naurungan napopaiman tu allona susito sumaro.
Belanna iatu garonto’ kayu dirannuan siapa, iake dilellengi, la mentaruk sule sia iatu taruk mane la dadinna tae’ natang tassu’.
Iake malaunmi tu uaka’na diong padang sia iatu garonto’na mate diong litak,
manassa mentaruk sule, ke unnambukki uai, anna mentangke susito tananan mane tuo.
Apa iake misa’ muane mate, manassa sumpandan sia tang pandiu-diumo; sia iake ka’tumi sunga’na tu tolino, umbara nanii torro?
Susito uai sumarambu diong mai limbong sia susito salu samere-merena sia marangke,
susi dukamo kasumpandananna tolino to sia tae’mo namillik sule; sae lako kapa’deanna pole’ tu langi’, tae’mo namalimbangun sia tae’mo napandiu dio mai kamammaranna.
Lala sia manii anna alai penaamMi umbunina’ lan lino to mate, sia Mirerungna’ sae lako soro’na tu kare’dekan ara’Mi; sia la Miagianna’ tu misa’ attu, Mimane ungkilalai polena’.
Iake matei tu misa’ tau la tuoraka sule? Iake susito, la ma’rannuanna’ lan mintu’ allo kamara’tasangku, sae lako saena tu passondaku.
La metambaKomi, angku mebali lako Kalemi, sia Mikamali’ tu panggaraga limamMi.
Iake susito, moi amMi ia’i tu tengkaku, tae’ tu kasalan Mitiro dio kaleku.
Iatu kapatodo-tintingangku la dipalan misa’ kandu’ sia dica’, sia iato kakelokangku la Mikapu’.
Susi misa’ buntu tuan tisambo’-sambo’, sia susi misa’ buntu tilampi’ dio mai inanna,
susi uai umpu’pu’i batu, sia uai saba’ ussapui barra’-barra’ dio lu padang, susimoto Minii ungka’tu pa’rannuananna tolino.
Misau’ sia Mipandasa sae lakona, iamoto namale, Mipopembali tu lindona sia Misua male.
Iake mala’bi’i tu anakna muane, apa tae’ naissanni; ba’tu iake mentobitti’i, moi misa’ apa tae’ natandai diona tau iato.
Ia manna tu diona a’ganna duku’na umperasai pa’di’ sia deatanna dosso diona a’ganna.