Ayub 20
Ma’kadami tu Zofar to Naama, nakua:
Manassa iatu tanga’ku totemo umparukuna’ umpebaliiko, belanna titu’dang tongan tu ara’ku.
Kurangimo tu peta’tan ussayuna’, apa iatu to ma’penaa tang paissan unpebaliina’.
Muissan tempon dioraka mai tu iannate, temponna tolino dipadao kuli’na padang?
Manassa iatu arrakna to tang mekaaluk sangparaanri, sia iatu kaparannuanna to tang umbilang Puang Matua sangattu’ bangri.
Moi na iatu kamatampoanna sae langngan langi’, sia kamadongngaranna untu’tun salebu’,
la pa’de sae lakona susito tainna; minda tu untiroi la ma’kada nakua: Umbamira?
Pa’de susito pangimpi sia tang diappa’mo, disapui susito patiro mendeata ke bongi.
Iatu mata umpenunui tae’ natiroi, sia iatu inan katorroanna tae’mo natiroi sule.
Iatu anakna la undaka’ pa’kamaseanna to bitti’ sia limanna kalena la umpasulei tu barang apanna.
Moi porepa kamatotoranna tu bukunna, la sumpandan tu iannate sola tau iato lan to’ barra’-barra’.
Moi anna matappa’ tu kakadakean lan sadangna, moi anna bunii diong to’ lilana,
moi nananna sia tae’ napamalei, moi anna patananni lan to’ langi’-langi’na
manassa duka la membali tu kandena lan tambuk barinni’na, la mendadi susito ipo ula’ rame lan tambukna.
Iatu ianan naampello’mo, apa la nalua sule, Puang Matua tu umpatassu’i lan mai tambukna.
La namimmi’ tu ipo ula’ rame iato, la napatei lila ula’.
Tae’ nala umpopaimanni salu’-salu’na sia salu mandirri’na tani’ enoan sia dadik.
Iatu barang naala masussa, la nasorong sule, – tae’ nama’din unnampello’i, – susi duka tu barang apa naappa’ tete dio ma’ balili umpasituka’ apa senga’, tae’ napoparannui.
Belanna napakario-rio tu to bitti’ sia nasa’biangan bang, sia napanglo’do’i tu misa’ banua, apa tae’ nakullei umbangunni.
Manassa tang untandai karapasan lan ba’tengna, sia tae’ nala tilendok sola iananna.
Tae’ bang apa tilendok napobua’ kabarakanna, iamoto natang marendeng tu rongko’na.
Moi anna kala’bian narampoi duka taku’, sia kamatilakan kapua tongan urrampoi.
La Napa’pediaran tau iato iamoto Narampananni Puang Matua tu kasengkean dukkunNa ullaoi, tu Nabarrakan susito uran lako kalena napokande.
Moi napallaian tu kalena dio mai pa’buno bassi, la natarru’ duka pana gallang.
Moi nadu’dukki tu tinaran, naurungan tassu’ lan mai boko’na, sia sun tu tinaran lan mai pa’dunna: Katirambanan kapua duka urrampoi.
Mintu’ kamalillinan didampapa lako tu apa nananna; iatu api tang napamurru’ (tolino) unnimbakanni sia ungkande pu’pu’i tu apa torro lan tendana.
Napapayanmo langi’ tu kakelokanna, sia tunannangmo tu kuli’na padang umbalii.
Iatu apa dipopa’toppo’mo lan banuanna malemo dibaa, disapuimo ke allo kasengkeanNa Puang.
Iamoto tu taana to tang mekaaluk lu dio mai Puang Matua, sia iatu taa mana’na Napamanassanni Puang Matua.