Ayub 21

Pebali ma’penduanna Ayub lako Zofar, iamotu disanga kumua tontong tu upa’na to tang mekaaluk 1

Apa mebali tu Ayub nakua:

2

Perangii meloi te kadangku; melo tu iannato mendadi misa’ pa’pakatana mipa’bengan.

3

Sa’barasampa’, angku ma’kada, sia iangku mangkamo ma’kada, ma’dinmokomi ma’telle.

4

Iatu sarroku lu lakoraka tolino? Ma’dinraka kusa’barasan to?

5

Sailena’ ammi paressa tonganni, manassa la magiangkomi sia ma’tampun pudukkomi.

6

Iake kutangnga’i tirambanna’ sia narampoina’ kama’parondoan.

7

Ma’apari natuopa tu to tang mekaaluk, anna matua induk, anna sakerangngan-rangnganna tu kamatotoranna?

8

Iatu bati’na tontongpa torro sola, sia iatu tarukna sitiro lindo bang.

9

Iatu banuanna marampa’, tang narandan kamatakuran, sia tang narampoi pebambaNa Puang Matua.

10

Iatu sapi lakinna, ke mangrundu’i tang sala len, iatu sapi birangna kianak sia tang kalo’doran.

11

Napatassu’ tu mai anakna muane susito domba sangtuntunan, iatu mai anakna sipekkondongan tiku lao.

12

Menani napasiala ganda’-ganda’ sia su’dekan, sia parannu-rannu napasiala oni suling.

13

Sipeupu’ allo katuoanna tu kamauparanna, sia marampa’ mengkalao rokko lino tomate.

14

Apa ma’kada lako Puang Matua nakua: ToyangKomi dio mai kaleki, belanna tang kiporai untandai tu lalanMi.

15

Apara gai’na lako kaleki tu To umpoissan angge maritik, kumua angki pengkaolai sia apara gai’na lako kaleki, kumua angki pengkamoyai?

16

(Mikua ma’kada, kumua): Manassa iatu rongko’na tae’ naissanna kalena, iatu pa’timbanganna to tang mekaaluk toyang ia dio mai kaleku.

17

Pembuda maro’mo dipa’dei tu lampunna to tang mekaaluk, sia narampoi kasanggangan tu tau iato. Anna papatui Puang kamaparrisan tu tau iato tete dio kasengkeanNa.

18

La susito dalame napettiaran angin, sia susi ta’pian nasarombonan angin bara’.

19

Nananna Puang Matua tu pa’pandasa lako anakna. (Apa ma’kadana’ kukua): sipatu tu Puang umpapakkanni tu kalena tau iato, namane ussa’dingi;

20

matanna kalena sipatu la untiroi tu kasangganganna, sia ia kalena sipatu unniru’i tu kare’dekan ara’Na To umpoissan angge maritik.

21

Denraka nala umpalan penaai tu to lan banuanna ke matemi, ke dika’tumi tu bilangan bulanna?

22

Denraka misa’ tau unnada’i kapaissanan Puang Matua, anNa Ia umpaolai salu tu to dao suruga?

23

Iatu misa’ tomate lan kamawatangan tang lelukna, iatu penaanna rapa’ tongan sia manaman;

24

iatu aakna malompo tongan, sia malunak tu utak bukunna.

25

Iatu senga’na mate mapalla tongan, tu tang ussa’ding len melona.

26

Pada sumpandan lan to’ barra’-barra’, sia ulli’-ulli’ ussamboi tu tau iato.

27

Manassa kutandai tu pa’timbangammi sia iatu pa’tangngarammi minii ussau’ parrangna’,

28

ammi ma’kada kumua: Umbamira tu banuanna to paa iato? Sia umbamira tu tenda natorroi to tang mekaaluk?

29

Tae’raka mipekutananni lako to lendu’ lalan – tae’ ammi ma’din umpeonganni tu pa’patudunna tau iato –,

30

kumua iatu to kadake dikarimmanni ke allo kasanggangan, sia disolan marampa’ ke allo kare’dekan ara’Na Puang Matua?

31

Mindara unta’tanni tu penggauranna tau iato dio tingayona? Sia iake umpogau’i misa’ apa, mindara la umpapakkanni?

32

Dipasonglo’ lako to’ panglamunan, sia dikampai melo tu buttu-buttu panglamunanna.

33

Dilemongan melo litak disamboanni diong lombok, pantan undi unturu’i, sia dolo dio tingayona tu to tang dikemba’ diia’.

34

A’a, matumbai mipakatanana’ kada tang kebattuan, sia iatu pebalimmi pa’pakena manna tu lisa’na!

alkitab.me