:
Pebali ma’pentallunna Ayub lako Elifas, iamotu Ayub morai untonganan kalena dio oloNa Puang Matua 1 Apa mebali tu Ayub nakua:
2 Totemo iatu sarroku kapabali-baliammo, moi na iatu kasumarroangku natampunpa limangku.
3 A’a, kengku kabu’tui tu Puang, kengku lambi’ori tu inan layukNa!
4 Manassa la Kurundunan tu kara-karaku lako Kalena sia buda tu tanda katonganangku la kusa’bu’.
5 Angku rangii tu kada Nabalianna’ sia kutandai apa tu la Napokadanna’.
6 La Naeara’ka Puang tete dio kakuasan kapuaNa? Tae’, apa Ia la umpalan penaanna’.
7 Manassa iatu to malolo la untonganan kalena dio oloNa Puang, sia tongtongna’ tilendok dio mai To ma’paolai salungku.
8 Manassa, iangku ma’palutama rampe matallo, tae’ tu Puang dio, sia iangku ma’palulako rampe matampu’, tae’ kukabu’tui dio;
9 iake mengkarangi tu Puang dio rampe daanna lu, tae’ kupemarangaI, iake sulei ma’palusau’, tae’ kutiroI tu Puang.
10 Belanna Naissan Puang, umba nakua tu lalan penggaurangku; iake Nasudina’ tassu’na’ susito bulaan.
11 Iatu tengkaku tontong unturu’ bate lalanNa Puang, kuturu’ tu lalanNa tang sumepang len.
12 Iatu pepasan sun dipudukNa tae’ kupatoyangi, lan ba’tengku kuanna tu kada Nasa’bu’.
13 Apa tang leluk tu pa’inaanNa Puang-mindara ma’din umpadapai? Apa tu naala penaanNa, Napalalo duka.
14 Belanna Puang la umpalanda’i tu apa dilampakanna’, sia budapa tu susinnato lan penaanNa.
15 Iamoto tirambanna’ dio oloNa; iake kutangnga’ tonganni tu iannato, ma’parondona’ ungkataku’I tu Puang.
16 Belanna Puang Matua umpabonnongi tu penaangku, sia To umpoissan angge maritik umpatirambanna’;
17 belanna tae’ angku sabu’ natumang kapittukan, sia belanna nasamboi kamalillinan tu lindoku.