Ayub 22

Kada ma’pentallunna Elifas, nakua iatu Ayub la mengkatoba’ dio mai kasalan kapuana 1

Attu iato ma’kadami Elifas, to Téman, nakua:

2

Ma’dinraka tu tolino Napomaupa’ Puang Matua? Tae’, sangadinna iatu to unnampui tangnga’ kinaa umpamaupa’ misa-misa kalena.

3

Napomaupa’raka To umpoissan angge maritik ke malambu’ko, ba’tu Naporongko’raka, ke mukaritutui tu lalanmu, anna malolo?

4

La Naukungrokoka Puang diona kapengkaolammu lako Puang Matua sia la Napaolairokoka salu?

5

Tang kapuaraka tu kakadakeammu sia la ka’turaka tu kakelokammu?

6

Belanna mutoe bang tu apanna siulu’mu natae’ patunna, sia mulendokan tu tamangkalena to mase-mase;

7

sia tang mupairu’ uai tu to mata’ka’, sia tang muben roti tu to tangdia’;

8

apa iatu to ma’takia’ mawatang unnampui padang, sia to mala’bi’ tu umpa’tondokki;

9

iatu to balu musua sule lo’bang, sia mule’to tu takia’na pia biung.

10

Iamoto natikuiko poya sia ta’pa napabuyu’ko katirambanan.

11

Tae’raka mutiroi tu kapittukan sia iatu uai saba’ ussamboiko?

12

Tang unnisungiraka matandena langi’ tu Puang Matua? Tiroi, sangapa malangka’na langngan tu bintoen!

13

Apa ma’tangnga’ko mukua: Apara natandai tu Puang Matua? Ma’dinraka ma’paolai salu tu Puang lan mai kapittukan?

14

Iatu salebu’ ussamboi Puang, iamoto natae’ Natiroi; unnola arru’ tibangkona langi’.

15

Naalaraka penaammu umpeolai bate lalan dolo, tu pura naola to bulituk,

16

tu to disintak anna tang attunnapa, sia disapui tu parandanganna susito uai mandirri’?

17

Tu ma’kada lako Puang Matua nakua: ToyangKomi dio mai kaleki! sia: Apara tu ma’din Napogaurangkanni To umpoissan angge maritik?

18

Sia inang Puang tu umponnoi kaseboan tu banuanna. Apa iatu pa’timbanganna to tang mekaaluk toyang dio mai kaleku.

19

Iatu to malambu’ untiroi tu iannato anna parannu, sia iatu to tang kasalan untelle-tellei tu tau iato,

20

nakua: Tonganna iatu ualingki mangkamo disanggang sia iatu ianan mana’na puramo nakande api.

21

Mengkara’pako lako Puang, ammu marampa’; iamoto anna kapua tu upa’mu.

22

Tarimami tu pangadaran sun dipudukNa, sia palanmi penaammu tu kadanNa.

23

Iake mengkatoba’moko lako To umpoissan angge maritik, la dibangunmoko; iake mupatoyangi tu katangmaloloan dio mai tendamu,

24

sia iake mutibei tu bulaan tang dikombong tama to’ barra’-barra’, sia bulaan Ofir rokko to’ batu lan tangnga salu,

25

sia iake To umpoissan angge maritik umpoianan bulaan tang dikombong, sia umpoianan salaka,

26

iake susito, manassa mupoparannu tu To umpoissan angge maritik sia mentingara langnganko Puang Matua.

27

Iake massambayangko langngan Puang, la Naperangiiko, sia la mupalesso’ tu pangallonammu lako Puang.

28

Iake mupamanassai umpogau’ misa’ apa, la danun tu iannato, sia iatu arrang la parrang dio lalanmu.

29

Moi dilese lu rokkoko, ma’kada layuk siapoko! sia minda-minda umpamadiongan pentirona, Puang la untundui.

30

Ia duka tu to kasalan manassa Natundui Puang, sia tete dio kadiseroianna limammu ammu ma’din dikarimmanni.

alkitab.me