Ayub 27
Napatarru’mi Ayub umpokadai tu kada peada’na nakua:
La lelukraka tuoNa Puang Matua, tu umpadapa katonganangku, sia la lelukraka tuoNa To umpoissan angge maritik tu umponnoi penaangku kamapairan,
ianna nii tongan siapi penaangku tu kaleku, sia pa’pamurru’Na Puang Matua lan to’tok illongku,
manassa iatu pudukku tae’ anna la umpokada tang malolo, sia iatu lilaku tae’ anna la ussa’bu’ buttok.
La toyang dio mai kaleku tu la ussanda tongannikomi; sae lako ka’tunna sunga’ku tae’ angku rampanan kadangku, kumua tae’ kukasalan len.
Kupatontong unnakui tu kamaloloangku sia tae’ kurampananni; iatu penaangku moi misa’ alloku tae’ napasalai.
Iatu a’ganna ualingku dennoupa’ nasusi to tang mekaaluk, sia iatu to umbalina’ la susito leko’ penaanna.
Belanna apara tu narannuan to tang umbilang Puang Matua, ke Naka’tumi Puang Matua tu sunga’na, sia ke Natuntunmi tu deatanna?
La Naperangiiraka Puang Matua tu petambana umpalaku pa’tunduan, ke narampoimi kapussakan?
Ma’dinraka umpoparannu To umpoissan angge maritik, sia metamba la massambayang langngan Puang Matua, lan mintu’ attu?
La Kuada’ikomi pa’patudu limanNa Puang Matua, sia iatu apa lan penaanNa To umpoissan angge maritik tae’ angku la umbunii.
Inang mintu’komi untiro kalenai: ma’apari ammi ma’tangnga’ tae’ gai’na?
Inde sia tu taana to tang mekaaluk dio mai kaleNa Puang Matua sia taa mana’na to ma’pakario-rio, tu natarima dio mai To umpoissan angge maritik.
Iake samemba’ka-ba’ka’nai tu anakna iamo kandena pa’dang, sia iatu bati’na tang napedia’i kande;
minda-minda tu tinampe siapa dio mai tau iato, dilamun narampoi saki ropu, sia tae’ nabatingi baine balunna tu tau iato mai.
Moi anna popa’toppo’i tu doi’na susito barra’-barra’ sia napasadia tu mai pakeanna susito losso’ pitti’,
naparandanmo, apa to malambu’ ia tu la umpakei, sia to tang kasalan untaai tu doi’.
Ia umbangunni banua susito panggaraga busung, ba’tu misa’ lantang, susitu nagaragai to ma’kampa.
Umbambangan kalena mamma’ situang kasugiranna, apa tae’ nama’din umpogau’ pole’i, umbangunan matanna, anna moi misa’ apa tae’mo natiro.
Pa’patiramban untu’ba’i susito uai saba’, iake bongi natuli angin bara’ male;
napettiaran, angin rampe matallo, anna pa’de; sia nasabak male dio mai inanna.
Puang tang ungkasayangi umpanai, la madomi’ mallai urrampanan kalena dio mai limanNa Puang.
Massala’pa-la’pa tu mai tau diona tau iato sia ma’uik-uik untellei, kemalei untampe inanna.