Ayub 28

Den duka tu padang nanii tau umpabu’tu salaka, sia inan tu nanii tau unnembong bulaan;

iatu bassi diala diong mai padang sia batu dikombong anna dadi gallang.

Natappui tau tu kamalillinan, sia sumpu sae rokko nanii tau umparessai tu membatunna lan kamalillinan sia lan kapittukan.

Nabo’bok tau tu pambo’bok pangembongan sitoyangan tu naninna tau; mendoyang tu tau sia tae’ namellese, sitoyangan tau tu nanii mempoyang.

Padang nanii bu’tu kande – diong padang iato nasuale tau susito pa’kandean api.

Iatu membatunna nanii tau ungkabu’tui batu lasuri’, tu untambuk bulaan bubuk.

Iatu lalan lako – moi langkan tae’ natandai, moi mata pa’bulan tae’ duka natiroi;

iatu olo’-olo’ masa’ga’ tae’ duka nalesei, tae’ duka natengkai singa.

Natoemo tolino tu batu makarra’ sia nasuale tu buntu randuk dio mai oto’na;

napa’ lan tu buntu batu sia natiro matanna tu ma’rupa-rupa pareanan ballo;

nalepe’ tu kalimbuang ulunna salu, sia napabu’tu tu membuninna.

Apa iatu kakinaan – umba dinii unnappa’i sia umbara nanii tu inanna patiro penaa?

Iatu tolino tae’ natandai tu angga’na sia tae’ nadiappa’ lan tondok to tuo.

Iatu uai mandalan ma’kada nakua: Iatu iannato tae’ lan kaleku sia ma’kada tu tasik nakua: Iatu iannato tae’ kusisola.

Iatu iannato tae’ nama’din bulaan massang dibayaranni, sia tae’ duka nama’din ditimbangan salaka diallianni;

sia tae’ duka nama’din dibutunganni bulaan matasak dio mai Ofir, sia tae’ duka nama’din ke ake’ ido ballo sia lasuri’.

Tae’ nadipapada angga’na tu bulaan na sammin, sia tae’ duka nama’din dipasituka’ pareanan bulaan massang.

Iatu gewang sia kinang tae’ angga’na ke dipasitintii, sia iake diampui tu kakinaan losong ia na iatu merdan.

Tae’ nama’din dipapada angga’na parimata krisoli’ dio mai Etiopia, sia tae’ nama’din dibutunganni bulaan bubuk massang.

Iatu kakinaan iate – umbara nanii sae, sia umbara nanii inanna tu patiro penaa?

Karerungan dio mai mintu’ apa kepenaa, moi anna manuk-manuk dao langi’ kabunian duka lako.

Iatu bambana mukkun sia kamatean ma’kada nakua: Kirangimo tu karebanna.

Iatu lalan lako kalena Natandai Puang Matua, Naissan Puang tu inanna.

Belanna Puang mentiro sae lako randan langi’, iatu mintu’ apa nasambo langi’ Natiro nasang.

IatonNa pamanassai tu kamatotoranna angin, sia Nasuka’ tu kauaianna,

iatonNa pantokki tu atoranna uran sia Napamanassa tu mai lalanna lila kila’,

attu iato Natiromi Puang tu kakinaan sia Napa’peissanan, Napadiomo to’ inanna sia tarru’ Naissan tu kakinaan;

apa lako tolino ma’kada Nakua: Manassa iatu kamatakuran lako Puang – iamo kakinaan sia toyang dio mai kakadakean, iamo patiro penaa.