Ayub 32

Attu iato natorroimi te tau sola tallu umpebalii Ayub, belanna malolo dio passanganna.

Re’dekmi ara’na Elihu, anakna Barakheel, to Bus, to bu’tu dio mai tongkonan Ram; re’dek ara’na lako Ayub, belanna nasanga Ayub malolo tu kalena dio oloNa Puang Matua,

sia re’dek duka ara’na lako sangmanena sola tallu, belanna tang naissan umpebalii Ayub, namoi susito nakua manassa sala tu Ayub.

Apa ma’peagi tu Elihu la napa’kadai Ayub, belanna matua ia tu tau iato mai na ia.

Apa iatonna tiromi Elihu, kumua iatu tau tallu tae’mo natiku’bi’ pudukna mebali, re’dekmi tu ara’na.

Ma’kadami tu Elihu, anakna Barakheel, to Bus, nakua: Mangurapa’ aku na iatu kamu matessekmokomi; iamoto angku matangka sia mataku’ umpokadangkomi apa tu kutandai.

Kutangnga’ kumua: Melo ke to matua induk tu ma’kada, sia to banu’ karurungan umpa’peissananni tu kakinaan.

Manassa kumua iatu penaa lan ba’tengna ma’rupa tau sia penaanna To umpoissan angge maritik, tu umbenni kapaissanan lako tau iato mai.

Tae’ra natomatessek tu unnampui kakinaan, sia tae’ra natomatua ulu tu untandai apa malolo.

Iamoto kuma’kada kukua: Tanannina’ talinga, angku pokada dukai tu apa kutandai.

Tonganna, kupeagi tu buangan kadammi, kuperangii tongan tu pa’tangarammi, sae lako mitanga’tanga’ meloi tu apa dipokada.

Kupalan penaamokomi, apa manassa moi misa’komi tae’ ussau’ kada Ayub, moi misa’komi tae’ umpebalii tu uleleanna.

Da’mo mima’kada kumua: Kamimo tu unnappa’ kakinaan; sangadi Puang Matua, moi misa’ tolino tae’ nakulle untalo kadai.

Iatu aku moi misa’ kada tae’pa nasa’buranna’, na iatu uleleammi tae’ angku pebalii.

Bendan bangmo kanunu-nunu, sia tae’mo namebali len; tang naissanmo ma’kada;

ma’peagi bangna’, belanna tae’mo nama’kada tu tau iato, belanna bendan dio anna tang naissanmo mebali.

Totemo aku dukamo tu nalambi’ la mebali, aku dukamo tu la umpa’peissananni tu apa kutandai.

Belanna nakabu’mo’ tu kada, sia iatu penaa lan ba’tengku umpatiakka’na’;

manassa iatu ba’tengku susimoto uai anggoro re’de-re’de lempan; susito kiriba’ ba’ru la tesse.

La ma’kadana’, anna masorok tu ara’ku, sia umpatiku’bi’na’ randan pudukku la mebali.

Moi misa’ tau tae’ kupelindoi, sia moi misa’ tau tae’ kutendengi,

belanna iatu pa’tendeng tae’ kupobiasai, iake susito, na Totumampakumora umputtaina’ madomi’.