Ayub 33

Totemo, e Ayub, perangii tu uleleangku, sia tananni talinga tu mintu’ kadangku.

Manassa, umpatiku’bi’mo’ randan dipudukku, ma’kadamo tu tongka’ dililaku.

Iatu kadangku umpamanassai tu penaa bulo lollong, sia iatu apa dio randan dipudukku, malambu’ tu nasa’bu’.

PenaanNa Puang Matua tu umpadadina’ sia penaa ma’pamurru’Na To umpoissan angge maritik umpatuona’.

Iake mikullei, pebaliimo’, sakka’mokomi umbalina’ sia tunannangmokomi.

Manassa, iake dio oloNa Puang Matua, samaki’, aku duka ditampana’ dio mai losso’ pitti’.

Iamoto da mipotirambanni tu diona aku, iatu pa’temme’ku tae’ nala magasa lako kalemi.

Apa iatu pa’perangingku mangkamo mipokada, sia iatu gamarammi kurangimo mikua:

Maserona’ aku, tae’ kapatodo-tintingangku, malinona’ sia tae’ kakelokangku;

manassa Puang untandai apa bannangna Nanii umpoualina’, Nasangana’ susito ualinNa;

Napatama sangkala tu lette’ku, sia Napenunu tu mintu’ lalanku.

Manassa tae’ mitongan tu dionato, susimo pebalingku to lako kalemi, belanna iatu Puang Matua mandu mala’bi’ namisa’ tolino.

Ma’apai ammi sigaga Puang Matua, anna moi misa’ penggauranNa tae’ Nasondai.

Belanna sanguluan ba’tu duang uluan tu lalan Napake Puang Matua ma’kada, apa tae’ napalan penaai tolino.

Iamotu lan misa’ pangimpi, sia lan misa’ patiro mendeata kebongi, ke narampoimi mamma’ kalupi-lupian tu tolino, ke mamma’i dao patindoanns-

attu iato Napalidan Puang tu talinganna ma’rupa tau, sia Naca’ tu pa’pakilala Naparampo lako tau iato,

la umpatibalikki tu ma’rupa tau dio mai penggauranna, sia la umpatoyangi tu tolino dio mai kamatampoanna,

la urrampanan deatanna diong mai panglamunan, sia iatu sunga’na da naka’tu kandean doke.

Iatu tolino dipakilala duka diona kamapa’diran dao patindoanna, anna tontong sirari tu kamapa’diran lan buku lampana;

attu iato nakagi’gi’ ba’tengna tu kande, sia nakagi’gi’ penaanna tu kande biasa nakaduangi.

Iatu duku’na tikkurrungmo, tae’mo natiroi tau, iatu bukunna, dolona tang mempaan, totemo sisumbamban-bambanmo ditiro,

naurungan iatu deatanna mengkareke’mo lako panglamunan sia iatu sunga’na ma’palulakomo kuasa ma’pamate.

Iake den misa’ malaeka’ bendan untundui, iamotu misa’ pa’bisara, misa’ lan sangsa’bu, la umpamanassai lako misa’ tau tu apa sipatu la napogau’,

manassa la Nakamasei Puang sia la ma’kada Nakua: Rampananni, kumua da nalurokko panglamunan, Kuappa’mo tu pangla’bak.

Mandu manaman tu kalena na iatonna mangura, mentomalolle’omo sule.

Massambayang langngnan Puang Matua, anNa paiman untarimai, naurungan silindo Puang situang kamela’tekan, anNa Puang umbenni sule tu kamaloloanna tolino.

Pakalan napa’perangiammi lako tolino tu penanianna sia ma’kada nakua: Mangkamo’ kasalan sia umpakelok salunna, apa tae’ angku dipabala’i.

Mangkamo tu Puang urrampanan sunga’ku dio mai lalan lu lako panglamunan, anna paiman tu deatangku untiro masiang.

Manassa inde sia tu mintu’ apa napogau’ Puang Matua lako tolino, penduan ba’tu pentallun,

iamotu umpasule deatanna tau dio mai panglamunan, naurungan naarrangi arrang katuoan.

Palan penaai te, e Ayub, sia perangiina’; ma’pakappakomi, angku ma’kada.

Iake den misa’ apa mipokada, pebaliina’; ma’kadamokomi, belanna morai siana’ untonganangkomi.

Apa iake tae’, ma’perangimokomi lako kaleku; kappakomi angku ada’ikomi kakinaan.