:
Kada bunga’na Bildad, kumua Puang Matua mangukung unnola salunna 1 Ma’kadami tu Bildad, to Suah nakua:
2 Sangapaporoko la ma’kada susito sia mintu’ kada sun dio pudukmu butung to angin bara’?
3 Ma’dinraka tu Puang Matua umpakelok salunna, ba’tu ma’dinraka To umpoissan angge maritik umpakelok kamaloloan?
4 Umbai kasalammo tu mai anakmu lako Puang, iamoto Naparampoi poleanna tu kapatodo-tintinganna.
5 Apa iake mudaka’i tu Puang Matua sia umpengkamoyai kamaturu-turuanna To umpoissan angge maritik,
6 iake maseroko sia bulo lollong, manassa la tiakka’mo tu Puang untunduiko sia umpasuleko lako tampa rapa’mu sitinaya kamaloloammu.
7 Iake susito iatu a’gan dolomu baitti’ ditiro, apa a’gan undimmu la mandu tarompo’.
8 Belanna la mupekutanan lako to dolona sia palan penaai tu pa’tangngaranna nene’ siosso’na.
9 Iake kita to dadi sangmai’ki’, moi misa’ apa tae’ taissan; belanna susito bayo-bayo tu allo katuoanta dao kuli’na padang.
10 Tang la naada’irokoka tu tau iato sia tang la napokadanrokoka, sia la umpatassu’ kada lan mai ba’tengna?
11 Tuoraka tu tuyu, ke tae’i nalan to’maranona? tuoraka tu marrang, ke tang dioi to’ biring uai?
12 Tuo melopa, tae’pa nama’din disasa’, anna ta’pa malayu dolo namane iatu mai riu senga’.
13 Dipasusimoto tu to tang ungkilalai tu Puang Matua, sia ka’tumo tu apa narannuan to tang mekaaluk.
14 Iatu mai apa narannuan susi misa’ bannang serang laa-laa, sia sanderanna butung misa’ serang laa-laa.
15 Umposande’ banuanna, apa tae’ nabendan, nadammak tu iannato, apa tae’ natumanan.
16 Loboran sia tang marangke tu kalena lan to’ allo mala’da’, sia iatu tangkena sipendongloran dio to’ tarampakna.
17 Na iatu uaka’na siperroroan dio to’ batu, sia sikallikan lan lu alla’ to’ batu.
18 Apa iake didu’dukki tu tau iato dio mai to’ inanna, napeongannimi, nakua: Tae’ bangpa kutiroko!
19 Manassa susimoto tu kaparannuan katuoanna, sia tuo dio mai padang tu senga’na.
20 Manassa iatu Puang Matua tae’ nala ussualei tu to bulo lollong sia tae’ Nasaladanni limanna tu to kadake gau’na.
21 Iake nalambi’i attunna tontong tu Puang la umpopetaako, sia tontong umpasila’tekan randan pudukmu.
22 Iatu to ungkabiri’ko la nakabu’ siri’, sia tendana tu to tang mekaaluk la ta’demo.