Ayub 9

Iatu pebali bunga’na Ayub lako Bildad, nakua: Tae’ naden misa’ tau ungkullei umbali Puang Matua 1

Apa nakua Ayub mebali:

2

O tonganna, inang kutandai, kumua den susito, umbara nakua tu ma’rupa tau ditonganan, ke sitingoanni Puang Matua?

3

Iake morai tu Puang ussikara-karanni, lan sangsa’bu pekutana moi misa’ tae’ nakullei umpebalii.

4

Mindara tu ma’din umbalii Puang, moi anna matumba tu kamatarrusanna sia matumba tu kakapuanna kamatotoranna, anna torro marampa’?

5

Iamo umpalele buntu, anna tae’ tau unnissanni, Ia umbalittua’i napobua’ kare’dekan ara’Na.

6

Ia umpatiseno kuli’na padang, anna tilele, naurungan tilento tu mai lentongna.

7

Ia umparentai tu allo, anna tae’ nadellek sia Ia untutu’ bintoen, anNa ca’i.

8

Ia manna misa’ umpatiballa’ langi’ sia umpopentengka lentekNa dao ma’bombangna tasik.

9

Ia ungkombong bintoen Ursa sia bintoen Orion, tu bintoen Bunga’ sia bintoen Ma’karapu-rapu rampe Lo’na lu.

10

Ia umpogau’i tu mai apa kalle-kallean, tu tang dilambi’, ondongpi tanda mangnga tang dikemba’ diia’.

11

Iake Naola lendu’na’, tae’ kutiroI, iake sumayo-mayoI ullendu’ina’, manassa tae’ kupemarangaI.

12

Iake Nasintakki tu mai apa, mindara umpadapai? Mindara tu ma’kada lako Kalena nakua: Apara tu mipogau’?

13

Iatu Puang Matua tae’ Napatananni tu kare’dekan ara’Na, diong kuasanNa nanii tukku tu patunduanna Rahab;

14

ondongpi iatu aku ma’dinra’ka umpebalii Puang, sia ma’dinra’ka untonno’ kadangku umpebalii Puang.

15

Moi angku tongan, tae’ kuissan umpebalii, sangandinna mengkamoyana’ umpalaku kamaturu-turuanna To ma’paolai salungku.

16

Iake metambana’ sia Napebaliina’, tae’ angku patonganni, kumua Natanannina’ talinga;

17

Iamo, tu ummangsannina’ tete dio angin bara’, sia umpakerangan bangkeku moi tae’ Napobannang.

18

Tae’ Naeloranna’ melayo, sangadinna Napedia’ina’ kamapairan.

19

Tonganna diona kamatotoran bangri – matoto’ Ia, sia diona salunna, Nama’kada tu Puang Kumua: Mindara ma’din untambaiNa’ umpebalianni?

20

Moi angku tongan, pudukku kalena urra’ta’i tu kasalangku, moi angku tang sala, Puang kalena umpasalana’.

21

Tae’ salaku, tae’ kukabudai tu sunga’ku, kukagi’gi tu katuoangku, podo natonganna.

22

Mintu’na pada bangsia, iamoto kuma’kada, kukua: Pada bangsia to tang sala sia to sala Nasabu’i Puang.

23

Iake ta’pa napatei ulang pebambaNa, Napetaai Puang tu kabuyuranna to tang sala.

24

Iatu lino disorong tama kuasanna to tang mekaaluk sia Natampun Puang tu lindona to ma’paolai salunna; iake tangia Puang umpogau’i, minda pole’opa?

25

Manassa iatu alloku lendu’ matira’na na iatu pesua dipopa’dondo, tarru’ liu bang anna tae’ natiroi tu melona.

26

Sumayo bang susito lopi tille, susito langkan maega ussiok pealanna.

27

Iake kutangnga’i, kumua: La kukalupai bang tu sarroku, sia kua’ga senga’ tu rupangku sia kupaparannu tu penaangku,

28

manassa kukataku’ tu mintu’ kamaparrisangku; kuissan kumua iatu kamu tae’ Mibilang maserona’ dio mai kasalan.

29

Da’ito angku sala bangmo; ma’apai angku la unta’ka’i punala bang kaleku?

30

Moi angku baseimo ambun makko kaleku sia usseroimo soda limangku,

31

manassa la Miparokkona’ to’ tombang, anna kagi’gi’na’ tamangkaleku.

32

Belanna iatu Puang tae’ angku susi, iamoto misa’ tolino, tu ma’din kupebalii, kumua: Tamale sola lako to ma’paolai salu.

33

Lala sia manii naden to unnola malolo dio alla’ta, tu ma’din umparemme’iki’ lima sola dua,

34

anna lendokanni Puang tu pebambaNa dio mai kaleku sia da Naparampoina’ tu mepatirambanna;

35

iake susito la ma’kadana’ sia tae’ angku kataku’I tu Puang, belanna tae’ tu kupobannang la mataku’.

alkitab.me