Bilangan 34
Ma’kadami tu PUANG lako Musa Nakua:
Mesuako lako to Israel sia ma’kadako lako kumua: Iake rampomokomi tama tondok Kanaan, iamote tu tondok la mipotaa mana’, iamotu tondok Kanaan situru’ passaparanna.
Iatu tampak rampe lo’na lu la randuk dio mai padang pangallaran Zin sipeupu’ Edom sia passaparanna padangmi rampe lo’na lu la randuk dio mai tampak tasik Ma’sin rampe matallo.
Anna tibangko tu passaparanna randuk dio mai rampe lo’na lu ma’palulako sapa’ Te’tek buku, tarru’ lako Zin sia iatu tampakna la rampe sau’ Kadesh-Barnea, natarru’ lako Hazar-Adar sia tarru’ lako Azmon.
Na passaparan dio mai Azmon la tibangko lu lako salu’-salu’ Mesir, na iatu tampakna la rampo lako tasik.
Sia iatu passaparan padangmi dio rampe matampu’ iamotu tasik kapua sia biring tasik; iamote tu passaparammi dio rampe matampu’.
Inde sia tu passaparan padangmi rampe daanna lu, iamotu randuk dio mai tasik kapua la mipamanassa tu gorri’na lu lako buntu Hor.
Dio mai buntu Hor la mipamanassa tu gorri’na sae lako lalan lu lako Hamat, na iatu tampak passaparanna la dio Zedad.
La tarru’ tu passaparan lako Zifron, na iatu tampakna la dio Hazar-Enan; iamote tu passaparan padangmi rampe daanna lu.
Na iatu passaparan dio rampe matallo la mipamanassa tu anggenna randuk dio mai Hazar-Enan lu lako Sefam.
Na dio mai Sefam, iatu passaparanna la lu rokko Ribla, rampe matallona Ain; namane passaparan iato lu rokko sia sipeupu’ tasik Kineret dio rampe matallo.
Napassaparan iato lu rokko Yordan sia iatu tampakna iamotu tasik Ma’sin, iamote tu anggenna padangmi situru’ passaparanna tiku lao
Mepasanmi tu Musa lako to Israel nakua: Iamote tu tondok la pantan mipamanassa tu taa mana’na tete dio pa’loterei, tu Napepasanammo PUANG.
Belanna iatu suku Ruben sia iatu suku Gad mangkamo untarima taa mana’na situru’ rapunna; susi duka tu sangsese suku Manasye mangkamo untarima taa mana’na.
Da’dua ssangsese tu suku mangkamo untarima taa mana’na sambalinna lu Yordan sitingoan Yerikho lan rampe matallo, dio kadellekan allo.
Ma’kadami tu PUANG lako Musa Nakua:
Inde sia tu sanganna tu to la umpamanassangko tu tondok la dipotaa mana’, iamotu to minaa Eleazar na Yosua, anakna Nun.
Sia la miala simisa’ arung dio mai simisa’-misa’ suku, kumua natau iato umpamanassai tu tondok la dipotaa mana’.
Inde sia tu sanganna tu tau iato, iamotu Kaleb, anakna Yefune, umpamanassanni tu suku Yehuda,
Samuel, anakna Amihud, umpamanassanni, tu suku to Simeon.
Elidad, anakna Kislon, umpamanassanni tu suku Benyamin.
Buki, anakna Yogli, iamotu misa’ arung, umpamanassanni tu suku to Dan.
Iatu bati’na Yusuf, Haniel, anakna Efod, iamotu misa’ arung, umpamanassanni tu suku to Manasye,
na Kemuel, anakna Siftan, iamotu misa’ arung, umpamanassanni tu suku to Efraim;
Elisafan, anakna Parnah, iamotu misa’ arung, umpamanassanni tu suku to Zebulon.
Paltiel, anakna Azan, iamotu misa’ arung, umpamanassanni tu suku to Isakhar;
Ahihud, anakna Selomi, iamotu misa’ arung, umpamanassanni tu suku to Asyer.
Pedael, anakna Amihud, iamotu misa’ arung, umpamanassanni tu suku to Naftali.
Iamote tu mintu’ to Napasan PUANG la umpamanassanni tu taa mana’na mintu’ to Israel lan tondok Kanaan.