Bilangan 35

Ma’kadami tu PUANG lako Musa dio padang Moab sikandappi’ Yordan sitingoan Yerikho, Nakua:

Pasanni tu to Israel, nasorongi dio mai taa mana’na tu ba’tu pira-pira kota la napa’tondokki to Lewi; sia la misorong duka tu padang kariuan untikui kota lako to Lewi.

Na iatu kota iato la napa’tondokki tau iato sia iatu padang kariuanna la nanii umpatuo patuoanna sia apanna sia mintu’ olo’-olo’na.

Iatu padang kariuanna kota iato tu la misorongan to Lewi, iatu lua’na sangsa’bu siku dio mai benteng tembo’ lako salian tiku lao.

Ammi suka’i dio salianna kota duangsa’bu siku dio rampe matallo sia duangsa’bu siku lo’ rampe lo’na lu sia duangsa’bu siku dio rampe matampu’ sia duangsa’bu siku daa rampe daanna lu; na iatu kota lan tangnga-tangngana; iamote tu la napopadang kariuan tau iato dio salianna kota iato.

Iatu mai kota la misorongan to Lewi, annan tu kota pentilindungan, tu la mipamanassa anna nii tu to papatean mallai lako, na senga’pa iatu patangpulo ndua kota la misoronganni.

Mintu’ tu kota la misorongan to Lewi den patangpulo ngkarua sola tu mai padang kariuanna.

Iatu mintu’ kota la misorongan dio mai taana to Israel, dio mai tu suku unnampui buda kota, la miala buda, sia dio mai tu suku unnampui kota tang pira, la miala tang pira; pantan suku sitinaya taa mana’na, tu dipamanassan tau iato, la nasorong tu kotana lako to Lewi.

Ma’kadami tu PUANG lako Musa Nakua:

Ma’kadako lako to Israel sia kuanni kumua: Iake ullambanmokomi Yordan lako tondok Kanaan,

la mipilei tu ba’tu pira-pira kota, tu la mipokota pentilindungan, anna nii to papatean mallai lako, tu to tang unnangga’i umpatei tau.

Nakota iato la mipoinan pentirerungan dio mai to la unnala puli, kumua da namate tu to papatean, ke tae’pi nabendan diparessa dio olona kasirampunan.

Iatu mai kota la mipamanassa, annan tu la mipokota pentilindungan.

Tallu tu kota la mipamanassa sambalinna lu Yordan, na tallu kota tu la mipamanassa lan tondok Kanaan; la dipokota pentilindungan nasang to.

Iatu annan kota la napoinan pentirerungan to Israel sia to sae sia to mentiruran dio lu kamu, tu la nanii tau iato pantan mallai lako, tu to tang naangga’i umpatei tau.

Apa iake nalonga’i oongan bassi, naurunganni mate, iamoto tu to papatean; to papatean iato manassa la dipatei.

Sia iake natumbui batu, anna pobannangi tu misa’ tau mate, anna mate, iamoto tu to papatean; to papatean iato manassa la dipatei.

Ba’tu ke nasambakki oongan kayu, anna pobannangi tu misa’ tau mate, anna mate, iamoto tu to papatean; to papatean iato manassa la dipatei.

Iatu to unnalanni puli la umpatei tu to papatean iato; iake naappa’i napatei.

Iake nakabiri’i anna tossokki ba’tu naangga’i ulleba’i, anna mate,

ba’tu iake siualii anna tappele’i, anna mate, iatu to papatean iato manassa la dipatei, belanna iamo misa’ to papatean; iatu to unnalanni puli, la umpatei tu to papatean iato, ke nakabu’tui.

Apa iake tae’i nasiuali, anna simpolo untossokki, ba’tu tae’ naangga’i ulleba’i ba’tu apa-apa,

ba’tu tae’ natiroi anna paruai batu, napobannangi tu misa’ tau mate, anna mate, moi natang siuali sia tae’ nadakaranni kadake,

manassa iatu kasirampunan la umpaolai salu tu to papatean anna to unnalanni puli situru’ atoran iate,

na iatu kasirampunan la ullendokanni tu to papatean dio mai limanna to mangala puli, anna eloranni kasirampunan sule lako kota pentilindungan, tu mangka nanii mallai lako. Anna torro dio sae lako matena tu tominaa kapua, tu ditokko minna’ maindan.

Apa iake nalendu’i to papatean sidi’ tu passaparanna kota pentilindungan tu nanii mallai lako,

anna appa’i to mangala puli dio salian lili’na kota pentilindungan, anna patei to mangala puli tu to papatean, tang la dipa’tuntunnimo to’doan rara.

Belanna sipatu la torro lan kota pentilindungan sae lako matena tominaa kapua; ianna matemo tu tominaa kapua ma’dinmo sule tu to papatean lako padang pa’tondokanna.

Iamote tu atoran dipondok la mipeolai misiosso’i lan mintu’ pa’tondokammi.

Minda-minda tu umpatei misa’ tau, la dipatei situru’ tu napamanassanni to sa’bi, apa iake misa’ri to sa’bi tang silasapa tu kasa’bianna la nanii umpatei tu tau iato.

Iatu sunga’na to papatean da mialai tu doi’ pela’bakna, apa manassa ia la dipatei.

Da duka mitarima doi’ pela’bakna belanna misa’ to mallai lako kota pentilindunganna, anna ma’din sule umpa’tondokki tondokna, ke tae’pi namate tu to minaa.

Susimoto da’ mipakasarembanganni tu tondok minii ma’tondok, belanna iatu rara umpakasarembangan tondok, sia tae’ nama’din dipadenan kadiseroian kasalan tu tondok diona rara tu dipatibollo lan tondok iato, sangadinna tete dio rarana to mangkamo umpatibollo rara iato.

Iamoto da mipamarutakki tu tondok, minii torro, tu Kunii ma’tondok lan, belanna Akumo, tu PUANG, ma’tondok dio lu to Israel.