Bilangan 36

Iatu pangulunna rapu pa’rapuan bati’na Gilead, anakna Makhir, anakna Manasye, dio mai pa’rapuan bati’na Yusuf sae mengkareke’ nama’kada dio olona Musa sia iatu mai arung, iamotu pangulu rapunna to Israel, nakua:

Napepasanammo PUANG lako puangku, kumua la nasorongmo tu tondok tete dio pa’loterei lako to Israel la napotaa mana’ sia Napepasanammo PUANG lako puangku la umbenni taa mana’na siulu’ki Zelafehad lako anakna baine.

Iake napobainei misa’ tau dio mai anakna suku senga’na to Israel, manassa iatu taa mana’na la diala dio mai taa mana’na nene’ to doloki, anna dipangrangnganan lako taa mana’na suku iato, tu dipasangbilangammo, apa la diala dio mai taa mana’, tu dipamanassangkan tete dio pa’loterei.

Iake taun Yobelnami to Israel, manassa iatu taa mana’na dipangrangnganammo lako taa mana’na suku, tu dipasangbilangammo, sia iatu taa mana’na dialamo dio mai taa mana’na suku nene’ to doloki.

Attu iato napepasanammi Musa lako to Israel situru’ tu Napa’parentan PUANG nakua: Tonganmo tu kadanna suku bati’na Yusuf.

Inde sia tu kada, tu Napepasanan PUANG diona anakna baine Zelafehad Nakua: Tau iato ma’din napobaine minda-minda umporai, podo ke umpomuanei to lan pa’rapuan sukunna ambe’na.

Belanna iatu misa’ taa mana’na to Israel tae’ na la lele dio mai misa’ suku lako senga’na, apa iatu to Israel la pantan manda’ bang umpoapai tu taa mana’na suku nene’ to dolona.

Iamoto anna mintu’ pia baine, tu unnappa’mo taa mana’ dio lu suku to Israel, sipatu la napobaine misa’ tau dio mai pa’rapuan sukunna ambe’na, kumua anna pantan tu to Israel umpomana’ taa mana’na nene’ to dolona.

Belanna iatu taa mana’ tae’ na la lele dio mai misa’ suku lako senga’na, apa iatu to Israel la pantan manda’ bang umpoapa taa mana’na.

Susitu mangka Napepasanan PUANG lako Musa, susimoto tu napogau’ anakna baine Zelafehad.

Na iatu Mahla, Tirza, Hogla, Milka na Noa, anakna baine Zelafehad napobainemo anakna pa’amberanna.

Napobainemo to dio mai pa’rapuan bati’na Manasye, anakna Yusuf, naurunganni iatu taa mana’na mari’pi napoapa pa’rapuan sukunna ambe’na.

Iamote tu pepasan sia atoran, tu mangka Napepasanan PUANG nalopian Musa lako to Israel, dio padang Moab sikandappi’ Yordan tu sitingoan Yerikho.