Daniel 1

Iatonna taun ma’pentallun kaparentanna Yoyakim, datu Yehuda, saemi tu Nebukadnezar, datu Babel, lako Yerusalem, anna patama limbui.

Nasorongmi PUANG tu Yoyakim, datu Yehuda, tama limanna sola tu sangtaan pareanan banuanNa Puang Matua, nabaai lako padang Sinear, napatamai banua deatanna; iatu pareanan iato napatama inan pareanan deatanna.

Mesuami tu datu lako Aspenas, pangulu to mase’ponna, kumua nabaai sae tu ba’tu pira-pira to Israel, dio mai bati’ datu sia dio mai to la’bi’.

Iamotu ba’tu pira-pira to mangura, tu tae’ tattanna sia melo pantarisanna, tu kinaa sia paissan sia tarru’ manarang, tu malute untoe pengkarangan lan tongkonan layukna datu, anna ada’i sura’ sia basa to Kasdim tu tau iato mai.

Napamanassami datu tu kandena tau iato mai kiallo-kiallo, iamotu dio mai kandena datu sia uai anggoro’ nairu’ datu. Lan tallung taun la dinii unnada’i tu tau iato, namane ma’din untoei tu pengkaranganna datu.

Dio lu tau iato mai ba’tu pira-pira tu to Yehuda, iamotu Daniel, Hananya, Misael na Azarya.

Nasondaimi pangulu to mase’ponna datu tu sanganna tau iato; iatu Daniel nasangaimo Beltsazar, na iatu Hananya nasangaimo Sadrakh, Misael nasangaimo Mesakh, na iatu Azarya nasangaimo Abednego.

Iatu Daniel napamanassamo lan penaanna, kumua tae’ nala urruttakki lenni kandena datu sia uai anggoro’ nairu’ datu, tu kalena; iamoto anna messiman lako pangulu to mase’ponna datu, kumua da anna ruttakki lenni tu kalena.

Attu iato Nakamasei Puang Matua tu Daniel, anna maturu-turu sia mamase penaanna tu pangulu to mase’ponna datu lako kalena.

Apa ma’kada tu pangulu to mase’ponna datu lako Daniel, nakua: Mataku’na’, natiro manii puangku datu tu mangkamo umpamanassai tu la mikandena sia la miiru’na tu rupammi, sosso’ na iatu mai pia muane sangbara’mi; iake susito la mipapassannina’ tu sala dio olona datu.

Ma’kadami tu Daniel lako pa’kampa kande, tu mangka nasua pangulu to mase’ponna datu la ungkaduttu’ Daniel, Hananya, Misael na Azarya, nakua:

Tobai te taummi lan sangpulo allona: ben bangmokan utan kikande sia uai kiiru’.

Ammi pasitiroi rupangki tu to mangura ungkande kandena datu mimane umpogau’i lako te taummi susitu patiromi.

Napalalomi tu palakunna tu tau iato mai, natobai lan sangpulo allona.

Iatonna upu’mo sangpulo allona natiromi kumua mandu maelo ia tu rupanna sia malompo tu kalena tau iato mai anna iatu mintu’ to mangura ungkande kandena datu.

Iamoto naalai pa’kampa kande tu kandena sia uai anggoro’ la nairu’, nabenni utan tu tau iato mai.

Nakamaseimi Puang Matua kapaissanan, kamatarrusan untandai mintu’ sura’ sia kakinaan tu to mangura sola a’pa’i, na iatu Daniel matarru’mo untandai ma’rupa-rupa patiro mendeata sia tindo.

Iatonna ganna’mo tu attu napamanassa datu, maneri dipopennolo tu tau iato mai, nasolammi pangulu to mase’ponna datu umpennoloi Nebukadnezar.

Napa’kadaimi datu tu tau iato mai; dio lu mintu’ tu tau iato, tae’ misa’ naappa’ susi Daniel, Hananya, Misael na Azarya; randukmi diala to mase’ponna datu.

Na lan mintu’na apa diona kamatarrusan sia kapaissanan, tu napekutanan datu lako kalena, naappa’mi datu kumua losong ia pessangpulo manarangna na iatu mintu’ to paissan-issan sia to ma’basa-basa lan mintu’ kadatuanna.

Torromi tu Daniel dio sae lako taun bunga’na kadatuanna Koresh.